Acts 17 - ASII LAKDAP Bible (BSI)

Theasalonia Maq Tiichamchaoto

¹ Paul nai Silas ka Amphipolis nai Apolonia chela lam maq wawan raüta, Thesalonia chela niishe saü wanto. Kiijaq sinagok ashi asi riito.

² Paul ka rahin jaq akhing na jamkho sinagok na kitlaq kiikha, kra akhing niimin sinagok na kito. Raüta, kiijaq apaiq ka Asii Niitiitsak ranaiqtsam akhing na saüli nokwe ma,

³ Asii lakdap wa phat raü raüta, Khristo ka pinthum chamchao wan chang dongdii. Raütiitiq apaiq ka tsai chang. Raüta, amaa wa dong wan chang nguta, phanrap tiitho tiipha maq nokwe ma traho kuqto. Raüta, “Riita ümchaü ngi raq namshiq ma phanchan tiikang we Jesuq ahata Khristo,” nguta tsangshiq ma trahokuqto.

⁴ Krai mren, mungmaiqse phong wa maiq wiijamti ka Paul raq traho bom chongke kra tai raüta, tengto dea nguta kamwanto. Raüta, tsangshiq ka Paul nai Silas rai kongshi she pong wan damto. Krai mren, jechakre phong wa maiqla nyungre pahea riimin, kiimaq Griknok wa pahea Shiikeawe shomnoq wantibi riimin Paul nai Silas rai kongshi she pong wan damto.

⁵ Shatmaq, Jehudinok raq kra chhi raüta, Paul nai Silas ma ransu ranchang she khiq wanto. Tsangshiq makshu tsi ka nin lot mak she kha maq, tsangshiq raq mangtang maiqse kong pahea pantlat na haiseati kong kra thun ka adam na tiithung raütiishe, tsangshiq min nong shnong miishe, tatso wiinyi makjaq kharong riinam nam she gitrang wanto. Tsangshiq raq chela na siti mungmaiqse thun wiita she tiibrak shaq baiqto. Raüta, Paul nai Silas ka lap raüta, mungmaiqse rung na tiichap wan haijaq nguta, tsangnai rit lam maq, maiq weshi amang min Jason nguta kriiwe jam kriishe long wanto.

⁶ Shatmaq, tsangshiq raq tsangnai ka hum mak dea riito. Kriikha miishe, jamchongti we Jason nai phunainotiim wiijamti ka krun krun she hit-ho raüta, kra chela hupkhang wanti welabi man na hithoto. Raüta, “Arwetiim raq barap binrii na mung wiita brak shaq baiq wanto! Raüta ümchaü ka nashiq chela niishe saü wato.

⁷ Kiimaq tsangshiq saüwa kiita Jason raq apaiq jam na tiijapto. Tsangshiq raq Roman Hokham tri jintlo. Tsangshiq raq Roman Hokham thaq na hokham weshi asi nguta nokwe ma chongkuqtlo. Kriiwe mang ka Jesuq nguta traho kuqtlo,” nguta tsangshiq ka gisii trang wanto.

⁸ Akha tsangshiq raq shapshaü panto. Raüta kra chela na siti mungmaiqse nai munglangti welabi thun wiita she tiimrurang baiqto.

⁹ Kriikha niishe, mung welabi raq Jason nai akongtitiim alap ka atsa raütiishe tiq diibaiqto.

Berea Na Saüto

¹⁰ Kra rajili she, ranyaqto angu niishe, phunainotiim raq Paul nai Silas ka Berea chela niishe sheathü kito. Riita tsangshiq ka Berea na saü wan raüta, sinagok na kito.

¹¹ Riita Berea chela na siti ka Thesalonia na siti nam ma phanshi tsan ka anin linlin riito. Tsangshiq raq Paul nai Silas raq tsütsa chongkuq tlaq kriika sanglili hea maq tsangshiq tsan atsi maq tiitsang taito. Kiimaq ranaiqtek Asii lakdap wa Paul raq chong kuq tlaq bomtsi ka tengtlaq dea sha nguta, tsangshiq raq sidi phat wan lili riito.

¹² Krai mren, tsangshiq phong wa maiq pahea raq kra chongkuq wantaq tsütsa kiima kamwanto. Kiimaq Griknok wa jechakre ajong alabi pahea raq kiimaq Griknok wa maiqwere min pahea raq kamwanto.

¹³ Shatmaq, Thesalonia na siti Jehudinok raq Paul ka Berea niimin Shiikeawe bomtsi ka chongkuq hoto nguta tsütsa ka tai raüta, tsangshiq raq kiijaq hali kinong raüta, mungmaiqse ka shukshaq wan raüta, tiishai baiq nongto. Raüta tatso hali niq nongto.

¹⁴ Kra thohe raütiishe, phunainotiim raq Paul ka khamjong raikii na tiishea thükito. Shatmaq, Silas nai Timothi ka Berea niili khingkito.

¹⁵ Paul thükaiti maiqwere kitaq ka Athens chela na saüli wawan damto. Raüta tsangshiq ka Berea na jang wan nongto. Paul raq Silas nai Timothi raq apaiq ka jaqlo maq mitlo wan li laq nguta bom ka apaiq thüwati ma tiichong wanto.

Paul Raq Athens Chela Na Trahoto

¹⁶ Paul ka Athens chela na Silas nai Timothi khewan nguta hai wanto. Apaiq raq kra chela ka phra sumla phong riili ama kra chhi raüta, atsan mong na piq maq ashuk ikha tsito.

¹⁷ Kriikha maq, apaiq raq sinagok maq Jehudinok rai kiimaq Shiikeawe shomnoqti Pongnok phan maiqse rai riiphan chanto. Kiimaq ranaiqtek kejat thung maq, kiijaq maiq juwa akhum ashiimti achachati kiima trahokuqto.

¹⁸ Kiimahali, Epikuria phung sengibi raq nai Stoik phung sengi shrabi rai min Paul ka manphan bom chong maq riikhettot wanto. Kiimaq tsangshiq phong wa maiq wiijamti riika, “Riita ara barop we arka, jamlai saptsin tiikang nguto tiitsangpii tsantsu rai tla nya?” nguta apaiq ma naikü sherü li riito. Nanok ahinti raq hali ka, “Arwe raq ara pongmungti phra manphan chongphan kuq tlaq ngo chang chang nya?” nguta riibomto. Tsangshiq raq akha riibomtaq arka, Paul raq Jesuq manphan kra nai maiq ka amaa wa dong wan lam bomtsi khuthaq na traho kuq wantlaq kra tai raüta riibomto.

¹⁹ Kriikha maq, tsangshiq raq Paul ka kra chelati ngachang rung Areopagas kiijaq shea wan raüta, akha nguta chongto, “Ümniiraq thunglai anye lamphan chong kuq tlaü kra naishiq raq tairo tiikai.

²⁰ Ümniiraq chong phan kuqtlaü kra naishiq raq tai miika anye tingsang, maiq awing wang rai chong tlaü. Kriikha maq, naishiq raq kra anye thung nai lai kriika, jamlai phan wa, kra sap ro tiikai.”

²¹ (Athens chela na siti hiqshong maiqse nai wanshok wanshati thun wiita riika, jamlai phan wa anye dong tlaq, kra nanok ma chongke manphan riichan maq ngawan roli, kiimaq anye phan nguta dong tlaq kra phan tsütsa kra tai wan roli sitlo.)

²² Krai mren she, Paul raq chela rung na chap raüta akhiishe tra hokuq pha wanto, “Ngi raq namshiq Athens chelati ka kai tsapsaü kapse maq, phanrap phanrii phra sumla shomnoqti siisaq chhi tiikang.

²³ Ngi raq namshiq chela mong na khum lam maq, namshiq phra shomnoq chang chiim hiq ba ka pahea chhi kang. Kra aluchiim bashi na, aluchiim na, ‘Mang Riisap Mai Shiikeawe Ma’ nguta bomtsi ka longpen thaq na atiiwaiq kriimin chhi kang. Riita ija, namshiq raq amang ara min sap man taü miili, jamlai wa shomnoq tlan, kriishe ümchaü ngi raq namshiq ma chongkuq pha na.

²⁴ Shiikeawe ka ara mangjong hiq ara kiimaq ara mangjong hiq raikhü na jamlai phan wa diim tlaq, kra thun kra phansang wanti we. Apaiq ka ra nai hiq ara rümti Tatiwe. Krai mren, apaiq ka maiqse raq jaq maq ahai hun phra shomnoq chang jam thun ahai kuq kiijiika singa mak.

²⁵ Riimak la, apaiq ma phanshi ra rongra tlaq ngo chang chang ikha, maiqse raq jaq maq khrum shanke wan chang lam ka jam min ahü. Ara jamkhano chongtiikang ngukla, apaiq kli maiqse angu tarü ma rilung tsitsü raü chong. Kiimaq miisaq. Kiimaq maiqse ma jamlai phan wa rong raa tlaq kra kewanti.

²⁶ Apaiq raq maiq ka weshi tiiq wanto she. Kiimaq kriiwe lai wiishetiq, maiqphan ka pahea tiipu wanto. Raüta ara mangjong hiq ara hamli niishe tiisi wanto. Tsangshiq ka ümriiba na shongnga chang wa kra, asi anga wan chang jamkhü wiirü thun kriimin, kongkhu miiphü thapthi wanje she tiihong raüta thü wanto.

²⁷ Apaiq raq tsangshiq ma arthun tiihongtha kuq wanli taq arka, tsangshiq raq apaiq ka mirit wan laq nguta phansang kuqto. Kiimaq tsangshiq raq apaiq ka ritwan raüta hum wan raü jaq nguta phansang kuqto. Shatmaq, riikhaqli maq liiwan raüka, Shiikeawe ka nashiq tho niili.

²⁸ Maiq weshi raq akha chongto, ‘Apaiq li tati shaq tsitsü paq. Apaiq ningkun miili nashiq ka atra sitiikai.’ Kiimaq arka ija, namshiq nok shiwe shunwebi riimin la akhiidea chong tlo ahata. Tsangshiq raq chongtlo, ‘Riita ija nashiq minla, apaiq ma asetiim siisaq ngutiidea sitiikai.’

²⁹ Riita ija, nashiq ka Shiikeawe setiim she kha maq, nashiq raq Shiikeawe rong arai ka tsiimwe khiiqwe bi raq nai tiiqwebi raq, jaq maq chaq ngam wa, kampho ngam wa, kiimaq long maq sumla phra haihun tlaq kiikha sham nguta tiima ka raa mak she.

³⁰ Riita, maiqse raq man na lea wantaq pat achat na, Shiikeawe lamphan ka sap wan mak maq siwantaq thun akhing kriika, apaiq raq raüpot kha mak she. Shatmaq, ümchaü ka apaiq raq tsangshiq tarü kunli raq abi ngarai lamphan kiiwa tsantsii klai rongliishe nguta aming ka kuq tlo.

³¹ Ara jamkhano chongtla ngukla, apaiq raq mangjong maiqse kunli kha ka tingting maq phoke wan miitu akhing ranaiqshi ka atiihongthü wishe. Kriika, maiq weshi apaiq raq tsea raüta shongtaq, kriiwe lümaq mipho kuq. Riita, ara chongtlaq arka tengteng dea nguta, maiqse angu tarü ma hakhi tiichhike miitu, apaiq raq kriiwe ka amaa wa tiidong wanto!”

³² Riita Paul raq maiq ka amaa wa dong wan bomtsi chongke kra tsangshiq raq tai raüta sanha, tsangshiq phong wa maiq wiijamti riika, Paul ka anaiküli she riito. Shatmaq, maiq wiijamti riika, “Naishiq ma ara bomtsi arka jangshi ri tiq chongkuq nonglaq,” ngutli treto.

³³ Kra chhi raüta sanha, Paul raq apaiq traho bomchong ka samhea nyaü mak dea riito nguta takto. Kiimaq apaiq ka kra rung wa tiido wanto.

³⁴ Li jiimin, Paul traho bomchong taiti nokwe phong wa, maiqwere wiijamti ka Paul rai she pong wan damto. Kiimaq Paul raq chongkuqtaq tsütsa kiima kamto. Ara kamwantiiti thun phong wiika, maiq weshi Dainosias kiimin riito. Apaiq ka kra rung phung wa wela ashi riito. Kiimahali jechak nyung min ashi riito. Apaiq mang ka Damaris riito. Apaiq kiimin kamwanto. Kiimaq nanok maiq ahinti riimin kamwanto.