Acts 19 - ASII LAKDAP Bible (BSI)

Paul Raq Ephisia Na Trahoto

¹ Apolo ka Korin na sishon, Paul ka Galatia nai Phrigia wang na wawanto. Raüta wangmong binjü thun ka wiita khonli khum wanto. Raüta Ephisia niishe saü wanto. Kiijaq Paul raq Phung maiqsetiim wiijamti riihumto.

² Raüta, apaiq raq tsangshiq ma, “Namshiq raq Phung na shang wan lan akhing na Asii Wenyi ka lap lan sha?” nguta waito. Kiijiishe tsangshiq raq, “Naishiq raq Asii Wenyi asi nguta atai min taimai shaqli la?” nguta apaiq bom ka treto.

³ “Riita ikhiijiika, namshiq raq kham lam wan lan ka jamlai miitu wa lam lan?” nguta Paul raq tsangshiq ma wainongto. “Khamlamketi we Johan raq achongkuq liichum miitu kham lam wan kai” nguta tsangshiq raq apaiq bom ka treto.

⁴ Kiijiishe, Paul raq tre nongto, “Khamlamketi we Johan raq Israilnok ma tsantsii klai wan kham lam wan bomtsi chongkuq wantaq kriika, jurwa ngarai tiidii wan tlaq, kriiti miitu chongkuq wanto. Kiimaq apaiq raq Israilnok ma, apaiq jai na maiq weshi saüho tlaq kriiwe ma kamwan ronglaq nguta chongkuq wanto. Kriiwe ngutlaq ka Jesuq ngo nangnga ngutlo,” ngutiishe tsangshiq ma Paul raq bom ka tru chongkuqto.

⁵ Riita, tsangshiq raq ara bomtsi tru chongkuqtaq ara tai raütiishe, Tati Jesuq mang na kham ka lamto.

⁶ Paul raq ajaq nai maq tsangshiq khu na sham raüta achu jaükuqto. Kiimaq Asii Wenyi ka tsangshiq khum niishe satkito. Krai mren she, tsangshiq ka atse atsaq min tiitai mak phan bom miishe bomtrang hoto. Kiimaq Shiikeawe raq achongkuq tsütsa kra tlü chongkuqto.

⁷ Kiijaq, tsangshiq tlotli ka maiq roqshi ri wenai tin riito.

⁸ Paul ka jipi lü tsam tingkhit sinagok na walili raüta, nokwe ma Shiikeawe bomtsi ka tsangshiq ma achaq awaq maq chong kuqto. Kiimaq tiitho tiipha phanchan chongkuq raüta, tsangshiq tsantsii ka Shiikeawe puk na nyap wan lamphan na tiinin ja wan hajaq nguta pinthum shiikut chaqto.

⁹ Shatmaq, kiiwa nokwe phong wa maiq wiijamti tsantsii ka wanshakshak, tsinhea riito. Kiimaq Paul raq tsütsa chongkuqtlaq kiima kam mak riito. Kiimaq kriiti raq nokwe tarü man na, Tatiwe Lamphan khuthaq na bom ka abi-ati she bomhoto. Kriikha miishe, Paul raq tsangshiq ka miimthüto. Raütiishe, apaiq rai phunainotiim kra sheahoto. Kiimaq ranaiqtek apaiq raq Tiranas raq mungmaiqse pahea tiithung raü raüta trahoke wan chang jamkaü jonghea ashi asi, kra jam maq Shiikeawe lamphan manphan kra phanchan kuq lili riito.

¹⁰ Paul raq mungmaiqse ma akha trahoke wan arka, wiinai na saüli chongkuqto. Apaiq raq atinkhan chongke wan kha maq, Asia wang na siti mungmaiqse Jehudinok phan nai Pongnok phan maiqse tarü raq, Tatiwe tsütsa ka tai wanto.

Sewa Setiim Raq Tha Jobaiq Manto

¹¹ Shiikeawe raq Paul lümaq awang chang jaqsham ka pahea sham wanto.

¹² Paul raq akhupo shat chang samtlaq phaqchetsetiim nai jaqsham lam maq achhü shat chang kheachüsetiim thun kra lamho raü raüta atsi asiti khum na tiiweho kli dongdii min, atsi asi ka tiidoq mra hea tlo. Kiimaq abi shinrii thun ka wiita tsangshiq khum wa juho tlo.

¹³ Kra chhi raütiishe, Jehudinok phong wa maiq wiijamti riimin khumshkhum maq, abi shinrii thun ka maiqse khum wa jobaiqti nguta asi riito. Tsangshiq riimin Jesuq mang ka chong raüta, abi winji ka jobaiq lai nguta manhiito. Tsangshiq raq abi winji kong kiima, “Naishiq raq namshiq ka Paul raq chongtlaq Tati Jesuq mang na jotiikai. Arwe khum wa namshiq ka juho ronglaq,” nguta tha ka jobaiq wan lai nguta tanto.

¹⁴ Ara tha jobaiq lai nguta manhii wantibi ka Sewa setiim tsangshiq siphu wemiishi raq manhiito. Sewa ka Jehudinok Ramwe Ajong Pinthum we riito.

¹⁵ Shatmaq, abi winji raq tsangshiq bom ka akhiishe treto, “Ngi raq Jesuq ka juwa asap ha. Kiimaq Paul ka juwa kriimin asap ha. Shatmaq, namshiq ka ju nguto tiima tlan?” ngutiishe tsangshiq ma bom ka waito.

¹⁶ Krai mren, shinrii raq arom wan we kriiraq tsangshiq ka hak-hot laq-hot she rum buk wanto. Raüta notshotshot bunlak she tiiqbaiqto. Tsangshiq ka kriiwe jam mong maq thawe moho raütiishe, maakaiq chhaq tsangshiq khu akhea kiimin wunthaü riinaü she pintrangto.

¹⁷ Ephisia na siti Jehudinok mungmaiqse wiita raq, kiimaq Pongnok phan mungmaiqse wiita raq ara tsütsa ka ratsa ikhiishe taito. Kra tai raütiishe, tsangshiq tarü ka phiip raq tsaito. Kiimaq Tati Jesuq mang ka kai shreng wanto.

¹⁸ Kra chhi raütiishe phunainotiim phong wa maiq pahea raq, tsangshiq raq kiikhiinok ngarai tang wantaq thun kra, wiita nokwe man na linham linhok mra tiidii wanto.

¹⁹ Maiq pahea raq kra akhing na awuq along, mintin loqle klo chang nai tei awiq tlang chang, kiimaq langlii chang lakdap thun kra nokwe makki na, keathung na lam wan raüta, wa na chaq baiqto. Kra chaq baiq wantaq lakdap thun thii kra wea wan raüta liikiita, kampho kamsii hingroq biingi rii saüto.

²⁰ Atinkhan ningkun aheng maq, Tatiwe tsütsa ka maiq pahea raq tai wan wan she nyam wanto. Raüta, maiq pahea raq Shiikeawe ma kamwan wan she pa wanto.

Ephisia Na Tatso

²¹ Riita arthun sham akai ara kun wan lot jai niishe, Asii Wenyi raq shun shea kha maq, Paul raq kaisia walam miitu bom ka, Mesidonia wang nai Akaia wang binjü maq riita Jerusalem nü niishe miwa wan ha nguta, atsan tsii ka atiinyi wan wishe riito. Krai mren, apaiq raq akha nguto, “Ngi raq arthun maiq mung arjaq wawan jai she ka, ngi ka, Rom chela niimin waraa dongdii she miraq,” ngutiishe apaiq traho bomchong wanhiq khumshiim lam kra thapthi wanto.

²² Apaiq raq kra thimi wantaq krai mren she, apaiq rai jaqsham damti wenai Timothi nai Erastas ka Mesidonia wang niishe tiiwato. Raüta apaiq riiwe ka kra bala Asia wang niili jaqsham haithüto.

²³ Ara chongtiikai akhing bala Ephisia na, Tatiwe Lamphan khuthaq na seng raüta, mungmaiqse liipan na tatso ka jonghea ashi dongto.

²⁴ Kiijaq maiq weshi asi riito. Apaiq mang ka Dimitrias. Apaiq raq jechak phra Artemis shomjam ajong kaü sitlaq kra sumlasetiim ka kampho ngam maq pahea tiiqtlo. Apaiq rai kra sumlasetiim tiiq damti, maiq ka pahea asi. Tsangshiq ma kra sumla piikii ka jonghea ashi. Kra piikiitlaq kiiwa, tsangshiq raq amet ka pahea laptlo.

²⁵ Kriikha miishe, apaiq raq apaiq rai jaqsham damtibi thun kra, kiimaq nanok maiq ahinti thun, Artemis phra shomjam sumla setiim kra tiiq wanti thun kra, wiita adam na triitam hea raüta, tsangshiq ma bom ka akhiishe chongto “Riita. Singmung maiqsetiim lei, namshiq raq asap han. Nashiq arong awin maq sitiikai arka, ara jaqsham tiikai arwa lapkap lailaita rongwin tiikai.

²⁶ Shatmaq, lii rong laq, ümchaü arwe Paul raq, jamlai she wa riiwanta. Kra namshiq tarü raq maiqmii mak maq chhi tlan. Kiimaq maiqmii ni miishe tai tlan. Apaiq raq mungmaiqse ma, maiqse jaq maq ahaihun sumla thun kriika phra kaü ka riimak nguta traho kuqtlo. Raüta, apaiq traho bomchong lümaq, apaiq raq mungmaiqse pahea, ara Ephisia chela na sitibi mungmaiqse phong wa kiimaq Asea wang na siti mungmaiqse tsantsii ka, apaiq bomchong kra dea tengto ngutiishe trap ru wanto. Arka Ephisia na sitibi miili ka riimak, Asea wang na hamli she tiinyam wanto.

²⁷ Riita, ara ümchaü nashiq raq piikii shakho thu tiikai arka, mang ka abi she mirki. Kiimaq, arli min riimak, Phra ajong Artemis shomjam tsaki mang chong jonglu tlaq kriimin, amo she mirwan. Kiimaq ara jechak nyung phra, Asea wang na, kiimaq mangjong tlotli na, apaiq jonglu tsaki tlaq kra nai apaiq shomnoq tlaq kriimin amoli she mirwan!”

²⁸ Kra akhing na kiijaq mungmaiqse thung rai tlaq kriiraq, ara Dimitrias bomchong kra tai raüta sanha, tsangshiq ka walüwa trang ikhiishe khiqtrang wanto. Kiimaq agilülü she, “Ephisia wa Artemis phra nyung kiidea ajong!” ngutiishe gitrang wanto.

²⁹ Kra mungmaiqse brakshaq wantaq tatso wa trang kra nyii rai wan raütiishe, kra chela hamli, shokrap norii niishe tatso walü shapshaü kra nyam wanto. Kra mungmaiqse brakshaq rai wantlaq kriiraq, Paul kongti Mesidonia wangti wenai, Gaias nai Aristarkas ka rangho raüta, mungmaiqse ngongthun chang hiq thung ba kiiniishe, wiithu wiiliiq miishe hit wanto.

³⁰ Paul raq mungmaiqse rütrang rai wan tlaq kiijaq, apaiq min kiraüta bom chongkuq kila nguta danto. Shatmaq, phunainotiim raq apaiq ka tiiki mak shangto.

³¹ Kiimaq, kra wang pengti ajongbi phong wa Paul kongtibi riimin, apaiq ka mungmaiqse riitsam nyiim rai tlaq rung kiijaq apaiq sham ka tiichhikai maimak lii nguta bom ka tiichong kito.

³² Kra liipan niili she, kra mungmaiqse ngongthun riitam nga rai tlaq kriika, tatso miishe jakito. Tsangshiq wiitarü raq, maiqmii nü maq dongrang lishe gitrang wanto. Maiq wiijamti raq phanshi chong raüta gitrang. Kiimaq maiq wiijamti raq hali ka, laihin bom ka chong raüta siitrangto. Bomkhu bommai, atsi atsaq jam min ahü miishe, brak biishaq li she rüriiq trang wanto. Tsangshiq ka jamlai miitu wa ngongthun ngawan tlaq, kra bomkhu bom mai jam min sap mak miili she, nokwe kitlo nguta mokai mokai akirai kha maq, kiikha gitrang rai wanto.

³³ Nokwe phong wa maiq wiijamti raq tiima ka, Alekjendar kra sham tatso niqti we ka nguta tiimato. Kra jamkhano tiima wanta ngukla, Jehudinok raq apaiq ka rung na nokwe khaki na tiichapto. Kiimaq apaiq ka chap raüta, mungmaiqse ma heashi sang rong liishaq nguta bom chongke ma nguta, ajaq ka ra na do raüta, ajaq maq japto. Kiimaq apaiq raq apaiq khum tiichhii bom kra chongla nguta danto.

³⁴ Shatmaq, mungmaiqse raq apaiq ka Jehudinok phan nguta sap raütiishe, tsangshiq tarü raq bomtsi ka poshi kli, “Ephisia wa Artemis phra nyung kiidea ajong!” nguta nari nai tingkhit she gitrangto.

³⁵ Atiisup niishe, kra chela liiwanti chere we kriishe mungphong na chap raüta, mungmaiqse ka tiitsaq lotto. Apaiq raq mungmaiqse ma bom ka akhiishe chongkuq hoto, “Ephisia na siti mungmaiqsetiim lei! Ephisia chelati ka ajong phra Artemis shomjam kra kheti nguta mungmaiqse wiitarü raq asap. Kiimaq ra wa adeaki asii ra longpo kra rümti nguta asap.

³⁶ Krai mren, ara bomtsi arka jurmin arot ma tiija baiq lot mak. Kriikha maq, namshiq ka akaiq she rongliishaq. Kiimaq jamlai phanli jiimin, bomkhu bommai kra sapmai miika, klo maimak.

³⁷ Namshiq raq arwetiim arka ajaq rung na hit wan lan. Shatmaq, tsangshiq raq kra phra shomjam thun wa, jamlai phan hup nai sam min huk wan mak dea. Kiimaq nashiq phra kaü ma abi ati, jamlai phan bombi kiqsü min bom mak dea.

³⁸ Riita, Dimitrias nai apaiq rai jaqsham wandamti raq, maiq ashi ra ma khü akha nyan chang bom asi jiika, kra liike miitu ka, nashiq ma ajong alabi asi. Kiimaq khapho chang rung asi. Kha asi jiika, kra phowebi rung na riipho tsiim chang.

³⁹ Shatmaq, namshiq raq arthaq na chan raüta, archong chang mung kha asi dea nguta tiima tlan jiila, kra kha ka ara chelati mungmaiqse rung kra tiinga raütiishetiq riipho tsiim chang miraq.

⁴⁰ Ümchaü ranaiq arjaq jamlai wa rüriiq lan arka, Roman Hokham we raq nashiq ma mungbrak kha nyan chang na misaü wan. Arjaq ümchaü ümtinkhan wa rüriiq trang lan, arka ajiq tri na misaü wa. Ara miitu ka nashiq kiq khü bom chong chang lam ka ahü,” ngutiishe mungmaiqse ma bom ka chongkuqto.

⁴¹ Apaiq raq ara bomtsi ara chongkuq lot raütiishe, ngongthun nga wantaq kra shiithumto.