Acts 21 - ASII LAKDAP Bible (BSI)

Paul Ka Jerusalem Na Wato

¹ Naishiq raq tsangshiq ma, “Khumphai she jo” nguta bomthü laita kihokai. Kiimaq rusan na laijong maq kiho laita, khamjong mong hiq aranse Kos chela na saüho kai. Kiimaq napjai ranaiq she, naishiq ka khamjong mong hiq Rhodes chela na saühokai. Kra miishe laijong toq chang Patara chela niishe saühokai.

² Kiijaq Phonesia wang na kaihoti laijong ashi asi riihumho kai. Krai mren, kra laijong na dü wan laitiishe naishiq ka kihokai.

³ Riita lam na khamjong thaq maq khamjong mong hiq Saipras ka laijong maq rashra chhithü kai. Laita kiimaq shemai nü tiithithi maq jiiqho laita, Siria wang nü na kihokai. Riita naishiq ka khamjong kii hiq Tajar chela niishe saüho kai. Naishiq kai chang laijong maq ahoho piikii chang huk asam thun kriika, kiijaq tiisat wa chang riito.

⁴ Kiijaq Tajar chela na naishiq raq phunainotiim wiijamti asi, kra rit laita hum kai. Laita tsangshiq rai chepat shi sithü damkai. Tsangshiq raq Asii Wenyi ningkun maq Paul nangnga Jerusalem na saüli ka naq kikiq li nguta atiiwin riito.

⁵ Shatmaq, tsangshiq rai hai dam rahiq akhing ka thumkai jai she, naishiq ka kiimaq atiido she riiwan nong kai. Tsangshiq tarü, jechak nose thun min nong nong, naishiq thükai nguta chela khamjongraikii kumtsai phii na saüli naishiq rai kidamto. Kiijaq naishiq tarü kaütsrong na nga laita achu jaükai.

⁶ Kra lot laitiishe, kiim riiphea bom, “Hansang maq sirong liijo” nguta bomthü laita, naishiq ka laijong niishe dü wan kai. Kiimaq tsangshiq min jam niishe jang wan nongto.

⁷ Naishiq ka Tajar chela maq laijong maq kiho nong laita hali, Tolemais chela niishe saükikai. Kiijaq phunainotiim rai riihum hokai. Kiimaq tsangshiq rai ranaiq shi haiho dam kai.

⁸ Kriimaq napjai ranaiq min khamjong lam miili kihoruq kiho laita, Sisiria chela niishe saükikai. Kiijaq naishiq ka akhumti we shra Philip jam na japho kai. Apaiq ka Jerusalem na akhrumtitiim wemiishi tseataq kra phong wa weshi riito.

⁹ Asetiim ka junriisetiim nyungblai riito. Kriiwiitiim raq Shiikeawe bomtsi ka chongkuqto.

¹⁰ Naishiq ka kiijaq rablai ngi haijai niishe, Judia wa aki Shiikeawe shammi weshi ka kiijaq saükito. Apaiq mang ka Agabas.

¹¹ Apaiq ka naishiq phana kito. Raüta Paul raq achhü shat chang khea nin chü kra ajaq na sham raüta, ahok nai ajaq ka kha raüta, akha tiithaito, “Asii Wenyi raq akha chongtlo: Ara chhüshat chang kheanin chü pati we arka, Jerusalem na siti Jehudinok raq akha mikha baiq. Raüta Pongnok phan maiqse jaqkhon mong na mikuq baiq,” nguta riisham bom maq tiithaito.

¹² Kra tailaita kiijaq naishiq ümchuwa asi riikai, kiimaq nanok ahinti riimin, Paul nangnga, Jerusalem chela niika naq wakiq li nguta tiiwin kai.

¹³ Shatmaq, Paul raq tsangshiq ma, “Namtsam ka akha jamkho ngi rai tlan? Aho anyi trang lanta, i tsan ara tiibun baiq sha dan tlan? Ngi ka Jerusalem na shumraü kharü maq tiikha lamlamse li ka riimak! Tati Jesuq miitu, Jerusalem na atsai ma kham tiikang,” nguta tsangshiq bom ka treto.

¹⁴ Riita, naishiq raq apaiq ka tiiwinlot mai she kha maq, atei she riikai. Laita, ikhiijiika, “Tatiwe raq jamlai phan wa thapthi tlaq, kriili she dea mihong tha laq,” ngutli she bom ka shat kai.

¹⁵ Kiijaq ashaqpuq haithü laitiishe, naishiq hup asam ka tiije laita Jerusalem niishe wawankai.

¹⁶ Riita Sisiria wa maiq wiijamti phunainotiim kiimin, naishiq rai adam maq wadamto. Raüta, naishiq ka naishiq düwa chang jamchongti we jam na shea wanto. Apaiq mang ka Mnason riito. Apaiq ka Saipras wang na siti. Apaiq ka man na aphaji niiphü kamasham maiqse dongdii riito.

Paul Ka Jakob Rai Riihumto

¹⁷ Naishiq ka Jerusalem niishe saü wan kaita, kiiwa phunainotiim raq naishiq ka khoqriiq shishiiq maq taoto.

¹⁸ Kiimaq naiqjai ranaiq she, Paul ka naishiq rai adam maq Jakob rai riihumkai kito.

¹⁹ Paul raq tsangshiq rai riihum raüta, “Khusang khata,” nguta riibom phahoto. Raüta, apaiq traho bomchong jaqsham wantaq kra lümaq, Shiikeawe raq Pongnok phan maiqse phong na jonghea jaqsham wantaq kra thun tsütsa kriishe wiita tiitho tiipha raüta, tsangshiq ma phanchan chongkuqto.

²⁰ Tsangshiq raq ara tsütsa ka tai raüta Shiikeawe ka tiitsam kamto. Raüta, tsangshiq raq apaiq ma chongto, “Phuno we Paul lei, Jerusalem wa maiq pahea ahing ahing she phung na shang wanto. Kriika ümniiriimin asap haü. Kiimaq tsangshiq ka nashiq Jehudinok Thungtri ka jaqkhon tiipha raüta atsin maq lang wanti siisaq.

²¹ Pongnok phan mung na siti Jehudinok tarü ma, ümchaü sanha Mosheq Thungtri kriika lang wan raa mak she, kiimaq athohan poi klo min raa mak she, kiimaq Jehudinok thungtri kriika lang raa mak she nguta, ümniiraq tsangshiq ma tra hokuq tlaü ngu wa nguta, nanok raq tsangshiq ma tsütsa ka tiitai chongkuq hoto.

²² Tsangshiq raq ümniika ajaq saükito she ngutiika mitai dongdii she. Kriikha maq, ümchaü min jamkha riihai jiiwa ahea miraq?

²³ Naishiq riika akha riihai jaq ahea miraq nguta tiima tiikai. Naishiq phong na sinkiitiq kiqkham kongphiq raükha wanti maiq weblai ka asi.

²⁴ Ümniimin tsangshiq rai adam na, tsangshiq mrochhi khuliiq tlaq kiijaq lom dam laq. Laüta, tsangshiq khum tiisii khuliiq chang kra miitu, chiirit chiikha ümchu wa raa tlaq kriika, ümniiraq shoq laüta kuq laq. Kra riihaü jiitiq, tsangshiq mrochhi ka lot raütiishe, tsangshiq khu ka misi.

²⁵ Shatmaq, Pongnok phan maiqse wa kamasham maiqsetiim miitu ka, naishiq raq jamlai wa riichong kai, kra phan phan lak ashi tiiho wan kai she. Lak na bomtsi ka akha nguta waiq kai. Tsangshiq raq phra sumla noq ma honglu na akuq hupsam ka phaqsea dam maimak. Kiimaq wiitiijai tam maq ngam phaq raa mak. Kiimaq abuq maq tiishak raüta atsat ngam ka phaq sia raa mak. Kiimaq tsangshiq raq sethoq sepii kiicham ngarai ka tang raa mak nguta waiqkai.”

²⁶ Krai mren, Paul raq naiqjai ranaiq niishe, tsangshiq kra shea raüta, tsangshiq rai adam maq, khum tiisii mrochhi poi ka kloto. Raütiishe, apaiq ka Shomjam na wa raüta khum tiisii wan mrochhi apii hai ka ümchu ranaiq jai tiq wa mithum, kra thum jaitiq she, tsangshiq weblai khumtek raq honglu kewa chang miraq, kra tsütsa ka tiitai chong wato.

Roman Phenlanok Raq Paul Lapto

²⁷ Shatmaq, kra apii ramiishi haitaq kra athum wan nini niishe, Asia wang wa aki, Jehudinok maiq wiijamti raq Paul ka Shomjam mong na chhito. Kra chhi raütiishe tsangshiq raq mungmaiqse wiita ka riisii she tiishai baiqto. Raüta Paul ka rangho tlii maq laphoto.

²⁸ Tsangshiq raq, “O Israilnok singmung maiqse lei! Warong ra lii! Arwe ara tiinin tlo rong i!” nguta gitrang wanto. “Arwe ahata barap binrii na waraüta nokmaiqse tarü ma, Israilnok mung thaq na, Mosheq Thungtri thaq na kiimaq ara Shomjam arthaq na, ashut riiqkhiq traho bomchong kewanti we. Kiimaq liirong laq, ümchaü min apaiq raq Pongnok phan maiqsetiim ka ara Shomjam mong na shea wan raüta, ara Asii Shomjam arka tiisheshi baiq wantlo!”

²⁹ (Tsangshiq raq Trophimas ka Paul rai chela na akhum dam chhito. Trophimas ka Ephisia chela na siti riito. Kiimaq tsangshiq raq tiima ka Paul raq apaiq kiimin Shomjam mong na shea wan damto sham nguta tiimato.)

³⁰ Kra tatso mrurang brak wan bom ka chela mong na wiita nyam wanto. Kiimaq mungmaiqse ka khutaü maitaü ikhiishe, adam na jutrang wanto. Raüta, Paul ka ranghoto. Raüta apaiq ka Shomjam mong wa kinphai na krun krun she hithoto. Kiimaq thakthit laqthit she Shomjam kilü thun ka shaq baiqto.

³¹ Kra mungmaiqse tatso brak wan tlaq kriiraq Paul ka atsea baiq chang nguta tankhanlaq bala liipan niili, maiq ashira raq Roman phentujong we ma, Jerusalem ha tatso walü raq she la khiim wanta nguta tsütsa ka tiitai chongto.

³² Kra tairaütiishe, phentujong we ka siihiipbi nai phenlabi ka sheaho raütiishe, tlat chhat, mungmaiqse brak rai tlaq ba kiijaq juto. Mungmaiqse raq siihiip jong we nai phenlanok kra chhi raütiishetiq, tsangshiq raq Paul buk rea jaqmiiq ka tsaqto.

³³ Riita phentu jong we ka wa raüta, Paul ka lapto. Raüta phenlabi ma jinraü kharü anai maq tiikhato. Raütiishe apaiq raq, “Arwe ara juwa? Apaiq raq jamlai wa shiithen ta?” ngutiishe bom ka waito.

³⁴ Kra tairaüta, mungphong mong kiiwa maiq wiijamti riika phanshi bom chong raüta siitrangto. Kiimaq maiq wiijamti raq hali ka laihin bom kra chong nong raüta gitrang wanto. Tsangshiq bom ka brak biishaq li riito. Kra mungmaiqse brak shaq rüriiq trang rai wan tlaq kra wiika, apaiq raq bomtsang bomrii jamlai phan hum wan chang min ahü riito. Kriikha miishe, siihiipjong we raq, Paul ka phentiip mong na longtiip jam kiiniishe hit wan miitu she aming kuqto.

³⁵ Tsangshiq raq Paul ka shea raüta, longhiq khuphi kiina saü wan pha raü niili she, mungmaiqse brak shaq rai wan tlaq tatso walü ka henghea she heng wanto. Kriikha miishe phenlanok raq Paul ka tsangshiq jaq maq, tsangshiq khuthaq na api raütiishe dowanto.

³⁶ Mungmaiqse brak shaq rai wantlaq kra raq Paul jai ka atam alam miishe jowan raüta, “Warong ra, apaiq ara tiijobaiq tlo rong i!” nguta gitrang wanto.

Paul Raq Akhum Tiikhe Bom Chongto

³⁷ Phenlanok raq apaiq ka tsangshiq kem longruk jam na ashea wan she kiijaq, Paul raq tsangshiq siihiipjong we ma chongto, “Ajong we lei, ngi raq ümniima bom poshi chong mimai sha?” nguta waito. “Ümniiraq Grik bom atsin haü nya?” nguta siihiipjong we raq apaiq ma waito.

³⁸ “O, ikhiijiika ümnaq arka ümnap ümji Ejip mung wa waraüta Roman Hokham rai riilongti mungshukti we, maiq hingblai asengi rewe tsuqho raüta, kumtsaiphii na kihotaq, irwe ka riimak nya?” nguta waito.

³⁹ Kiijiishe, Paul raq treto, “Ngi ka Jehudi phan. Silisia wang na Tarsas chela na achü. Kiimaq akhek chela ajong na siti nokti we ashi. Riita, ümchaü min, ngi raq ara mungmaiqse mrurang rai tlaq arma bom poshi chongke miitu aming kuqlaq” nguta jaüto.

⁴⁰ Krai mren, kra siihiipjong we raq Paul raq mungmaiqse ma bom chongke miitu akhing she kuqto. Kiijiishe Paul raq long hiqkhuphi na chap raüta, ajaq ka ra na do raüta, mungmaiqse ma heashi sang rong liishaq nguta ajaq maq japto. Riita, kra chhi raüta, mungmaiqse kiimin sangrang she sangkito. Krai mren, Paul raq Jehudi bom miishe arkha nguta mungmaiqse ma traho bom she chong kuq phahoto: