Acts 11 - ASII LAKDAP Bible (BSI)

Jerusalem Phungtuti Ma Kornelias Tsütsa Tiitaito

¹ Kiimwebi nai Judia wang na siti kamasham maiqsetiim thun raq, Pongnok phan maiqse riimin, Shiikeawe bomtsi ka lap wanto she nguta tsütsa ka taito.

² Jehudinok phong wa phungmaiqse maiq wiijamti raq Pongnok phan maiqse riika Phung na shang raü min, athohan poi ka lang raa dongdii nguta kamtsantsii tri thü wanti thun raq, Petar ka Jerusalem na saüki kiita, Petar ma bom ka akhiishe sairan waito.

³ “Ümniika athohan hü maq siti Pongnok phan maiqse jam na dü wa laü. Kiimaq tsangshiq rai adam na takshi pinshi maq phaqsiq dam laü! Ümniiraq tsangshiq wa nyiim laü. Kriika ajiq klo laü.”

⁴ Kiijiishe, Petar raq, apaiq raq traho bom chongke wanhiq khum ka jamkho shampha wantaq, kriishe, apha maq riita atiisup na saüli she, tsangshiq ma tiitho tiipha phanchan kuqto. Apaiq raq tsangshiq ma bom ka akhiishe chongkuqto:

⁵ “Kra akhing na, ngi ka Joppa chela na achu jaürea riikang. Kra bala, ngi raq riisham mak maq, ra nü wa i makki na phanshi tiijikitaq kra chhikang. Ngi raq ramungtan wa phanshi damkom kaü ikha, adiimliim kaü jonghea kaü ashi kra, ashok shokblai wiita maq maiq raq jaq maq sham raüta achan rat ikha, ramungtan maq hiq nü na atiisat rea chhikang. Kiimaq kra diimliim kaü ka, ngi tho niishe tiichiim kito.

⁶ Kiijiishe ngi raq kra diimliim kaü mong na, samhea tiitsang liikangta, kra mong niika, jam nyamse kong kiimaq rum ngamse kong, kiimaq awokpo maq khum phan, ngamsaü ngiqse kiimaq paüsang nyiqla phan pahea chhikang. Kiimahali, rum na siti peshap wushi phan kong min pahea chhikang.

⁷ Kra liirat tiikang liipan bala niili, maiq bom ashi raq ngi ka, ‘Tiidolaq, Petar. Laüta, arthun ara tiishe laq. Laüta, angam ka aphaq riilaq!’ nguta thaüto.

⁸ Kiijiishe, ngi raq akha trekang, ‘Tatiwe lei, akhiiwiqwiq kla naq ngukiq! Ngi raq ümchaü niitaq, apii ashan chang phan kra lo, kiimaq ashe ashi phan nguta chongtlaq kriiphan ka, i nü na thü mang shaq. Thung khata ahü,’ nguta trekang.

⁹ Kiijiishe, ramungtan wa maiq bom kriiraq, ngi ma thongshi ri hali, ‘Shiikeawe raq jamlai wa, asii arai phan nguta rairai riirii riiwantaq, kriika ümniiraq apii phan, ashe nguta tiima ka ra mak she,’ nguta thaü nongto

¹⁰ Riita, ara chongtiikang arka, tiithongkiki jangtsam ngi ma tiichhikuqto. Kra jai miishetiq, wiidiimliim tam maq, ramungtan niishe tiikoq wan nongto.

¹¹ Kra liipan bala niili, Sisiria chela maq ngi tiiheakai atiiki maiq wetsam kriika, ngi jap tiikang i wanti we jam kiijiishe saü wato.

¹² Kiijiishe, Asii Wenyi raq ngi ka tsangshiq rai Sisiria na wadam miitu, naqkan kop kiq nguta thaüto. Riita ara chongtiikang arai mren, ümchaü arjaq ngi rai kongshi ngatlaq kamasham maiqsetiim tsangtsam wetrok kriimin, ngi rai kongshi miishe Sisiria chela na wawankai. Kiimaq naishiq tarü ka Kornelias jam niishe düwakai.

¹³ Kiijiishe, Kornelias raq, naishiq ma rase ashi ka tsang jam na kiraüta, apaiq rai jamkho riihumkitaq, kriishe naishiq ma tiitai chongkuqto. Kiimaq rase raq apaiq ka, ‘Joppa na maiq weshi amang Simon Petar nguta asi, kriiwe ka tiihea kai miitu maiq tiikilaq.

¹⁴ Apaiq ka wa raüta, ümniima nai ümjamtitiim ma bom ka michongkuq. Kra apaiq bomtsi taitlan kra lü miitiq, ümkhum nai ümjamtitiim thun khum kra mitiichhii wan,’ nguta chong kuqto nguta naishiq ma chongto.

¹⁵ Krai mren, ngi raq tsangshiq ma traho bomtsi kra chongkuq wan kangtiishe, Asii Wenyi ka man na aphaji na nashiq khum na jamkho satkitaq, ikhiisii hali tsangshiq khum niimin satkito.

¹⁶ Kra chhi latiishe, i tsan na, ‘Johan riika tsantsii klai khamli lamkuqto. Shatmaq, namshiq ka Asii Wenyi miishe kham milam kuq wan,’ nguta nashiq ma, Tatiwe raq chongkuqtaq kriishe i tsan mong tiidoto.

¹⁷ Kra miishe, ngi raq, o ikhiijiika, nashiq raq Tati Jesuq Khristo ma kam kaita, Shiikeawe raq Asii Wenyi ka nashiq ma jamkho kuqtaq ikha, ümchaü sanha, ara Pongnok phan maiqse miimin kuqto she dea ngutiishe tak kang. Riita, ija, ikhiijiika, ngi raq Shiikeawe jaqsham ka jamkho mitangta ha! Kra tangta miika, ngi ka juwa!”

¹⁸ Tsangshiq raq ara Petar raq chongkuqtaq tsütsa kra tai raütiishe, tsangshiq raq Petar shra bom nyantaq kra diibaiqto. Kiimaq, “Ikhiijiika, Shiikeawe raq ara Pongnok phan maiqse miimin, tsangshiq ngarai kra tiidii miitu, tsangshiq miimin kilü ka dikuqto she dea. Raüta tsangshiq miimin, atra maq si miitu rilung lam she tankuq wanto!” nguta tsangshiq raq Shiikeawe kiishe tiitsam kamto.

Antiokti Phungtu

¹⁹ Stephen tsat baiqtaq akhing chamchao lak na kamasham maiqsetiim tiipin jintaq lak wa, maiq wiijamti ka Phonesia wang na, Saipras mung na, kiimaq Antiok chela thun na, Tati Jesuq tsütsa ka Jehudinok phan miili chongkuq wan wan wawanto.

²⁰ Shatmaq, Saipras mung nai Sairini mung wa kamasham maiqsetiim wiijamti riika, Antiok chela na wawan raüta, Tati Jesuq manphan Tsütsa Ahea kra Pongnok phan maiqsetiim miimin chongkuqto.

²¹ Tatiwe ningkun ka tsangshiq khum na asi riito. Krai mren, tsangshiq traho bomchong tai raüta, maiq pahea raq Tati Jesuq ma kamwanto.

²² Kiimaq ara tsangshiq tsütsa arka Jerusalem na siti phungtuti ni niishe saüto. Kra tai raütiishe, tsangshiq raq Barnabas ka Antiok chela na tiiwato.

²³ Barnabas ka Antiok na saüto. Kiimaq Shiikeawe raq tsangshiq ma pinthum achu shiiman kuq tlaq kra chhito. Kra chhi raüta, apaiq ka kai khoqriiqto. Kiimaq apaiq raq tsangshiq ma tsan nai tsii wiita kiinong kuq lanta tsapsaü kapse maq, Tatiwe ma kamwan ruq maq shongnga ronglaq nguta tsaido jido bomtsi chongkuqto.

²⁴ Barnabas ka maiqshaq weshi. Apaiq ka Asii Wenyi raq ama kiimaq kamasham na srea weshi riito. Apaiq traho bomchong kra tai raüta, maiq pahea Tatiwe puk na nyap wanto.

²⁵ Kra jai miishe, Barnabas ka Saul rit wa Tarsas chela na wawanto.

²⁶ Apaiq ka Saul rai riihum raüta sanha, apaiq raq Saul ka Antiok chela niishe sheahoto. Raüta, tsangnai wiita adam miishe, phungtuti rai wiitang wiishi sidam raüta, maiq pahea ma Shiikeawe bomtsi shrinkuqto. Antiok chela maq, kamasham maiqsetiim ka Khristan nguta mang phahoto.

²⁷ Kra akhing bala niisii hali, Jerusalem wa shammibi wiijamti ka Antiok chela na wato.

²⁸ Tsangshiq kongti weshi, amang ka Agabas nguta kriiwe ka Asii Wenyi raq ama riito. Apaiq ka chap hiiq raüta, mangjong tlotli na ram jonghea midong lii nguta, Antiok na siti phungmaiqsetiim ma riisham bom maq tiithai chongkuqto. (Kra ramdong ka Klaudias raq munglang Roman Hokham jataq bala dongto.)

²⁹ Kra tai raütiishe, Jesuq jaiphanti setiim raq, Judia wang na siti kamasham maiqse phunainotiim ma khrumke miitu, tsangshiq loweatek raq maiqmii rii tiithithi maq pheke jaqmiiq mihi rong i nguta bom ka riichongto.

³⁰ Tsangshiq raq ara khrum kongphiq jaqmiiq kampho arka riichom lot raütiishe, Barnabas nai Saul ma, Jerusalem na phungtu liiti maiqlare jaq niishe tiikuq kito.