Acts 16 - ASII LAKDAP Bible (BSI)

Timothi Ka Paul Nai Silas Rai Wawanto

¹ Kiimaq, Paul ka wawanruq khum wan raüta, Darbi chela niishe saü wanto. Raüta kiimaq Listra chela niishe wawanto. Listra chela na siti Phungmaiqse ashi asi. Apaiq mang ka Timothi. Anyung kiimin Phungmaiqse sii riito. Apaiq ka Jehudi shea. Shatmaq, awe ka Grik phan.

² Listra nai Ikoniam chela na siti phunainotiim tarü ka apaiq mang tsaki wanti siisaq riito.

³ Paul raq Timothi ka apaiq rai shea wan dam ro riito. Kriikha maq, apaiq raq Timothi ma atho ka hankuqto. Apaiq raq kra klo wantaq kriika, kra hong binjü na siti Jehudinok tarü raq Timothi we ka Grik phan nguta asap siisaq kha maq, kloto.

⁴ Tsangnai ka chela rap na khum wan wan wawanto. Raüta, kiimwebi nai phukhu welabi raq, Jerusalem maq thungtri raütu khakuq wantaq kra, phungtuti raq lang chang nguta, tsangshiq ma chekuq wan wan she wawanto.

⁵ Krai mren, phungtuti raq tsangshiq kamasham lamphan na ningkun lap wanto. Kiimaq akam wanti maiqnye kiimin, ranaiqtek pawan ruq li she pawanto.

Tros Maq Paul Raq Rase Bom Taito

⁶ Kiimaq Asii Wenyi raq Asia wang niika trahoke wa naq wa rongkiq nguta tiiwin kha maq, tsangshiq ka Phrigia hong nai Galatia wang heawea binjü lam maq wawanto.

⁷ Tsangshiq ka Maisia wang hiq rai binjü na saü wan raütiishe, Bithinia wang nü kiina wawan haijaq nya ngutiishe danto. Shatmaq, Jesuq Wenyi raq tsangshiq ka tiiwa mak dea, atiiwin riito.

⁸ Kriikha miishe, tsangshiq ka Maisia wang miili she wawanto. Raüta Tros chela niishe saü wanto.

⁹ Kra rawa shaqshaq she, Paul raq rawa na riisham mak maq, Mesidonia wang wa maiq weshi ka, apaiq khaki na chap raüta, “Mesidonia wang na warong ra. Lanta naishiq ara khrum kuqwa rongkiq!” nguta apaiq ma tiipaiqnea bom chongrea chhito.

¹⁰ Paul raq kra riisham bomchong kra chhi raütiishe, arka Shiikeawe raq naishiq ka Mesidonia wang na siti mungmaiqse ma Tsütsa Ahea kra chongke wa miitu she heatlo ngutiishe tak kai. Krai mren, naishiq ka tlothit li she, Mesidonia wang nü na lai maq wawan miitu she tiijeme wan kai.

Philipiati Lidia Phung Na Shangto

¹¹ Laita, naishiq ka Tros chela maq tliitat khamjong lam maq laijong maq konü reko na Samothres chela nü niishe jiiq wan kai. Kiimaq anap ranaiq miika Neapolis chela niishe saü wankai.

¹² Kra miishe, naishiq ka wangmong nü nü na, Philipia chela niishe wawankai. Philipia chela ka Mesidonia wang na apha wan hongti riito. Arka Rom wa alaüki Romannok sichang chela riito. Naishiq ka kiijaq rahiq ashaqpuq hai wankai.

¹³ Asii Niitiitsak ranaiq na naishiq kra chela phai na jürai ashi asi kiina kihokai. Laita, kiijaq Jehudinok achu jaü riitam ngachang bashi asi sham nguta tiima laita kikai. Kiijaq naishiq ka adam na riitam ngakai. Laita, jechakre kiijaq ümchuwa lomdamtaq kiima tsütsa ka chongkuq kai.

¹⁴ Kiijaq naishiq traho bom chongke tai wanti phong wa, jechak nyung ashi ka Lidia riito. Apaiq ka Thajatira chela wa aki rongmin khea piikiiti nyung. Apaiq ka Shiikeawe shomnoqti nyung. Kiimaq, Tati raq apaiq tsan achhü maq, Paul raq traho bom chongkuqtaq kra mitiitsang tai wanlaq nguta atsan tsii kilü ka dikuqto. Krai mren, apaiq raq Jesuq Khristo ma kamto.

¹⁵ Krai mren, apaiq nai ajamtitiim thun raq kham lamto. Kiimaq apaiq raq naishiq ka tsangjam na hea wanto. Raüta, “Riita shra jongwetiim lei, namshiq raq ngi ka riikhaqli Tatiwe ma kamti ashi nguta mangchan tlan jiila, naijam na warong i” nguta hea wanto. Apaiq raq naishiq ka tsangjam na wa raa ma nguta shiichutto.

Philipia Maq Phaqtek Na Shaqto

¹⁶ Ranaiq shi naishiq ka kra achu jaü chang ba kiina akai rai riikai. Kra akhing bala abi winji raq arom wan dise jechakse ashi ka, naishiq rai lam maq riihumto. Apaiq ka thawe shammi langliiti. Langlii raüta rawii shiqwii ji na jamlai phan mrong mra pin wan chang wa sitlaq, kra tiithaimai chongphan kewanti nyung riito. Apaiq raq kiikha lang liikuq raüta, atijong wetiim ma shammi jaq maq kampho pahea lapkuq wanto.

¹⁷ Apaiq raq Paul nai naishiq jai ka, phanshphan maq phan raüta, “Arwetiim arka Ratsan Ramong Nyang Na Siti Shiikeawe Ajong disetiim! Tsangshiq raq namshiq ka jamkha tiichhii wan chang wa kra chongkuqtlo!” nguta agi asii lam maq khumrai wan dam tlo.

¹⁸ Apaiq raq akha tsangshiq shakshaq rea arka, rahiq aluwiq she shakshaq rat wanto. Kriikha niishe, Paul ka atsütsa sihea she riito. Kriikha miishe, apaiq raq jechakse pha nü na lii raüta, apaiq khum wa abi winji ka, “Jesuq Khristo mang maq ngi raq ümniika ara jechakse khum arwa jobaiq tiikang, dongkikiq!” nguta jobaiqto. Krai mren, kra nyung khum wa tha ka kra liipan niili she donghoto.

¹⁹ Kra tha jobaiq tho kra heraütiishe, atijong wetiim raq tsangshiq ma piikii lam ka sukbaiqto she nguta tak raütiishe, tsangshiq raq Paul nai Silas ka khaho tlii, nokwe raq rangho raüta, mungmaiqse khapho chang phowebi rung kiiniishe hit wanto.

²⁰ Raüta, tsangshiq raq tsangnai ka Roman siihiipbi khaki na sheaho raüta, tsangnai ka, “Arwetiim arka Jehudinok phan. Tsangshiq raq nashiq chela na mungmaiqse ka wiita she tiimrurang hoto.

²¹ Tsangshiq raq mungmaiqse ma, nashiq thungtri na ang mak chang thung alai she tlang kuqtlo. Nashiq ka Roman Hokham sengi. Kiimaq nashiq riika, tsangshiq raq jamlai wa tlang kuq tlaq, kra thung nai lai ka lang lot mai,” ngutiishe shra wanto.

²² Kiimaq kra thaq na nokwe riimin, Paul nai Silas ka shra wan damti siisaq she riito. Kra tairaütiishe, kiiwa ajong siihiipbi raq, Paul nai Silas dü wa tsangnai miirii khea ka chaiham chaihea she chai baiqto. Raüta, tsangnai ka chongwai maq phenlanok ma ninta she tiibuksiqto.

²³ Tsangnai ka ninta tiitsea jai she, phaqtek mong niishe tiishaq baiqto. Kiimaq phaqtek kheti we siihiip ma, “Arwe nai ara samhea shaq laq,” nguta ajongbi raq aming ka kuqto.

²⁴ Kra aming ka lap raütiishe, phaqtek kheti siihiip we raq, tsangnai ka khok mong pinthumti khok kiiniishe tiishaq baiqto. Raüta, kra thaq kiijaq hali tsangnai hok na pe kharü alaiq wiq maq tep tiikha baiq raüta shaqto.

²⁵ Shatmaq, rawa, wathung wakham na, Paul nai Silas ka achu jaü, kiimaq ashi ange Shiikeawe tiitsam kam sea she riito. Kiimaq kiijaq phaqtek mong na sitibi shumwi ahinti thun kra riika, tsangnai raq achu jaü nai ashi ange shinge tlaq kra taisea riito.

²⁶ Kra liipan bala niili she, tiihang hiiq miili she hiqjong ka jonghea muraito. Raüta, kra hiqjong mu raq phaqtek rung jamkhü thun kra wiita she tiikam babaiqto. Krai mren, rongkhü kilü thun ka wiita linbaiqto. Kiimaq phaqtek mong na siti, shumwibi hok ajaq na akha kharü raü thun kiimin wiita she apaiq tiidiidii she tiidii kito.

²⁷ Kiijiishe phaqtek kheti we kiimin akon wa tiidopot she samkito. Raüta, liikiita, rongkhü kilü thun ka wiita atlin kaiwi siisaq she chhito. Kra chhi raütiishe, apaiq raq tiima ka, phaqtek na ashaq maiq shumwibi thun kiimin wiita she juto sham nguta tiimato. Kriikha miishe, apaiq raq ajasai kaü ka ahi wa chathit raüta, apaiq nai apaiq ka tiisela nguta danto.

²⁸ Kra chhi raütiishe, Paul raq tiihong raüta, “Ümniiraq ümmiisaq ka naq tan kiq! Naishiq tarü ajaq asi siisaq!” nguta apaiq ma riimto.

²⁹ Kiijiishe phaqtek kheti we raq wa tiinü kuq rong laq nguta chongto. Raüta, Paul nai Silas phana atam alam miishe ju raüta, tsangnai khaki na bumtlii maq, ahok ajaq tiikhai rokrok she, ahaisi phiip raq atsai bumkito.

³⁰ Kra miishe, apaiq raq Paul nai Silas ka kinphai na sheaho raütiishe, tsangnai ma, “Shiilang we nai, riita ngi raq i khum ara tiichhii miitu jamlai phan jaqsham chang wa miraq?” nguta tsangnai ma waito.

³¹ Kiijiishe, tsangnai raq, “Tati Jesuq ma kamlaq. Raüla ümkhum ka michhii kuq. Kiimaq ümjamti thun ka michhii kuq,” nguta apaiq bom ka treto.

³² Kiijiishe, tsangnai raq apaiq ma nai ajamti thun tarü ma, Tatiwe bomtsi ka phanchan kuqto.

³³ Kra rawa akhing kiijiili she phaqtek kheti we raq tsangnai khum wa ami atsi thun kra hetse kuq raüta, phum tsiim kuqto. Kra rawa niili she ajamti thun wiita ma kham lamkuq wantlii she riito.

³⁴ Kra raütiishe, apaiq raq Paul nai Silas ka tsangshiq jam na shea wanto. Raüta, phaq asea tiihong tha kuq raüta tiiphaq siqto. Kiimaq apaiq nai ajamtitiim kunli ka Shiikeawe miishe kamwan kha maq, kai khoqriiq shishiiq she chochi wanto.

³⁵ Anap ranap niishe, Roman siihiip jongbi raq peta siihiipbi ma, “Tsangnai ka phaqtek mong wa adong she mirho laq,” nguta tiichong kito.

³⁶ Krai mren, phaqtek kheti we raq, Paul ma, “Siihiip jongbi raq namnai ka phaqtek mong wa dongho rongliishe nguta aming kuqto. Riita, ümchaü min namnai ka khu asang maq khum wan ronglaq,” nguta tiitai chongkuqto.

³⁷ Shatmaq, Paul raq peta siihiipbi ma chongto, “Nainai ka jamlai shutphit min ahü shatmaq, rung na mungmaiqse makki na chongwai maq tiitsatto. Kra thaq niimin, nainai ka Roman hokham sengi chiisan maiqse! Shatmaq, tsangshiq raq nainai ka phaqtek mong na shaq baiqto. Riita, ümchaütiq sha tsangshiq raq nainai ka ahukse ma tiidong baiq dan tla! Kriika riimak! Roman siihiipbi raq tsangshiq maiqmii jaq maq nainai ara mitiidongki liina,” nguta Paul raq tsangshiq ma chongto.

³⁸ Krai mren, peta siihiipbi raq ara tsütsa ka Roman siihiipbi ma tiitai kuqto. Riita tsangshiq raq Paul nai Silas ka Roman hokham sengi chiisan maiqse nguta tai raüta, tsangshiq ka tsanghaisi liishe riito.

³⁹ Kriikha maq, Roman siihiipbi ka kiraüta, Paul nai Silas ma bom tiijang chongkuqto. Raüta tsangshiq raq tsangnai ka phaqtek mong wiishe tiidong diibaiqto. Raüta, kra chela maq ahin niishe wawan ronglaq nguta bom ka chong kuqto.

⁴⁰ Kiimaq, Paul nai Silas ka phaqtek mong wa dong wan raütiishe, Lidia jam na wato. Kiijaq phunainotiim rai riihumto. Raüta, tsangshiq ma tsaido jido bomtsi chongkuq thü raütiishe, tsangnai ka kra chela maq ahin niishe tiido wanto.