Acts 15 - ASII LAKDAP Bible (BSI)

Jerusalem Na Ngongthun

¹ Maiq wiijamti Judia wang wa Antiok na waraüta, phunainotiim ma traho bomtsi ka akha shrinkuqto, “Namshiq raq Mosheq Thungtri na chongtlaq kra phan phan, athohan poi ka lang man wiiwii, Shiikeawe raq nam khum ka tiichhii kuq mak miraq.”

² Paul nai Barnabas ka tsangshiq rai ara bomtsi khuthaq na, pinthum achaq awaq maq riikhiito. Kriikha miishe, ikhla Paul nai Barnabas rai Antiok phungtu wa maiqlare wiijam ka Jerusalem na kilanta kiimwebi nai maiqlare rai bom ka riiwaiki rongkiq ngutiishe bom ka riichongto.

³ Tsangshiq ka phungtuti raq tiikito. Tsangshiq ka akai lam maq, Phonesia nai Samaria wang lam maq kihoto. Kiimaq tsangshiq ma Pongnok phan raq Shiikeawe ma kamwantaq tsütsa kra tiitai chongkuq hoto. Kra tsütsa ka tairaüta, phunainotiim kunli ka kai khoqriiqto.

⁴ Tsangshiq ka Jerusalem niishe saüki kiita, phungtuti raq nai kiimwebi raq kiimaq maiqlare raq khoqriiq shishiiq miishe taoto. Kiimaq Shiikeawe raq tsangshiq lümaq ümtinkhan wa jaq shamtaq, kra tsütsa ka tsangshiq ma tiitai chongphan kuqto.

⁵ Shatmaq, Phorisinok phong wa, kamasham maiqsetiim maiq wiijamti raq, chap raüta, “Pongnok phan riimin athohan poi nai Mosheq Thungtri ka lang raa dongdii” nguta tsangshiq kiq ka khiito.

⁶ Krai mren she, kiimwebi nai maiqlare ka adam nga raüta, ara bomtsi khuthaq na bom ka riichong phanto.

⁷ Tsangshiq raq ara bomtsi khuthaq na luhea riichong phan wan lot jai she, Petar ka chap raüta, akhiishe phanchan kuq hoto, “Phunainotiim lei, i nübok maq achongkuq wan ha Tsütsa Ahea kra Pongnok phan raq mitai wan laq, raüta mikam wan laq nguta, Shiikeawe raq ngi ka nashiq phong wa aphaji niiphü tseato ngutiika namshiq raq asap han siisaq.

⁸ Kiimaq, maiqse loweatek tiima tsantsii kra khonti we Shiikeawe raq, tsangshiq kiimin apaiq puk na nyap wan miitu kilü ka dikuq wanto she. Raüta, nashiq ma jamkho kuqtaq kiikhiisii hali, tsangshiq miimin Asii Wenyi ka kuqto.

⁹ Shiikeawe raq nashiq nok nai tsangshiq nok liipan na, jam lai min tiikhothiq mak dea. Tsangshiq raq Shiikeawe ma kamto. Krai mren apaiq raq tsangshiq ngarai ka diikuqto.

¹⁰ Riita, ümchaü min namshiq raq Pongnok phan kamasham maiqse ma, natitiim raq nai ümchaü nashiq riimin holot mai homa ka tiihokuq rong i ngutiika, jamkho tiima tlan. Kra homa ka tiihokuq laita, Shiikeawe ka jaram niqsiq wa?

¹¹ Kiikhiika riimak. Nashiq ka Tati Jesuq ma kamwan kai krai mren, apaiq kaphap mangchan lümaq tiichhii kuqto. Kiikhiisii hali, tsangshiq kiimin tiichhii kuqto,” nguta Petar raq tsangshiq ma chongkuqto.

¹² Krai mren, Barnabas nai Paul raq tsangnai lümaq, Shiikeawe raq Pongnok phan maiqse ma ümtinkhan wa awang chang nai amao chang jaqsham kuqtaq, kra tsütsa ka tiitai phanchan chongkuq wan kiita, ngongthunti kiimwebi nai phukhu welabi thun tarü raq bom ka sanglili maq tiitsang taito.

¹³ Tsangnai raq nokwe ma bom chongke kra lot ri she, Jakob ka ngongwebi man na chap raüta, akhiishe hali bom ka chongkuq nongto. “Phunainotiim lei, ngi chongpha, tai ronglaq!

¹⁴ Ümchaü namshiq tarü nitai na Simon raq chong phan kuqtaq kra bomtsi ka tai wan kaishe. Riita, Shiikeawe raq Pongnok phan maiqse ka apaiq wura maq kongkhu tiiham wanto she. Raüta, tsangshiq ka asengi miishe tsea wanto.

¹⁵ Ara bomtsi arka, shammibi raq achongthü bomkham kra ümchaü ara riichong tiikai tri arjaq riikhaqli she kuwanto chhi tiikai. Asii bomtsi na bom ka akha chongtlo,

¹⁶ ‘Rawiichii ji na ngi ka mijang kinong ha, nguta Tati raq chongtlo. Lata Dawit mungtan ka mijang kuq wan ha. Ngi raq apaiq jam riim ka mitiihea haikuq wan ha. Lata tere rü ajong ikhiishe mitiija wan ha.

¹⁷ Krai mren, mangjong maiqse kunli ka, i wokhong niishe mirtam wan. Pongnok phan maiqse kunli, ngi raq i sengi miishe hea wankang.

¹⁸ Riita ija arka Tati apaiq bomchong. Arka rathup rapha niiphü achongthü.’

¹⁹ Kra ngu raüta Jakob raq bom ka akhiishe shat wanto, “Riita ija, ara chong tiikai arkha maq, nashiq raq Pongnok phan maiqse wa, maiq ümchuwa Shiikeawe puk na nyap wan tlaq, tsangshiq wawan chang lam na, nashiq raq tiibanbi mai nguraü jiika ahea miraq nguta, ngi raq tiima tiikang.

²⁰ Kra rii na khoti, nashiq raq tsangshiq ma lak li ashi waiq laita tiiho wan rong i. Lak na tsangshiq ma, aphaq asea chang phan, phra sumla ma honglu na akuq phan kriika ashe. Kriika aphaq asea maimak. Kiimaq tsangshiq raq sethoq sepii ngarai klo maimak. Kiimaq tiijai tiidong baiqhü maq, abuq maq tiishak raüta atsat ngam ka phaqsea maimak she. Lo tiijai angu ka naq phaq siq rongkiq she, nguta waiqke chang.

²¹ Ara jamkhano chongtiikai ngukla, Mosheq Thungtri bomtsi ka pat-achat miiphü Asii Niitiitsak ranaiqtek sinagok na phatkuq wan ruq kata. Kiimaq Mosheq bomchong kra chelatek na nokmaiqse ma phanchan kuq wan ruq riitlo,” nguta Jakob raq bom ka chongkuqto.

Pongnok Phan Phungmaiqse Ma Atiiwan Lak

²² Kra riichongtaq krai mren she, kiimwebi nai maiqlare ka phungtuti tlotli rai adam maq kiqri raütiishe, tsangshiq phong wa maiq wiijamti kra tsea raüta, Paul nai Barnabas rai Antiok phungtuti rai riihum wa chang miraq ngutiishe, bom ka shatto. Krai mren she, tsangshiq kamasham maiqse wiitarü raq shreng tlaq maiqla wenai kriishe tseato. Tsangnai wenai wa weshi mang ka Barsabas. Apaiq ka Judas ngutiimin ngutlo. Kiimaq weshi mang ka Silas. Apaiq kriiri tseato.

²³ Raüta tsangshiq raq ara lak ara Antiok na siti phungmaiqsetiim ma waiqto. Raüta Judas nai Silas ma tiiho wanto. Lak ka akha waiqto: “Naishiq kiimwebi nai maiqlare, namshiq ma phunainotiim raq, namshiq Pongnok phan maiqse lungwii phunainotiim, Antiok chela na kiimaq Siria nai Silisia wang na siti tlotli ma salam bomtsi tiitai wan tiikai.

²⁴ Naishiq phong wa maiq wiijamti ka, kiina namshiq phana wato nguta tsütsa ka tai kai. Raüta, tsangshiq traho bom chongke lümaq, namshiq ka kamasham lamphan na trang ra wan tlo, kiimaq namshiq kamtsantsii ka runbaiq wantlo nguta tsütsa ka tai kai. Naishiq raq tsangshiq ka namshiq ma kiikha bom asa chongphan kuq wa rongkiq ngutiika thaü mai dea.

²⁵ Kriikha miishe, naishiq tarü ka adam maq kiqri laitiishe, namshiq ma tsütsa kra chongke wa miitu maiq she tsea kai. Laita tsangshiq ka ara lungwii phuno wenai Barnabas nai Paul rai kongshi miishe tiiwa dam tiikai.

²⁶ Tsangnai ka atsai ma kham raüta Tati Jesuq Khristo jaqshamti jaqshi senai.

²⁷ Riita, ija ümchaü min, ara chong tiikai arai mren, naishiq raq namshiq phana Judas nai Silas ka tiiwa tiikai. Tsangnai raq namshiq ma mantut na nga raüta, ara lak na waiq wan kai bom raü thun kra michong kuq.

²⁸ Asii Wenyi rai naishiq ka kiq ri wan laita, namshiq ma ara akhek bomtsi tri ponai potsam ara chan raüta, ahin holai ka namshiq ma tiihomai:

²⁹ Sumla phra noq ma akuq aphaq asea chang phan ka naq phaq siq rongkiq she. Kiimaq, ngam tiijai kiimin naq phaq siq rongkiq she. Kiimaq abuq na atiishak, tiijai tiidong baiqhü maq atsat ngam ka naq phaq siq rongkiq she. Kiimaq sethoq sepii ngarai naq tang rongkiq she. Arthun ara namshiq raq pen wan han jiika, namshiq ma ahea miraq. Naishiq raq namshiq miitu phumram khamkok toshat.”

³⁰ Krai mren she, kra lak kewatibi ka Antiok na wawanto. Raüta Antiok chela na saüto. Raütiishe, kiijaq siti phungtuti ka tarü, adam na triitam heato. Raüta kra lak ka tsangshiq jaq na kuqto.

³¹ Tsangshiq raq kra lak ka phatto. Krai mren, kiijaq tsaido jido bomchong tsütsa waiq wantaq kra tai raüta, tsangshiq ka kai khoqriiq shishiiq she riito.

³² Kiimaq Judas nai Silas tsangnai wenai kiimin shammi sii riito. Krai mren, tsangnai ka tsangshiq rai rahiq ashaqpuq sithü damto. Raüta, tsangshiq ma kamasham na tsaido jido ningkun shoqke wan bomtsi pahea chongphan kuqto.

³³ Tsangshiq ka kiijaq rahiq ashaqpuq tsangshiq rai sithü jai miishe, kiijaq siti phunainotiim raq kiim riiphea ramram bomtsi chongkuq raütiishe, tsangnai ka tsangshiq tiiwati phana hali she khu asang maq tiijangho nongto.

³⁴ Shatmaq Silas ka kiijaqli misiha nguta khingkito.

³⁵ Paul nai Barnabas ka Antiok na rahiq ashaqpuq sithü damto. Raüta, nanok maiq ahintibi rai kongshi maq, Tatiwe bomtsi ka tsangshiq ma shrinkuq wanto. Kiimaq trahokuq wanto.

Paul Nai Barnabas Kongnai Niishe Riipheato

³⁶ Kiimaq kra jai maq ashaqpuq siraütiishe, Paul raq Barnabas ma, “Man na nanai raq Tatiwe Tsütsa chongkuq wakai, naphu nano chelatek na sitibi thun ira, ümchaü tsangshiq ka kamasham na jamkhiiwa sitla kra, liiwa nong i,” nguta chongto.

³⁷ Riita, Barnabas riika Johan Makaq kiimin tsangnai rai traho wa wanhiq na shea wan nongro riito.

³⁸ Shatmaq, Paul miika Johan Makaq shea wan dam kriika mitsi mak she riikito. Kra jamkhano ngukla, kongkhu lak na apaiq ka tsangnai rai traho bomchong wadam nguta wanhiq na wadam raüta, wanhiq khum jaqsham kra minyi shaq niili, apaiq ka lamkampii maq, Pamphilia wang na tsangnai ka miimthü raütiishe jai na janghoto.

³⁹ Kriikha miishe, tsangnai liipan na kiq ka atsin miishe riikhii raito. Raütiishe, tsangnai ka traho bom chongke wa ka kongnai niishe riipheato. Raütiishe, Barnabas ka Johan Makaq shea wan raüta, lai maq Saipras mung niishe wawanto.

⁴⁰ Kiimaq Paul riika, Silas kra shea wan raütiishe, traho wa wanhiq na wawanto. Phunainotiim raq tsangshiq kongnai wiita ka Tati kaphap wokhong na kiinong kuq raüta, Shiikeawe jaqsham wa miitu tiiwa nongto.

⁴¹ Krai mren, Paul ka Silas shea wan raüta, Siria wang nai Silisia wang lam maq wawanto. Kra wangnai na siti phungtutitiim ma kamasham lamphan na, tsaido jido ningkun shoqke wan bomtsi pahea chongkuq wanwan miishe wawanto.