Acts 20 - ASII LAKDAP Bible (BSI)

Mesidonia Nai Akaia Wang Na Wanongto

¹ Kra tatso rüriiq trang raitaq kra sang wan jai she, Paul raq phunainotiim thun ka adam na triitam heato. Raüta tsangshiq ma tsaido jido bomtsi chongkuqto. Raüta wapha she jo nguta apaiq ka Mesidonia wang niishe tiido wanto.

² Apaiq ka kra wang binjü maq wawanto. Raüta kra binjü na siti phunainotiim ma tsaido jido bomtsi pahea chongkuq wanwan wawanto. Raütiishe apaiq ka Akaia wang na wawanto.

³ Apaiq ka Akaia wang na jipi lütsam sithüto. Kra sijai she, apaiq ka Siria wang na kaiho she nguta tiijeto. Kiijiishe, Jehudinok raq apaiq ka atsea baiq miitu reraü shunto ngutiishe, apaiq raq tho ka heto. Kriikha niishe, apaiq raq Mesidonia wang lam maq hali jangho nong chang ngutiishe, apaiq kaisea walam ka thapthi wanto.

⁴ Apaiq rai kai damti kongtibi thun ka Pairihas se Sopatar riito. Apaiq ka Berea chelati. Kiimaq Thesalonia chela wiika Aristarkas nai Sekundas kidamto. Darbi chela wiika Gaias kidamto. Apaiq rai ka Timothi min kidamto. Kiimaq, Asea wang wiika Tikikas nai Trophimas kidamto.

⁵ Tsangshiq ka naishiq ma sinkhu na kiholi raüta, Tros chela maq naishiq ka kheho lito.

⁶ Naishiq ka Pi Maq Shohü Winsii Phaq Poi kra lomlot jai miishe, Philipia chela maq laijong na dü wan kai. Laita rabiingi jai maq, naishiq raq tsangshiq ka Tros chela wa tlo hokai. Naishiq ka Tros chela na chepat shi haithü kai.

Tros Na Phunainotiim Rai Atiisup Riihum

⁷ Honibat raji na naishiq tarü rintii dungsea adam na riitam ngakai. Anap akaiho she ngo maq, Paul raq kiijaq siti phunainotiim ma trahoke ka rawa wathung na saüli chongkuqto.

⁸ Naishiq ngatiikai rathong khok niika lem ka apawiq tlü shat asi riito.

⁹ Kiijaq maiq norii we weshi, apaiq mang ka Eutikas nguta kriiwe ka kitanpu na ngato. Riita Paul raq trahoke ka aluwiq she chongkuqto. Eutikas ka akontsi, tiinguk miiliiq she riito. Raüta akon she riilaq kito. Apaiq ka akon lam maq kra jam thongtsam khok maq, hiq na dea wanto. Tsangshiq raq apaiq ka do raüta liikiita, apaiq ka amaa she riito.

¹⁰ Shatmaq, Paul ka hiq na satki raüta, Eutikas ka akhuk maq pomsaq pomto. Raüta, “Naq kiinyii rongkiq. Apaiq ka ahea. Tsaimak atra!” nguta tsangshiq ma bom ka chongkuqto.

¹¹ Raüta apaiq ka rathong khok na jang wan nongto. Raüta winsii ka tiibun raüta adam maq phaqto. Paul raq tsangshiq ma rashe dong na saüli, trahokuqto. Raütiishe apaiq ka kihoto.

¹² Raüta tsangshiq raq kra norii we kiimin ahea she jam na shea wanto. Tsangshiq ka rawa na achhiijap rai wa tsan awok sanglili hea miishe maiqmii jam na pin wanto.

Paul Ka Tros Maq Miletas Na Saüto

¹³ Naishiq ka Tros maq sinkhu na laijong maq kiholi kai. Laita Asos chela na saüho kai. Kiijaq naishiq raq Paul ka laijong na tiidii wan chang riito. Apaiq ka ta lam miili wawan ngo kha maq, apaiq raq naishiq ma bom ka akha chongkuqto.

¹⁴ Laita naishiq ka apaiq rai Asos chela maq riihum kai. Laita apaiq rai kongshi miishe lai maq Mitelini chela na kihokai.

¹⁵ Naishiq ka kiimaq tiido wan nong laita hali, anap ranaiq maq khamjong mong hiq Chios chela niishe saüho kai. Kiimaq naiqjai ranaiq niishe, naishiq ka khamjong mong hiq Samos chela niishe saühokai. Kiimaq napjai ranaiq niika Miletas chela niishe saühokai.

¹⁶ Paul raq Asia wang na rahiq ka alu tiicha mang she nguta apaiq kaisia walam bomtsi ka athapthi wan kun she riito. Kra ngo kha maq, apaiq raq Ephisia chela ka ashüp raütli she kaiho nguta thito. Apaiq ka Jerusalem na saüho tlo raüta, mairaü la Raroq Biingi Poi ka lomho dam ma nguta, ataü laü she riito.

Ephisia Phungtuti Ma Kiim Riiphea Tsiichong

¹⁷ Miletas maq Paul raq Ephisia phungtu liiti maiqlare ma tsangshiq ka apaiq rai mirhumki laq nguta bom ka tiichong wato.

¹⁸ Kiimaq, tsangshiq ka apaiq phana saüki kiita, apaiq raq tsangshiq ma bom ka akha chongkuqto, “Ngi raq Asia wang na i ji maq ni wan kang ranaiq maq pha wan lata, ngi tiido wan ranaiq na saüli, namshiq rai jamkho singa wan kang, kiimaq naiqhü wasü jamkho i jaq sham wan kang, lata siwan kang, kriika namshiq tarü raq asap han she.

¹⁹ Ngi ka Tatiwe luqkhapse ngo kha maq, Jehudinok raq chiqshun reshun raüta, i dü na ümtinkhan wa litkot chamchao rathaiq rahai tiisaü wantaq, kra liipan bala niimin, ngi ka aranse ma ja lata, kiimaq makphai trok lata, Shiikeawe jaqsham ka sham wankang.

²⁰ Namshiq raq asap han, ngi raq namshiq ma Shiikeawe bomtsi ka nokwe man na chongkuq wankang akhing na, kiimaq namshiq jam na khum lata shrinkuq wankang akhing na, namshiq ma jamlai phan wa ahea, kra akhiismin dam paü mang phan maq, tiitho tiipha chongphan kuq kang she.

²¹ Jehudinok nai Pongnok phan maiqse ma romshaq na, ngi raq tsangshiq tarü ka tsangshiq ngarai lamphan kiiwa jang wan raüta, Shiikeawe puk na nyap wan raa tlo, raüta Tati Jesuq ma kamwan raa tlo nguta kiq atsin maq trantsii chongkuq kang.

²² Riita, ümchaü sanha, ngi ka Asii Wenyi raq shunshea tlaq kra phanphan, Jerusalem niishe kiho tiikang. Kiina saüho hajaq, ngi ma jamlai phan litkot chamchao rathaiq rahai wa misaü, kriika ngi raq ümchaü chonglot mang.

²³ Ara jamkhano chongtiikang ngukla, ngi ka ümriibano kiwa tiikang, kiijaq chelatek na, ngi ma shumraü kharü nai chamchao litkot rathaiq rahai ka tiijeshat maq thü wan li tlo nguta, ngi ma Asii Wenyi raq chongkuqtlo.

²⁴ Shatmaq, ngi raq i rilung arka rariq mang she. Tati Jesuq raq ngi ka Tsütsa Ahea Shiikeawe kaphap bomtsi kra chongke miitu shongto. Kra jaqsham kra tlot wan tlo hajaq ngutli tsinngin tiikang.

²⁵ “Ngi raq khumshkhum maq, namshiq wiitarü ma, Shiikeawe Mungtan tsütsa kra chong kuq kang she. Riita ümchaü sanha, namshiq phong wa jurmin, i sham ka chhi nong man she mirhan nguta ngi raq asapha.

²⁶ Riita ara chong tiipha arkha maq, ümchaü min, namshiq phong wa maiq weshi ra ka ngarai mong na tsai wanti asi jiila, kriiti miitu ka ngi ma jamlai khü akha nyan chang min ahü she.

²⁷ Ara jamkhano chongtiikang ngukla, Shiikeawe raq jamlai wa mikuqha nguta tiihong tha kuqtaq, kra bomtsi thun kriika, ngi raq poshi min tam mang maq, namshiq ma kholam kholiiq rairai riirii, wiita chong kuq kang she.

²⁸ Riita ara chongkuq tiikang arai mren, namshiq raq maiqmii wenyi khum ka tiikhup wong wan shatmaq shongnga rong laq. Kiimaq Asii Wenyi raq namshiq jaqkhong na skuse kong ümchuwa trüm tlaq, kra thun ka samhea wiq maq rümkom ronglaq. Namshiq raq tsapkapkap maq Shiikeawe phungtu kra shiikum pan ronglaq. Phungtu ka Shiikeawe Se tsaitaq kra lümaq Shiikeawe rii she nguta tiija wanto.

²⁹ Ngi raq asap ha, i kiim tiijinho jai, namshiq phana bihea pinthum shekong kriishe misaü wan. Raüta, tsangshiq raq skuse kong ka wiita mitiiküshii baiq.

³⁰ Namshiq phong wiili, maiq wiijamti ka dongho raüta, tsangshiq raq arot akiq bomtsi kra michong kuq. Raüta, phunainotiim liipan wa maiq wiijamti ka tsangshiq jai phan niishe misheaho.

³¹ Arkha maq, namshiq ka tsii lamshat maq shongnga ronglaq. Ngi raq namshiq ma makphai pahea trok lata, phaqthak nithak maq naiqhü wasü tran tsii wan pha ira tsan na tiitsang shatmaq shongnga rong laq. Ngi raq namshiq tarü wiitsam tingkhit tran tsii chongkuq kang.

³² “Riita, ija, ümchaü sanha, ngi raq namshiq ka Shiikeawe khoqram kii maq ta thü tiikang. Kiimaq apaiq kaphap tsütsa wura mong na tiiham thü tiikang. Shiikeawe khoqram kii nai apaiq kaphap tsütsa raq namshiq ka jaqkhaq shat maq mitiichhan chhi kuq wan. Shiikeawe raq achu shiiman ümchuwa asetiim miitu rüm tlaq kriimin namshiq ma mikuq.

³³ Ngi raq ju jaq wiimin tsiiq nai nyam ka jaü wan mang. Kiimaq ju jaq wiimin, khuchü kheani min jaü sam wan mang.

³⁴ Namshiq maiqmii raq asap han, ngi raq i jaq maq jaqsham lata, ngi nai i kongtibi miitu jamlai phan wa rong raa wantlaq kra tiipao laita shongnga wan kai.

³⁵ Ngi raq i jaq sham maq, namshiq ma phanrap lam lu ka tiichhiha kuq kang she. Nashiq raq aheng maq jaqsham shiikut laita, Tati Jesuq raq achongkuq bomtsi kra, nashiq tsan na tiitsang shat maq wepuq wese kra khrum kewan raa tlo nguta chongkuq kang she. Tati Jesuq raq nashiq ma, ‘Ajaüti nam ma aketi ma chochi apa miraq,’ nguta chong kuqto.”

³⁶ Paul raq ara traho bom chongke ara lot raütiishe sanha, apaiq ka tsangshiq rai adam na lakü tsrong maq, hiq na nga raüta achu jaüto.

³⁷ Raüta, apaiq rai kiim riiphea jaq shiikam bom lam maq tsangshiq tarü ka aho she riito.

³⁸ Apaiq raq tsangshiq rai sham ka riichhi nong mang she miraq nguta bom chongkuqtaq kra tai raüta, tsangshiq tsan ka pinthum bito. Kra lot raütiishe, tsangshiq raq apaiq ka laijong na saüli she shea thükito.