Acts 14 - ASII LAKDAP Bible (BSI)

Ikoniam Na Traho

¹ Kra niq riri sii hali, Ikoniam chela niimin riito. Paul nai Barnabas ka sinagok na wa raüta, achaq awaq maq Tsütsa Ahea kra chongkuqto. Krai mren, Jehudinok phong wa nai Pongnok phan maiqse phong wa maiq pahea raq Tatiwe ma kamwanto.

² Shatmaq, Jehudinok phong wa maiq wiijamti Jesuq ma kamwan makti raq, Pongnok phan maiqse ma raikao tat raüta, phungmaiqsetiim khuthaq na tiishuk shaqto.

³ Kiimwe nai ka kiijaq rahiq luhea sito. Raüta, Tatiwe tsütsa ka achaq awaq maq nokmaiqse ma chongkuqto. Krai mren, tsangnai raq Tatiwe kaphap mangchan bomchong tlaq kriika, tengteng dea chongtlo nguta atai wantibi ma tiichhike wan miitu, Tatiwe raq tsangnai ma awang chang nai amao chang jaqsham miitu ningkun jonghea kuqto.

⁴ Riita, kra chhi raütiishe kra chela na siti mungmaiqse ka atiikho she riikito. Maiq wiijamti riika Jehudinok rai kiqshi maq pong damto. Kiimaq maiq wiijamti ka kiimwe nai rai kiqshi miishe pong wan damto.

⁵ Kiijiishe sanha, Pongnok phan maiqse wiijamti nai Jehudinok ka adam na kiqshi miishe ri wan raüta, tsangshiq nok welabi rai she riichongto. Raüta, kiimwe nai kriika atsea baiq chang, kiimaq long maq tiiqbaiq chang ngutiishe bom ka riiphoto.

⁶ Riita, kra mat raü shun bom riichong wantaq kriika, kiimwe nai riishe tho ka heto. Raütiishe, tsangshiq ka Ikoniam wang na Listra nai Darbi chela kiimaq kra tro binjü niishe juhoto.

⁷ Raütiishe, kra binjü thun kiiniishe tsangnai raq Tati Jesuq Tsütsa Ahea kra chongkuqto.

Listra Nai Darbi Na Trahoto

⁸ Listra chela na siti maiq weshi ka anyung pukdong hokkü. Apaiq ka ari lung na jangshi min akhum nguta man lot mak dongdii.

⁹ Apaiq kiimin kiijaq nga raüta, Paul raq traho bom chongkuqtlaq kra tsangrakrak hea maq tiitsang taito. Kriiwe ka Paul raq chhito. Kiimaq apaiq raq Shiikeawe bomtsi ma kamtlo ngutiishe apaiq tho ka heto. Krai mren, apaiq tsi kiimin miheaki nguta sap raütiishe, apaiq raq atsiti we ka tiqtiq liito.

¹⁰ Raüta kiqhang ajong maq, “Tiidolaq, laüta rusan chaplaq!” nguta thaüto. Kra tai raüta, kriiwe ka tiidopot chap hiiq she riito. Raüta, aphe aphiiq, adoq haha she, kra tro niishe aheawiq, maiqhea hongkükü she khum hoto.

¹¹ Kiijaq mungmaiqse riiphong rai tlaq kra raq, Paul raq atsiti we tiiheake jaqshamtaq kra chhi raüta, tsangshiq ka tsangshiq nok Likonia bom maq, agi asii wa trang liishe, “Notsam arka rakaü hiq we phra thun ka ara maiqse khum na poki raüta, ümchaü nashiq pha niishe ra wa saükito!” ngutiishe siitrangto.

¹² Tsangshiq raq Barnabas ka Jaias kiimaq Paul ka Harmes nguta mangto. Paul ka lamsheati we kha maq, tsangshiq raq akha nguta mangto.

¹³ Kiimaq Jaias phra shomjam ka kra chela phai niili riito. Krai mren, Jaias phra ramwe we raq minsaü saüpong wetiim nai pepü tu thun ka, kra kilam chong tho kiiniishe tlam wanto. Kriika, tsangshiq raq kiimwe nai kra shomnoq, honglu na take ma ngutiishe lam wanto.

¹⁴ Kra tiihongtha nguta mungmaiqse ka riishun nyiim rai tlaq kra Paul nai Barnabas riishe tho ka heto. Raütiishe, tsangnai raq tsangnai dü na asam khea ka chaihea hea raütiishe, tsangshiq phong mong kiina juraüta, tsangshiq nangnga akha riikhiq ngarai ka naq tang rongkiq nguta, agi asii lam miishe, jaqkhaü jinaü raüta, tsangshiq ka akha ngutiishe tiiwinto.

¹⁵ “Namshiq raq ara jamlai ngarai wa tangho lan? Naishiq arka namshiq kiikha maiqse siili! Naishiq ka arjaq namshiq ma Tsütsa Ahea tiitaike wa nguta wakai. Namshiq ka ara thiihü sumla phra shomnoq lam phan tlan arwa, atra Shiikeawe ra nai hiq kiimaq sammoktra jü kra phansang wantiwe kiimaq ra nai hiq na phanrap diim tlaq kra tiiqti we Shiikeawe wokhong niishe shang wan tlo ronglaq, nguta tsütsa chongke wa tiina wakai.

¹⁶ Richü pat na Shiikeawe raq mangjong maiqse ka tsangshiq tsantsii na jamlai phan shomnoq raüwa ahea nguta tiima tlaq, kra phan phan, phanrap phanrii tiishom noq wanto.

¹⁷ Li jiimin, Shiikeawe raq apaiq ka asi dea nguta sap wan miitu she, athuk atsom jaqsham pahea sham raüta, tsangshiq ma tiichhikuq wantlo. Apaiq raq namshiq ma rajun akhing khaqkhaq na tiijun kuqtlo. Raüta, namshiq ma tü atsam ka rahiq jipi akhing khaqkhaq na tiidong man kuqtlo. Apaiq raq namshiq ka, aphe arong maq, wok phetaktak maq si miitu tii-adung chamtraq kuqphaq siq tlo. Krai mren, namshiq ka wok phetaktak hea maq chojong chise shongnga lanta sitlan,” ngutiishe tsangshiq ma traho kuqto.

¹⁸ Kiimwe nai raq atinkhan bom chongke wan jai miimin, tsangnai ma honglu takeho wa, mungmaiqse tsan ka la miitiq she tiikhing lotto.

¹⁹ Kra akhing na, Pisidia wang wa Antiok chela na siti nai Ikoniam chela na siti Jehudinok maiq wiijamti raq, Paul nai Barnabas ka kiijaq hali johoto nongto. Raüta, tsangshiq raq mungmaiqse ka tsangshiq bom niishe hali shiijon nongto. Raütiishe, tsangshiq raq Paul ka long maq tiitiiq baiqto. Raüta apaiq ka tsaikito she sham nguta tiima raüta, chela phai niishe hitthü baiq kito.

²⁰ Shatmaq, apaiq tro na phungmaiqsetiim ka adam na riitam raüta kheto. Kiijiishe, Paul ka sam wan raüta, tiidopot chap hiiq she chap wato. Raüta, kra chela na hali wawan nongto. Kiimaq anap ranaiq miishe Paul nai Barnabas ka Darbi chela niishe kihoto.

Siria Wang Na Antiok Na Jangto

²¹ Paul nai Barnabas raq Tsütsa Ahea ka Darbi chela na chongkuqto. Krai mren, maiq pahea Jesuq puk na nyapto. Kra miishe tsangshiq ka Listra, Ikoniam, kiimaq Pisidia wang na Antiok chela niishe jang wan nongto.

²² Tsangshiq raq phungmaiqsetiim ma tsangshiq kamasham rang ka samhea apha maq tiicham wan miitu bom she chongkuq wanto. Kiimaq Jesuq ma kamwan tsantsii ka pharangrang maq rüm ronglaq nguta tsaido jido bom akha tsii chongkuqto. “Nashiq ka chamchao litkot walü pahea lea wan laitiitiq Shiikeawe mungtan na saü wan chang,” nguta trahokuqto.

²³ Tsangshiq raq phungtutek na, ashun asheati maiqlare thun kra shong thüto. Kiimaq amang maq achu jaü raüta, tsangshiq ka tsangshiq raq kamwantlaq Tatiwe jaq khong na kiinong kuqto.

²⁴ Tsangshiq ka Pisidia wang binjü na khumlot raütiishe, Pamphilia wang niishe saühoto.

²⁵ Kra wang na Parga chela na nokmaiqse ma tsütsa ka chongkuqto. Raüta Atalia chela niishe kihoto.

²⁶ Kra chela miishe tsangshiq ka laijong maq tsangshiq tiiwa chang hiqshong Antiok chela niishe hali jangho nongto. Kra chela maq tsangshiq ka Shiikeawe kaphap wokhong na likuq raüta, Shiikeawe jaqsham wa miitu tiiwato. Krai mren, tsangshiq raq jaqsham ka tiinyi li shamto.

²⁷ Tsangshiq ka Antiok na saü raütiishe, tsangshiq raq phungtuti wiitarü ka adam na triitam raüta, Shiikeawe raq tsangshiq lümaq, apaiq jaqsham ka ümtinkhan jonglu wa shamtaq, kiimaq Pongnok phan maiqse miimin, Shiikeawe raq apaiq ma kam wan miitu, lamlu ka jamkho dikuqtaq, kra thun tsütsa ka wiita phanchan chongkuqto.

²⁸ Kiimaq tsangshiq ka kra hiq na phunainotiim rai rahiq luhea sithü damto.