Acts 13 - ASII LAKDAP Bible (BSI)

Barnabas Nai Saul Trahoke Miitu Shongto

¹ Antiok phungtu na trahoke wanti shammibi nai kamasham bomtsi shrinketibi maiq ka asi riito. Tsangshiq ka Barnabas, Simon (Maiq nyaq we ngutlo), Lusia (Sairini mung wa), Manael (apaiq ka wanghupti we Herod raq atiijong lu wan), kiimaq Saul.

² Tsangshiq ka Shiikeawe shomnoq, amang maq achu jaü sitlaq liipan na, “Barnabas nai Saul ka ngi miitu pong na raithü ronglaq. Tsangnai ka i jaq sham miitu, ngi raq ashong kun she,” nguta Asii Wenyi raq tsangshiq ma chongkuqto.

³ Krai mren she, tsangshiq raq amang maq achu jaüto. Raüta, tsangnai dü na jaq maq sham raüta achu jaükuqto. Raütiishe, tsangnai ka traho jaqsham wa miitu wanhiq na tiiwato.

Saipras Mung Na Trahoto

⁴ Asii Wenyi raq tsangnai ka traho jaqsham wa tiiwato. Krai mren, Barnabas nai Saul ka Antiok maq riita, Silisia na wato. Kra miishe, khamjong mong na sitlaq Saipras mung kiiniishe laijong maq wawanto.

⁵ Tsangnai ka Saipras mung na Salamis hiq niishe saü wanto. Raüta, Shiikeawe bomtsi ka sinagok na chongkuq wanto. Tsangnai rai jaqsham na bomtre damti ka Johan Makaq wadamto.

⁶ Tsangshiq ka khamjong mung hiq kra konü siim na Paphos chela sitlaq kiina leaphok jojuju wawanto. Kiijaq tsangshiq raq mintin we ashi riihumto. Apaiq ka Jehudinok phan. Apaiq mang ka Bar Jesuq. Apaiq ka arot shammi we.

⁷ Apaiq ka khamjong mung hiq rümti wanghupti we Sargias Paulas kongti we. Sargias Paulas ka phaqchi maiqse. Wanghupti we raq Shiikeawe bomtsi kra tai ma nguta, Barnabas nai Saul ka apaiq jam na tiihea kito.

⁸ Shatmaq, tsangshiq bomchong ka mintin we Elmas (Bar Jesuq ka Grik mang maq Elmas ngutlo) raq wanghupti we ka Jesuq ma kamwan wa shang baiq hajaq nguta tiibanbito.

⁹ Kiijiishe, Saul, apaiq ka nanok raq Paul ngutiimin ngutlo, apaiq ka Asii Wenyi raq arom wan ningkun ama maq siti kriiraq, kra mintin we ka, atheaphi na tiqtiq liito.

¹⁰ Raütiishe, Paul raq mintin we ka akhiishe sonto, “Ümnaq arka Tha Kaü ashi! Ümnaq arka ating arai jaqsham thun kra tangta baiqti we. Ümtsantsii ka abi thiikho. Kiimaq ümniiraq Tatiwe tengteng bomtsi kra, arot akiq ma tiija baiq wan kli tiima tlaü!

¹¹ Riita, ümchaü min, Tatiwe manson ka ümdü niishe mini wan kiiphaü. Ümmak ka achuk she mirki. Shiikeawe akhing mihong wan shaq wiiwii, makchuk lishe misi haü.” Krai mren, tiihanghiiq miili she, Elmas raq amak na ranyaq riitangli, pang wan saq pang wan kra sapto. Kiimaq apaiq ka phiim shiiphiim she, maiq weshi ra raq apaiq ka ajaq maq hit raüta, shunshea kuq raü jaq nguta, phangli phiimli she wawanto.

¹² Kra chhi raütiishe, Wanghupti we ka Shiikeawe ma kamwanto. Apaiq raq Tatiwe tsütsa bom chongke kra chhi tai raüta, pinthum amao riito.

Pisidia Hong Wa Antiok Chela Na Wato

¹³ Paul nai akongtitiim ka Paphos maq, laijong maq wawan raüta, Pamphilia hong wa, Parga chela niishe saü wanto. Parga chela maq Johan Makaq ka, tsangnai baiqthü raüta, Jerusalem na hali jangho nongto.

¹⁴ Tsangnai ka Parga maq wawan raüta, Pisidia hong na Antiok chela niishe saü wanto. Raüta, Asii Niitiitsak ranaiq ka sinagok na kito. Raüta ngaki damto.

¹⁵ Mosheq Thungtri lakdap wa nai Shammibi lakdap wa phat wan jai miishe, sinagok liiwanti maiqlare raq, tsangnai ma, “Phuno we nai, namnai raq tsaido jido bomtsi chongke chang tsishi ra asi jiila, nokwe ngatlaq arma chongke miitu akhing asi miraq,” nguta bom ka tiiwaito.

¹⁶ Krai mren, Paul ka chapto. Raüta ajaq ka ra na do raüta, tsangshiq ma sanglili maq tai ronglaq nguta akhiishe trahokuq phahoto: “Israilnok nai Shiikeawe ma haisong tsantsii thü wanti Pongnok phan maiqsetiim lei. Ngi chongpha, tairong laq.

¹⁷ Israilnok Shiikeawe raq natitiim pat na, tsangshiq ka tsea tsiiq wanto. Raüta, tsangshiq ka Ejip mung na wansha we ma ja raüta shong wantaq pat na, maiq mung ajong ashi ma tiijonglu wanto. Raüta, Shiikeawe raq tsangshiq ka Ejip mung wa, ningkun ajong jaqkhong maq tiidong tsuq wanto.

¹⁸ Raüta, Shiikeawe raq tsangshiq ka kumtsaiphii maq nosere kong ikha rawii wiiroqblai dunghiq wan raüta tiijong lu wanto.

¹⁹ Apaiq raq Kanan mung wa, maiq mung mung miishi shiithen baiq wanto. Raüta, Kanan mung ka asengi miishe jiikuq wanto.

²⁰ Riita, ara chongtiikai maiqpat lea wantaq thun arka, rawii shiblai ri wiiroq biingi tin khan lea wanto. “Arjai miishe hali, apaiq raq tsangshiq ma shammiwe Samuel pat na saüli, phowebi she shong wan raüta, phowebi lümaq mung ka peng wanto.

²¹ Kiimaq kra jai miishe, tsangshiq raq mung peng wan miitu hokham shongke raa tlo ngutiishe, Shiikeawe jaq wa jaü wanto. Krai mren, Shiikeawe raq tsangshiq ma Kush se Saul, Benjamin weraü wa kriishe mung peng wan miitu tsangshiq hokham we miishe shongkuqto. Apaiq raq munglang wan hokham jaqsham wan ka wiiroqblai sham wanto.

²² Shiikeawe raq apaiq ka hokham ngachang wa tiisat baiq raüta, Dawit she hokham ma shongto. Shiikeawe raq Dawit khuthaq na, ‘Ngi raq i tsan mong na jamlai wa lungwii tiikang, kra phanphan ngi ma mitsito li chang jaqsham kewanti ka, Jessi se Dawit kra miraq,’ nguta hakhi kuqto chhi wan tiikai.

²³ Riita, ija ara chong tlaq arai mren she, Shiikeawe raq Dawit lai Jesuq ka Israilnok Chhiiti we miishe shongkuqto. Ara shongtaq arka, Shiikeawe raq richü pat na Israilnok ma kiqkham kongphiq raü khakuq wantaq kra phanphan she tiihongtha kuqto.

²⁴ Jesuq raq jaqsham miphaho shaq bala, Johan raq Israilnok mungmaiqse tlotli ma, tsangshiq raq tsangshiq maiqmii ngarai kra tiidii raüta, tsantsii klai wan kham lam wan raa tlo nguta trahokuqto.

²⁵ Krai mren, Johan raq apaiq jaqsham kra akun wan nini niishe, mungmaiqse ma, ‘Namshiq raq ngi ka ju nguto tiima tlan? Ngi ka namshiq raq maklii khamthii ümtincho she wa saüki jiiq ahiq nguta thenge kherat tlan we ka riimang. Shatmaq, i bom chong ara tiitsang tai ronglaq! Apaiq ka i jai na saüho tlo she. Ngi khosho se arka, apaiq hokpa kha chang raülo kra diiketi dise ashi khan dongdii min thek mang, anun,’ nguta mungmaiqse ma chongkuqto.

²⁶ Paul raq tsangshiq ma, “I phan i maq Israilnok Abraham saü asetiim, kiimaq Shiikeawe ma haisong tsantsii thü wanti Pongnok phan maiqsetiim lei: Ara chong tiikang tiichhii wan tsütsa arka, Shiikeawe raq nashiq tarü miitu tiisaü hoto!

²⁷ Akha riishatmaq dongdii min, Jerusalem na siti mungmaiqse nai tsangshiq shunsheati welabi raq, apaiq ka Chhiiti we dea nguta sapmak riito. Kiimaq Asii Niitiitsak ranaiqtek na, shammibi bomchong lakdap phat wan tlaq kra liichum kriimin takwan mak dea riito. Li jiimin, tsangshiq raq Jesuq tsatbaiq raüta, kra lümaq shammibi bomchong kra khoti tiikupi wanto.

²⁸ Kiimaq tsangshiq raq apaiq lang tiipit li chang kha ka, apaiq dü na chhi mak li jiimin, apaiq ka tsea baiq wan raa dongdii nguta Pilat ma shiichut raüta, tiitsat baiqto.

²⁹ Kiimaq Asii Lakdap na apaiq miitu bom ümchuwa tiithai chong wantaq thun kra, tsangshiq raq thumthum klo lot wan jai she, tsangshiq raq apaiq ka pumsongkham wa dii raüta, longsha kho niishe lapto.

³⁰ Shatmaq, Shiikeawe raq apaiq ka amaa wa tiidong wan nongto.

³¹ Kiimaq apaiq ka rahiq luhea na saüli, Gelili maq riita Jerusalem chela na saüli, apaiq rai jaqsham khrum damti pha na sham tiichhikai nong riihum kito. Tsangshiq raq ümchaü akhing na Israilnok mungmaiqse ma apaiq hakhi kuqtlo.

^32-33 Riita, ümchaü naishiq arjaq saü wan kai arka, namshiq ma ara Tsütsa Ahea ara chongke wa nguta saü wan kai. Shiikeawe raq natitiim ma, jaqsham jonghea ashi misham kuq wanha nguta, man na pat na kiqkham kongphiq raüpot khakuq wantaq kra bomtsi ka, ümchaü nashiq tsangshiq lai-ala nguta sitiikai arma kiimaq maiq nanok ahinti wiita miitu she, Shiikeawe raq, Jesuq ka amaa wa tiidong kuq wantaq arshe kuwanto. Arka Shomshi lak anai na chongtlaq, kra phanphan she dea hongtha wanto. Kiijaq akha nguta chong tlo, ‘Ümniika i se she jo; Ümchaü ranaiq miiphat, ngi ka üm We she.’

³⁴ Kiimahali, Shiikeawe raq apaiq ka ama wa tiidong wan raüta, pattup pat-sa atra lishe mitiisi wan ha nguta akha chong tlo: ‘Ngi raq Dawit ma kiqkham kuq wan kang krai mren, namshiq ma asii kiimaq tengteng achu shiiman mikuq wanha.’

³⁵ Ara bomtsi arka Shomshi lak waiqti we raq lakjaq bashi na akha nguta waiqthü jeshe dongdii riito: ‘Ümniiraq üm bom treti ümkolise ka, maakho mong niili ka tiinam baiq maü mirhaü.’

³⁶ Riita, arjaq chongtlaq arai mren, Dawit raq apaiq pat na Shiikeawe luqkhap ma jaraüta, Shiikeawe jaq ka sham wanto. Raüta, apat sung wan jai she, apaiq ka tsai wanto. Raüta, apaiq maa ka atitiim maalap chiim na lap damto. Kiimaq apaiq maa ka maakho niili namraito.

³⁷ Shatmaq, juwa Shiikeawe raq amaa wa tiidong wantaq, apaiq maa ka, maakho mong na tiinam baiq mak dea.

³⁸ Arkha maq, phu nai notiim lei, ngi raq namshiq ma atsi dada maq, maiqse ngarai ka Jesuq lü miili diikuq wantlo nguta chongkuq tiipha ara.

³⁹ Kiimaq namshiq raq Mosheq Thungri ka lang wan lan. Shatmaq kriiraq namshiq ka ngarai kharü mong wa daa wan lot mak dea riito. Shatmaq, jurwa Jesuq ma kamwan tlaq, kriiti ka sepii she nguta kha phokuqtlo.

⁴⁰ Riita, arkha maq, namshiq raq tsii lam ronglaq. Riimak la, arka shammibi raq jamlai wa chongthütaq, kra namshiq dü nap miniki. Shammibi raq akha chongthüto:

⁴¹ ‘Liirong laq, angok anginok lei, Shiikeawe bom shipoqtitiim lei! Wangthang rai ronglaq, lanta miqphaq wan ronglaq! Ara jamkhano chongtiikang ngukla, ümchaü namshiq pat na ngi raq jaqsham tiikang arka, maiq weshi ra raq namshiq ma chongkuq raü min, namshiq raq kam man!’ ”

⁴² Riita traho bom chongke lot jai she, Paul nai Barnabas ka sinagok maq tiido wan tlaq kiijiishe, nokwe raq tsangnai ka jai wa Asii Niitiitsak ranaiq niimin kinong raüta, bom ka abiri chongkuq kinong raüjaq ahea nguta tsangnai ma bom ka chongto.

⁴³ Sinagok noqku thumjai niishe, nokwe thun ka pin wanto. Tsangshiq pin wan jai she, Jehudinok phan maiq pahea raq, kiimaq Pongnok phan maiqse Jehudi khü maq tiihong raüta siti thun maiq pahea raq, tsangnai jai she phan wanto. Krai mren, kiimwe nai kra riimin, tsangshiq ma Shiikeawe wokhong na tsapkapkap maq shongnga rong laq nguta tsangshiq ma tsaido jido bomtsi she chongkuqto.

⁴⁴ Krai mren she, jai wa Asii Niitiitsak ranaiq niika, kra chela wa maiq apako mungmaiqse ka ki raüta, Tatiwe tsütsa bomtsi chongkuqtlaq kra taito.

⁴⁵ Paul traho bomchong kra taikaiti mungmaiqse kong ka pahea kiraitaq kra chhi raütiishe, Jehudinok ka Paul nai Barnabas ma makshu rashe she ngengsiq wanto. Kiimaq tsangshiq raq Paul raq traho bomtsi chongkuqtaq thun kra khii wan she tsangnai ka longliiq wanto. Kiimaq tsangnai ma shumtsü miitsü she shu wanto.

⁴⁶ Shatmaq, Paul nai Barnabas riika, kra thaq na achat raütiishe, chaqchaq miishe hali akha ngutiishe tra hokuqto: “Shiikeawe bomtsi ka namshiq ma kongkhu chongke chang akhek. Kriikha maq namshiq ma kongkhu chongkuq tiikai. Shatmaq, ümchaü namshiq raq, Shiikeawe bomtsi ka shipoq baiq tlan. Krai mren, namshiq ka pattup pat-sa tsitsü rilung lap wan chang wa, sinchiitsap jamkho tsuq baiq tlaq ikhli she, maiqmii nai maiqmii li she tiitsuq baiq wan tlan. Riita, ija ahea na. Ikhiijiika, ümchaü sanha, namshiq ka baiqthü laitiishe, naishiq raq Shiikeawe bomtsi ka Pongnok phan maiqse miishe michong kuq hai.

⁴⁷ Ara jamkhano chongtiikai ngukla, Shiikeawe raq naishiq ma akha aming ake kun she: ‘Ngi raq namshiq ka, mangjong hiq na siti Pongnok phan maiqse miitu, walü tu ashi miishe tiija wan kang, Krai mren, mangjong maiqse kunli ka mitiichhii wan.’ ”

⁴⁸ Kra traho bomtsi chongkuqtaq kra, Pongnok phan maiqse raq tai raüta, tsangshiq ka kai khoqriiq shishiiq she chochi wanto. Kiimaq tsangshiq raq, Tatiwe bomtsi ka pinthum tiitsam kam wanto. Kiimaq, Shiikeawe raq pattup pat-sa tsitsü kewan miitu maiq ümchuwa tsea wantaq, kriiti thun ka kamasham maiqsetiim miishe tiija wanto.

⁴⁹ Krai mren she, Tatiwe bomtsi ka kra wang na, barap binrii niishe nyam wanto.

⁵⁰ Shatmaq, Jehudinok raq kra chela na siti shiilangbi nai Pongnok phan maiqse wa maiq wiijamti jechakre ajong alabi nyungre, Shiikeawe shomnoq wantibi thun kriima raikao tatto. Raüta, tsangshiq raq Paul nai Barnabas kriishe tiichamchao wanto. Raüta, tsangnai ka kra chela wa maiqhiq ahin niishe jobaiqto.

⁵¹ Kriikha miishe, kiimwe nai raq, tsangshiq raq ashut kiimung tlaq kra bom tre heshap she, tsangnai raq tsangnai hok wa, botkhulai ka naübaiqto. Raüta jainong shungthü tlii raüta, tsangnai ka Ikoniam chela niishe wawanto.

⁵² Antiok chela na siti kamasham maiqsetiim thun ka kai khoqriiq shishiiq, kiimaq Asii Wenyi raq ama maq siwanto.