Acts 12 - ASII LAKDAP Bible (BSI)

Henghea She Tiichamchao Wanto

¹ Kra akhing bala Herod Hokham we raq phungtuti maiq wiijamti ka tiichamchao wanto.

² Apaiq raq Johan ma aphu Jakob ka lap raüta nepja maq tiise baiqto.

³ Jehudinok ka kra chhi raüta chochikhiq riito. Kiimaq tsangshiq chochi ka chhi raütiishe, kra thaq na sru wanwan, abi lin she hali, apaiq raq Petar ka lapto. (Ara Petar laptaq akhing ka Pi Maq Shohü Winsii Phaq Poi bala riito.)

⁴ Petar ka lap raüta phaqtek na shaqto. Raüta, phenlabi kongblai ma tiikheto. Phenlabi ka kongshi na weblailai riito. Herod raq Petar kha ka, Tiichhii Wan Poi lot jaitiq, mungmaiqse man na pho raüta, apaiq ka tiishut baiq raüta tsea baiq ma nguta tiihong thato.

⁵ Krai mren, Petar ka phaqtek mong na shaq thüto. Shatmaq, phungtuti raq apaiq ka tiidong miitu, Shiikeawe jaq wa, tsan tiitsi raüta, kai achu jaüto.

Petar Ka Phaqtek Mong Wa Tiidongto

⁶ Herod raq Petar ka anap ranaiq miishe, mungmaiqse rung na tiichap ma nguta, tiije shat riito. Kra rawa, Petar ka phenla wenai heawea na akon. Apaiq ka jinraü raünai maq, ajaq na khato. Raüta, siimko nü jinraü tho kriika phenla weshi jaq na dakshat riito. Kiimaq konü siimti jinraü tho kriika phenla weshi jaq na dak khato. Raüta apaiq ka phenla we nai heawea na tiinga raüta kheto. Kiimaq phaqtek jam kilam chong kiimin phenlabi raq kheshat riito.

⁷ Shatmaq, tiihanghiiq miili, kiijaq Tatiwe rase ashi ka dongchhaq chapkito. Krai mren, phaqtek khok mong na walüli wahea liishe riito. Rase raq Petar ka aphaq lam na sham raüta baito. Raüta akon wa tiisamto. Kiimaq, “Jaqlo kotsi! Tiidolaq!” nguta apaiq ka thaüto. Krai mren, apaiq khachang jinraü kharü thun kriika, tiidiisaq li she hiq na apaiq dea dea she tiidiikito.

⁸ Kiijiishe, rase raq Petar ma chongto, “Ümshinket ka tiipha shat laq. Laüta hokpa kri palaq.” Krai mren, Petar raq ashinket ka tiipha pato. Kiimaq ahokpa kra pato. Kiijiishe, rase raq Petar ma chongto, “Ümkhea thum kaü kra samhea khesam laq. Laüta, i jai phan phan kira.”

⁹ Kiimaq, Petar ka rase jai phan phan, phaqtek mong wa kinphai na dongho kihoto. Shatmaq, rase raq apaiq shunshea wan tlaq kriika, rawümi sha rawa ma bom wiinya ngutli tiima raito. Apaiq raq tiima ka, shammi makchhi sham ngutli tiimato.

¹⁰ Raüta, tsangnai ka khok mong kilü kheti phenlabi kong kra jinhoto. Raüta kinphai khok kilü kheti phenlabi kong kriishe hali jinho nongto. Kra miishe kinphai na dongho chang jin kilü jong kaü, kiijiishe saü hoto. Tsangnai saüho kiita, jin kilü jong kaü kriika, apaiq tiididi she tiidi kito. Krai mren, tsangnai ka phaqtek rung phai lamjong mong niishe donghoto. Raüta, tsangnai ka lam nong nongshi ka adam maq kito. Kiijiishe, rase ka Petar tho wa mokisaq lishe mokito.

¹¹ Kiijiishe Petar raq apaiq ka rase raq phaqtek mong wa tiidong kuq wanto dea ngutiishe tsang wanto. Kiimaq atsan na akha bomto, “Ngi ka ümchaü tiq tsang tiikang! Arka riisham makchhi ka riimak dea. Riikhaqli rawümi jaqsham dea. Shiikeawe raq apaiq rase ka tiiki raüta, ngi ara Herod kharü mong wa tiichhii kuq wanto. Kiimaq Jehudinok raq, ngi ka pinthum mitiichamchao rong i nguta thiikho athu kra mong wa tiichhii kuqto.”

¹² Petar raq apaiq miirii khakii ka jamkhiiwa, kra sap raütiishe, apaiq ka Johan Makaq nyung Meriq tahii jam niishe kihoto. Kiijaq maiq pahea riitam raüta, Petar miitu achu jaürea ngashat riito.

¹³ Kiijiishe Petar ka saüki raüta, kinphai kilü na ajaq maq bukto. Kra tai raüta, luqkhapse ashi jechakse amang Roda nguta kra ki raüta kilam chong maq liikito.

¹⁴ Apaiq raq Petar bom ka tiitsang tai raüta, apaiq ka pinthum chochi sitsi ma kilü kiimin dikuq mak miili, tlat chhat tapmong nü na juraüta, tsangshiq ma Petar ka kilam da na chap tlo nguta chong wato.

¹⁵ “Ümnaq ara angi riimaü sha!” nguta tsangshiq raq apaiq bom ka treto. Shatmaq, apaiq raq ngohea shaq shaq taikang nguta tsangshiq ma chongkuqto. Kiijiishe tsangshiq raq, “O, ikhiijiila arka apaiq kheti rase sham” nguta apaiq bom ka treto.

¹⁶ Kra liipan bala min, Petar riika kilü na bukruq li bukto. Atiisup niishe, tsangshiq raq kilü ka dito. Kiimaq tsangshiq raq Petar ka chhi raüta kai amao riito.

¹⁷ Apaiq raq tsangshiq ma ajaq maq nam raüta, ajong maq naq bom rongkiq nguta chongto. Raüta, Shiikeawe raq apaiq ka jamkho phaqtek mong wa tiichhii kuq wantaq kra tsangshiq ma chongto. “Ara tsütsa arka Jakob nai phunainotiim ahinti miiri tiitai ronglaq” nguta apaiq raq tsangshiq ma chong kuqto. Raüta, apaiq ka kiimaq ahin niishe kihoto.

¹⁸ Anap ranap, rawü niishe, Petar ka jamkho jakita nguta phenlanok liipan na pinthum tatso wiinyi she riikungta wanto.

¹⁹ Herod raq Petar rit ronglaq nguta aming kuqto. Shatmaq, tsangshiq raq Petar ka humlot mak she riito. Kriikha miishe Herod raq kintsongtibi phenlabi thun ma bom ka tiiwai sowanto. Raüta, tsangshiq tsea baiq miitu aming kuqto. Arjai miishe, Herod ka Judia wang maq tiidoho raüta, Sisiria chela niishe kihoto. Raüta, apaiq ka kiijaq heashi sikai nguta kihoto.

Herod Tsaito

²⁰ Herod ka Tajar nai Sidon chelati ma tsankhiq hea riito. Kriikha maq, kra chela anai wa mungmaiqse welabi thun ka Herod rai riihumkai kito. Tsangshiq raq apha na tsangshiq khrumke miitu, hokham we jam kheti we Blastas ka kongkhu na tsangshiq kiimwe ma tiija ma nguta tiijom na wanto. Raütiishe, Blastas ma tiishea raütiishe, tsangshiq ka Herod pha na riihum wa wato. Raüta, Herod ma, ari aram miidea singa rong i nguta, bom ka tiitai chong wanto. Jamkhano ngukla, tsangshiq chela anaiti raq aphaq asea chang raipo wonglo thun kriika hokhamwe sengi jaq wa riphaq siqtlo.

²¹ Krai mren, jipi jihea ranaiqshi akhing tiihongto. Raüta, kra ranaiq akhing na Herod ka hokham miirii sam raüta, hokham ngacho na ngato. Raüta, mungmaiqse ma trahokuqto.

²² Apaiq traho bom chongke kra tai raüta, mungmaiqse raq, “Arka maiq bom ka riimak. Shatmaq rakaü hiq we bomchong!” nguta apaiq somra gitrang siqto.

²³ Kiijiishe tiihanghiiq miili, Tatiwe rase raq apaiq ka tiikhiqlaq tsat baiqto. Apaiq ka Shiikeawe raq jamkhano tsatbaiqtaq ngukla apaiq kra khoti Shiikeawe ikha tiishom ra wanto. Kriikha na tsatbaiqto. Apaiq ka ajong ajii raq phaq raüta tsaito.

²⁴ Kiimaq, ana liipko miika, Shiikeawe bomtsi ka maiq pahea raq tai wan wan she nyam wanto. Krai mren, Shiikeawe ma kamwanti maiq ka pahea pawan wan she riito.

²⁵ Barnabas nai Saul riimin, tsangnai wanhiq khum jaqsham kra lot raüta, Jerusalem miishe pai wan nongto. Tsangnai rai Johan Makaq kiimin shea wan damto.