Acts 18 - ASII LAKDAP Bible (BSI)

Paul Ka Korin Chela Na Wato

¹ Paul raq Athens chela na trahokuq lot raütiishe, apaiq ka Korin chela niishe wawanto.

² Apaiq raq kiijaq Jehudi we weshi, amang min Akoila ngutlaq kriiwe rai she riihumto. Akoila rawüchhi chang hiqshong ka Pontas wang na. Apaiq ka Roman Hokham we klaudias raq Rom chela na siti Jehudinok thun ka wiita tiijin ra tlo nguta amingke kha maq, tsang-nyung Prisila tsangnai ka Rom maq laükai nye li riito. Paul ka tsangnai rai riihumkai kito.

³ Kiimaq, Paul ka tiip hai chang tombu khea taqtiwe. Raüta kra piikii wan lili raüta phaqsiq wanto. Krai mren sii hali tsangnai kiimin apaiq kiikhiisii hali tombu khea taq raüta piikiiti. Kriikha maq apaiq ka tsangnai rai kongshi maq jaqsham raüta kriimaq tiipao raüta sidamto.

⁴ Apaiq raq Asii Niitiitsak ranaiqtek sinagok na kiraü raüta, Jehudinok nai Griknok rai tsangshiq tsantsii ka tiinin jawan miitu, atsi dada maq traho bomtsi ka chongkuq lili riito.

⁵ Kiimaq Silas nai Timothi ka Mesidonia wang miishe kiijaq saü wan kiita sanha, Paul raq apaiq akhing ka wiita Jehudinok ma Jesuq kiidea Khristo nguta tiitho tiipha traho bom chongke niili she moto.

⁶ Shatmaq, tsangshiq raq apaiq traho bomchong kra tao mak dea, akhii rea lishe khoti riito. Kiimaq apaiq ma abi atili she khoti bom rai wanto. Kra riikiita she, Paul raq, apaiq dü na asam khea na botkhulai akop kra naüshaü shaü raütiishe, tsangshiq ma jainong shung wan, apaiq khum tiihe bom pan akhiishe raikuqto. “Riita, ikhla, ümchaü amiiphat sanha, Shiikeawe raq namshiq tsitsü raü ka chumbaiq raüta tsai han jiila, kriika namshiq maiqmii raa phaq lanta tsai miishe mija! Ngi shrong raa chang ka jam min ahü she. Ümchaü amiiphat, ngi raq namshiq ma chongkuq mang she. Ara tsütsa arka Pongnok phan maiqse miishe michong kuqha!” ngutiishe apaiq raq tsangshiq ma bom ka chongkuqto.

⁷ Krai mren, apaiq raq Jehudinok ka miimthü raütiishe, Pongnok phan maiqse maiq weshi, amang ka Titias Jastas ngutlaq kriiwe phaniishe kihoto. Kriiwe ka Shiikeawe shomnoqti riito. Apaiq jam ka sinagok jam tho niili riito.

⁸ Krispas ka kiijaq sinagok na maiqla weshi riito. Apaiq ka ajamti thun rai adam na Tati Jesuq ma kam wanto. Kiimaq Korin na siti maiq ahinti pahea raq tsütsa ka tai wanto. Raüta kam wanto. Kiimaq tsangshiq raq kham ka lamto.

⁹ Rawashi Paul raq riisham mak maq Tatiwe ka chhito. Tatiwe raq apaiq ma ningkun shoqke bom ka akha chongkuqto, “Ümniika maiq ma akhiismin naqhai songkiq. Shatmaq, traho bom chongke kli shiichaq wan ruq riilaq. Akhiismin naq nungpaq kiq.

¹⁰ Ngi asi. Ngi ka ümniirai nong shnong. Jurmin ümdü na jaqkaiq maq sham lot mak miraq. Kiimaq ara chela na i sengi maiq pahea asi,” nguta Paul ma tsii ka chongkuqto.

¹¹ Krai mren she, Paul ka Korin chela na wiishi ri wiithiq sito. Raüta, kiijaq siti mungmaiqse ma Shiikeawe tsütsa kra shrinkuqto.

¹² Arjai maq, Roman Hokham we raq Gallio ka Akaia wang na wanghupti we ma shongto. Kra akhing niishe Jehudinok ka adam na kiq ri raüta, Paul ka long wanto. Raüta, wanghuptiwe rung na shea wanto.

¹³ Tsangshiq raq, “Arwe kaü raq, mungmaiqse ma thungtri jin raüta, Shiikeawe ka shomnoq chang nguta trahokuqtlo!” nguta wanghupti we rung na shokto.

¹⁴ Kiijiishe Paul raq tsangshiq bom ka treho lashe nguta riinam li she riito. Kiiwa, wanghupti we Gallio raq Jehudinok bom ka treto, “Arwe raq thungtri na ang mak chang mat atsa niq wantaq jiikla, ngi raq namshiq Jehudinok rai riiwaiso chang lamlu ka misi.

¹⁵ Shatmaq, ara chongtlan mra asi nguta ngutlan arka, namshiq nai namshiq liipan na, amang araa ngutlaq, kiimaq namshiq maiqmii thung alai wa bomtsi kra shun lanta, riikhii lea tlan kra bomtsi. Akhnok kha arka ngi raq phokuq mang. Kriika namshiq nai namshiq liipan riipho tsiimho ronglaq!” ngutiishe tsangshiq bom ka treto.

¹⁶ Kra bom kuqtaq krai mren she, apaiq raq tsangshiq ka apaiq rung wa phenlanok ma tiijo baiqto.

¹⁷ Kra riikiitiishe, tsangshiq tarü raq sinagok wa maiqla we Sosthenes ka rangho raüta, wanghupti we rung jamkea maq ninta she tsatto. Shatmaq, Gallio riika akhiismin brorii mak li she riito.

Paul Ka Antiok Na Jangho Nongto

¹⁸ Paul ka kra jai miimin Korin na siti phunainotiim rai rahiq aluwiq hali sithü damto. Raütiishe Prisila nai Akoila rai kongshi maq, Siria wang niishe laijong maq kihoto. Raüta, Kenkrea na saüto. Kenkrea maq mitiidoho shaq na, Paul raq sinkiitiq bomkham athü raükha kra shiikhoi diibaiq miitu akhu ka tiisito.

¹⁹ Raütiishe, kiimaq laijong maq kiho nong raüta hali, tsangshiq ka Ephisia niishe saü hoto. Raüta, Paul raq Prisila nai Akoila ka kiijiili she baiqthüto. Kiijaq apaiq ka sinagok na kiraüta Jehudinok rai traho bomtsi kra chongkuq wan nong raüta, riiphan chan nongto.

²⁰ Kiiwa phunainotiim raq apaiq ka rahiq ashaqpuq khingthü laq nguta tiiwinto. Shatmaq, apaiq ka rahiq alu ka khinglot mak she riito.

²¹ Shatmaq apaiq raq akaiho ma, tsangshiq ma bom ka akha ngutli she chongkuq thiito, “Arka Shiikeawe raq thili. Apaiq raq thi raüka, ngi ka namshiq phana hali mijang wa nong kang.” Kra bomthü raütiishe, apaiq ka Ephisia maq laijong na diito. Raüta kihoto.

²² Raüta, apaiq ka Sisiria chela niishe saühoto. Sisiria miishe apaiq ka Jerusalem na wawanto. Raüta kiijaq phungtuti rai she riihum wanto. Kra miishe hali Siria wang na Antiok na hali wawan nongto.

²³ Kiijaq rahiq ka ashaqpuq sithü nong raütiishe hali, apaiq ka Galatia wang binjü nai Phrigia wang binjü lam maq wawan nongto. Apaiq raq kra wang nai na siti phunainotiim ma kamasham tiijong miitu tsaido jido bomtsi ningkun shoqke wan bomtsi kra chongkuq wanwan she hali wawan nongto.

Apolo Raq Ephisia Nai Korin Na Trahoto

²⁴ Kra bala Jehudi we weshi, amang min Apolo nguta kriiwe ka Ephisia na wato. Apaiq rawüchhi chang hiqshong ka Alekjendria chela. Apaiq ka bom chongke na tsüwe tsitwe ashi. Kiimaq apaiq raq Asii Bomtsi ka tiitho tiipha asap wiq riito.

²⁵ Apaiq ka Tatiwe Lamphan na tsangrakrak maq atrantsii wanwe ashi. Kriikha maq, shon ronkhiq maq Jesuq rilung manphan ka khaqshkhaq maq shrinkuq wanto. Apaiq riika Johan raq achongkuq khamlam kewan tri lamphan kli shrin wanto.

²⁶ Apaiq raq sinagok na achaq awaq maq trahokuqto. Kra wiishe Prisila nai Akoila raq tai raüta, apaiq ka tsangshiq jam na shea wanto. Raüta, tsangnai raq apaiq ma samheawiq miishe hali, Shiikeawe Lamphan tri lam kra tru chongkuqto.

²⁷ Ephisia na trahokuqlot raütiishe, Apolo raq apaiq ka Akaia wang na wachang nguta thapthito. Krai mren she, Ephisia na siti phunainotiim raq Akaia wangti phunainotiim ma, apaiq ka samheawiq maq tao wan raü jaq ahea miraq nguta, lak ashi waiq raüta tiiho wanto. Apaiq ka Akaia wang na saü wan raütiishe, kiijaq siti Shiikeawe lungwiitsii wokhong maq Jesuq ma kamwantiiti ma jaqsham jonghea khrum kuq wanto.

²⁸ Apaiq raq nokwe man na achaq awaq maq traho bom chong ke lam maq, Jehudinok kiq ka tiingii baiqtlii maq khii wanto. Raüta, Asii Bomtsi wa sidi chong raüta, Jesuq kiidea Khristo nguta tri ka kholam kholiiq maq rairai riirii she chongkuqto.