Acts 10 - ASII LAKDAP Bible (BSI)

Kornelias Raq Rase Bom Taito

¹ Sisiria chela na siti maiq weshi asi. Apaiq ka “Itali wa aki phen Rejiment,” kra pengti we phentuwe.

² Apaiq ka Shiikeawe shomnoqti. Apaiq rai ajamti thun tarü ka Shiikeawe shomnoqti siisaq. Apaiq ka Jehudinok miitsan miijan maiqse khrumketi. Kiimaq apaiq ka Shiikeawe jaq wa achu jaü na tsapkap hea we.

³ Apaiq raq ranaiqshi, ranaiq naritsam tin khan na, riisham mak maq tsangriri hea, Shiikeawe raq atiiki rase ashi ka chhito. Rase raq, “Kornelias!” nguta apaiq rai bomto.

⁴ Apaiq raq rase ka ahai lam maq liito. Raüta, “Chaü lei, jamlai wa?” nguta treto. Kiijiishe rase raq apaiq ma, “Shiikeawe ka ümniima tsanhea sitlo. Ümniiraq achu jaü tlaü kra taito she. Kiimaq ümniiraq miitsan maiqse khrum kuq tlaü kriimin chhito she. Riita, Shiikeawe raq ümchaü ka ümbom tre miitu tiijeje she.

⁵ Riita, ümchaü min Joppa na Simon Petar nguta maiq weshi asi. Apaiq phana maiq tiiki laüta, apaiq ka ana tiiheakikiq.

⁶ Apaiq wandü jamti we mang ka Simon. Apaiq ka ngamkhü shati laopan we. Kiimaq apaiq jam ka khamjongraikii tho na,” nguta chongkuqto.

⁷ Raüta, rase ka wawan nongto. Kiimaq Kornelias raq apaiq jam na jaqsham damti, aluqkhap se nai wenai ka heato. Kiimaq apaiq shiililiiti kiimaq tsapkapkap maq Shiikeawe shomnoqti phenla weshi kriiri heato.

⁸ Raüta, apaiq ma rase raq jamlai wa chongkuqtaq, kra tsangtsam ma hali tlü chongkuqto. Raütiishe, apaiq raq tsangtsam ka Joppa chela na Petar tiiheakai tiikito.

Petar Raq Shiikeawe Bom Taito

⁹ Kiimaq anap ranaiq niishe, tsangtsam ka Joppa chela na saüho nam nam she riito. Kra bala ka ranaiq shethung shekham bala. Kra akhing na Petar ka achu jaü wa wukhu na ngawato.

¹⁰ Petar ka achu jaü rea lam maq, kai ramtsito. Kiimaq phanshi ra phaqsea rohea riito. Kra akhing bala jamtati ka dungchung. Kra liipan niili, Petar raq riisham mak maq, ra wang win na phanshi ra chhito.

¹¹ Apaiq raq ramungtan kilü ka atiidi riiraü chhito. Kiimaq ramungtan maq jonghea luhea adiimliim kaü ashi ka shokblai wiita maq sham raüta, mangjong hiq nü ana atiisat rea wan chhito.

¹² Kra diimliim kaü mong niika, rum ngamse phanrap phanrii asi. Kiimaq ahokpe blai phan wa, awokpo maq khumti phan wa, kiimaq arakong maq biti wushi phan wa, wiita asi siisaq riito.

¹³ Apaiq raq kra liirat tlaq liipan bala niili she, ra wa maiq bom ashi raq apaiq ma akha thaüto, “Petar, kriq, tiidolaq. Laüta ara ngamkaü thun arka tiishetlo laq. Laüta, angam thun ka aphaq riilaq!” nguta apaiq ma chongto.

¹⁴ Kiijiishe, Petar raq treto, “Tatiwe akhiiwiqwiq ka phaqsiq mang! Ümchaü niitaq ngi raq apii ashan chang phan ngam angiq ka i nü na thü mang shaqli!”

¹⁵ Shatmaq, maiq bom kriiraq apaiq ma hali, “Shiikeawe raq jamlai phan wa, arka asii she nguta rairii tlaq, kriika ka ümniiraq apii chang ngutiika, naq tiima kiq,” nguta apaiq ma chongkuqto.

¹⁶ Riita ara riisham mak maq tiichhike wan arka, apaiq ma jangtsam thong thong tiichhikuqto. Kra jai miishetiq, kra diimliim kaü ka ra niishe hali tiijang hit wan nongto.

Kornelias Raq Petar Tiichongkito

¹⁷ Petar ka apaiq raq riisham mak maq chhitaq kriika jamlai liichum wiinya nguta, tiima rai tlaq bala kiijiili, Kornelias raq atiiki bom chong kaiti maiq wetsam kriika, Simon jam ka rit raüta, ahum wishe. Raüta, tsangtsam ka Simon kilam na chap raqraq riito.

¹⁸ Raüta, tsangtsam raq jamtati ka hea raüta, “Arjam na Simon Petar nguta wanwe weshi asi dea sha?” nguta waito.

¹⁹ Petar ka riisham mak maq chhitaq kra, jamlai wa riita ahiq nguta rashi hiqwia tiima rai tlaq liipan niili, Asii Wenyi raq apaiq ka thaüto, “Liilaq! Ümnaq heakaiti maiq wetsam ka arjaq saükito she.

²⁰ Ümniika hiq niishe satkikiq. Laüta, tsangtsam rai wadam miitu ümniika naqkhaiq khamkiq. Jamkhano ngukla, tsangtsam ka ngi raq atiikiha,” nguta Wenyi raq apaiq ma chongkuqto.

²¹ Krai mren, Petar ka wukhu maq hiq niishe satkito. Raüta, “Namtsam raq rittlan we ka ngi ahata. Namtsam, ka jamlai mra na akihan wa?” nguta tsangshiq ma waito.

²² Kiijiishe, “Kepten Kornelias raq tiikito,” nguta tsangtsam raq treto. “Apaiq ka maiqshaq. Shiikeawe shomnoqti. Apaiq ka Jehudinok tarü raq kai shrengtlo. Rase ashi raq apaiq ma ümniika tiiheakikiq nguta chongkuqto. Arka ümniiraq apaiq ma jamlai chongke chang wa, kra miitu tiihea kito.”

²³ Kiijiishe, Petar raq wanwetiim ka jam na düwa rongkiq nguta heato. Kiimaq kra rawa ka kiijiili jap ronglaq nguta tsangtsam ka tiiwinto. Raütiishe anap miishe, apaiq ka tiije raüta, tsangtsam rai wawan damto. Kiimaq Joppa chela wa phunai notiim wiijamti min apaiq rai wadamto.

Petar Ka Kornelias Phana Wato

²⁴ Kiimaq napjai ranaiq niishe, apaiq ka Sisiria chela na saüto. Kiimaq, Kornelias riika, ajamtitiim nai apaiq ma kongtibi thun ka ajam na triitam heali raüta, Petar saüwa ka kheshat riito.

²⁵ Petar ka kilam na anyap wan she kiijaq, Kornelias ka kiraüta apaiq ka taoto. Apaiq ka Petar jichong na bumtlii raüta, taoto.

²⁶ Shatmaq, Petar raq apaiq ka, “Chaplaq. Ngi armin la maiqse ashi li tiina,” nguta bom wanto.

²⁷ Petar ka Kornelias rai bomshbom lam miili she, jam mong na nyap wanto. Jam mong na saüwa raüta liikiita, kiijaq maiq ka apawiq artam wishe lowanto.

²⁸ Kiijiishe, Petar raq tsangshiq ma akhiishe chongkuq phahoto, “Jehudinok thungtri na Jehudi phan maiqse raq, Pongnok phan maiqse rai jam riidükai maimak kiimaq wa riinyiim min maimak, apii riiqkhiq nguta chongtlo. Arka namshiq tarü raq aheawiq asap han siisaq. Shatmaq, maiqse ngusaq wiika, jumin ashe ashi phan nai tsangshiq rai wa ka adam na nyiim maimak nguta naq tseatsiiqkiq nguta, ngi ma Shiikeawe raq tiichhikuqto.

²⁹ Riita, ümchaü min ara chong tiikang arkha maq, ümniiraq ngi tiiheaki laü krai mren, jamlai miimin tiithudu mang maq, ajaq ümjam na sawa kang. Riita, ümchaü min, ümniiraq ngi ka jamlai miitu wa tiihaiki laü kriishe chong laq.”

³⁰ Kiijiishe, Kornelias raq treto, “Shiilang we lei, kechu jonghea. Ümchaü ranaiq ara weali maq ranaiqtsam she. Ngi ka i jam na, ranaiq naritsam bala achu jaü ngakang. Kra bala, tiihanghiiq miili, maiqwe ashi, apaiq miirii ka khealü, achhai anyii samraü we kra, i khaki na chapsaq chapkito.

³¹ Raüta, apaiq raq ngi ma, ‘Kornelias lei! Shiikeawe raq ümnaq achu jaü ka taito she. Kiimaq ümniiraq miitsan miijan maiqse ma khrum kuq tlaü thun kiimin chhito she.

³² Riita, ümchaü min, Joppa chela na, maiq weshi asi. Apaiq mang ka Simon Petar. Maiq tiiki laüta, apaiq ka ana tiiheakikiq. Apaiq ka ngamkhü shati laopan we Simon jam na jap tlo. Apaiq jam ka khamjong kii tho na,’ nguta ngi ma chongkuqto.

³³ Kiimaq kra chongkuqtaq krai mren, ngi raq ümniika tlothit li ana tiiheaki kang. Kechu jonghea, ümniiraq tlea maü maq saü wa laü. Riita, shiilangwe lei, ümchaü min Tatiwe raq naishiq ma jamlai chongkuq wakiq ngutiiwa tiiwataq, kra taiwan miitu naishiq tarü ajaq Shiikeawe man na riitam wan kai,” nguta treto.

Petar Raq Kornelias Ma Trahokuqto

³⁴ Kiijiishe, Petar raq bom ka akhiishe chongkuq hoto, “Shiikeawe raq maiqse angu wiitarü ka maklii ashi miili dea liikuqtlo nguta, ümchaü ngi raq tak kang she.

³⁵ Jurwa apaiq shomnoqtlaq, kiimaq riikhaqli tingting lam phan tlaq, kriiti ka junok phan li jiimin, Shiikeawe raq taotlo siisaq.

³⁶ Shiikeawe raq Israilnok ma Jesuq Khristo lümaq hansang lam phan Tsütsa Ahea chong kuqtaq kriika, ümniiriimin asap haü she. Apaiq ka maiqse angu wiita ma Tatiwe.

³⁷ Johan raq Gelili wang maq tsantsii klai lanta kham lam wan ronglaq nguta, trahokuqto. Kiimaq tiichap wan raütiishe, Israilnok mung na phoili, jaqsham jonghea ashi sham wanto. Kriika ümniiriimin asap haü.

³⁸ Najareth hiqti Jesuq ma Shiikeawe raq, Asii Wenyi nai ningkun ka asho awo kuqtaq kriimin ümniiraq asap haü. Krai mren, apaiq ka barap na khum raüta, maiqse ma jaqsham ahea pahea shamkuqto. Kiimaq Tha kharü mong wa maiq atsi asiti thun ka pahea tiihea kuqto. Shiikeawe ka apaiq rai asi kha maq, maiqse ma atin khan jaqsham ahea shamkuqto.

³⁹ Naishiq ka apaiq raq Israilnok mung na nai Jerusalem na ümtinkhan wa jaqsham ahea awa shamkuqtaq, kra chhi wan damti hakhibi. Kra jai miishe, tsangshiq raq apaiq ka pumsongkham na tübaiq raüta tsatbaiqto.

⁴⁰ Shatmaq, Shiikeawe raq apaiq ka ranaiqtsam jai maq amaa wa tiidong wanto. Raüta, apaiq sham ka naishiq makki na hali tiichhikuq wan nongto.

⁴¹ Riita ara apaiq sham tiichhikuq wantaq kriika maiq wiitarü ma pili niika riimak. Arka Shiikeawe raq Jesuq hakhibi miitu juju wa kongkhu miiphü tsea raüta, tiijetiiti thun kra miili tiichhi kuqto. Kra hakhibi ka naishiq ara. Naishiq ka apaiq amaa wa dong wanjai miimin, apaiq rai adam maq phaqsiq wandam kai.

⁴² Kiimaq apaiq raq naishiq ma tsütsa ahea kra maiqse angu wiita ma chongke wan miitu arang kuqto. Kiimaq Shiikeawe raq apaiq ka maiqse amaati nai atrati kra kha phoke miitu phowe ma shongto nguta kholam kholiiq maq trahoke miitu naishiq ara hakhi miishe shongto.

⁴³ Shammibi thun wiita raq, apaiq mangchong tsa kra chongkuq wanto she. Apaiq ma kamwanti maiq loweatek ngarai ka Shiikeawe raq, Jesuq lümaq wiita midii kuq nguta tsangshiq raq chongkuqto.”

Pongnok Phan Ma Asii Wenyi Kuqto

⁴⁴ Petar raq tsangshiq ma trahoke rea liipan niili, apaiq traho taiti tarü khum na, Asii Wenyi ka sat raüta tsangshiq ka rom wanto.

⁴⁵ Petar rai awadam Jehudinok phungmaiqsetiim Joppa wa awati raq, Shiikeawe raq apaiq kongphiq Asii Wenyi ka Pongnok phan maiqse miimin, asho awo raüke wan kriishe chhi raüta, tsangshiq ka kai amao riito.

⁴⁶ Tsangshiq ka jamkhano maota ngukla, Kornelias jam na maiq ümchuwa ngatlaq thun wiita raq, awang chang bom maq Shiikeawe jonglu kriishe shomnoq trang taito. Kiijiishe, Petar raq nguto,

⁴⁷ “Riita, nashiq ma jamkho Asii Wenyi kuqtaq, kiikhiisii, ümchaü tsangshiq miimin Asii Wenyi ka kuqto she. Ikhiijiika, tsangshiq ma kham lamke maimak nguta tangtati ka juwa?”

⁴⁸ Kra chongtaq krai mren, apaiq raq tsangshiq ma Jesuq Khristo mang na kham lamke raa tlo nguta aming kuqto. Kra lot raütiishe, tsangshiq raq Petar nangnga tsangshiq rai ranaiq naitsam haithü haü jaq ahea nguta tiipaiqnea lam maq tiiwinto.