2 Peter 1 - ASII LAKDAP Bible (BSI)

¹ Ngi, Simon Petar, jaqshise kiimaq Jesuq Khristo kiimwe raq-- Jumiiwa nashiq Shiikeawe kiimaq Chhiiti Jesuq Khristo kechu lümaq athii tsinhea naishiq ma kuqtaq kiikha kamasham kuqwataqtibi ma:

² Kaphap kiimaq hansang ka namshiq ma namshiq raq Shiikeawe kiimaq Jesuq, nashiq TATIWE saptlan kra lümaq namshiq ma asho awo misilaq.

Shiikeawe Raq Nashiq Awongsii Tiija Wan Tlo

³ Khristo raq, apaiq asii ningkun lümaq, nashiq ka awongsii Phungmaiqse rilung siwan miitu, ningkun ümchuwa raa tlaq kra kunli kuqto she. Khristo ka nashiq ma tsanwa we she nguta sap tiikai ara lümaq, asii ningkun kra lap wan tiikai. Apaiq raq nashiq ka apaiq asii kechu rilung khushü pülii tlaq thun kra riishake miitu hea wanto.

⁴ Shiikeawe raq nashiq ma achong lot mai achu shiiman mikuq ha nguta kongphiq akhakuq, kriika ümchaü nashiq ma kuqto she. Arka nashiq khum na Asii Wenyi kuqtaq kra nangnga chongtlo. Ara ningkun lümaq, nashiq rilung ka ara mangjong hiq na, maiqse ngarai sükha tsii raq, ümchuwa mangjong hiq na siti maiqse khum, shiithen baiq tlaq, kiiwa nashiq khum ka mitiichhii kuq. Kiimaq nashiq ka, Shiikeawe setiim awongsii ma mitiija.

⁵ Riita ümchaü min, namshiq ka asii kechu rilung siwan miitu she, Shiikeawe raq tsea wanto. Arkha maq, Shiikeawe ma pharang rang maq kam lanta sironglaq. Lanta apaiq raq namshiq ma jamlai jaqsham wa chongtlaq kra sham lanta sirong laq.

⁶ Namshiq raq han-ngam ramho ka anin lanta sichang raa tlo. Kiimaq phanrap chamchao, maitai, haikaiq haike saü tlaq kiimin wiita, tsan tiibum lanta nin wan ruq maq sironglaq. Lanta, namrilung ka awongsii Phungmaiqse rilung ma tiija ronglaq.

⁷ Namshiq raq kongtibi Phungmaiqse wiitarü ka maklii ashi maq lungwii ronglaq. Namshiq raq nanok tarü ma lungwii tsantsii thü lanta sironglaq.

⁸ Arthun angu tu ara namshiq rilung na asi riichang. Arthun ara namkhum na asho awo maq siraüla, namshiq ka wenyi rilung na, howe minwe siisaq mija han. Namshiq raq Jesuq mangchan ka atsaü maq khon tlan kra wiishe namshiq khum na atsi ango kra dong man wan tlo.

⁹ Shatmaq kamasham maiqse ngu raü, ju khum niiwa ara chongtiikai thun angu tu ka ahü, kriiti ka amak achuk we, lairap samhea chhi tsii mak we ikha. Kiimaq amak chuktlii we ikhli sitlo. Akhiiti riika, Shiikeawe raq akhum wa anyung pukdong ngarai ka diibaiqto she ngutiimin sapphaq mak miili, angi we ikhli sitlo.

¹⁰ Ara chong tiikai arai mren, lungwii phunotiim lei, Shiikeawe raq namshiq ka hea wanto. Kiimaq namshiq ka tsea wanto. Krai mren namrilung na atsi ango wahea la petsi chong ikha sirong laq. Kiikha sihan jiika, namshiq kamasham ka ümtiikiimin tiimo baiq man miaq.

¹¹ Akha sihan jiila, Shiikeawe raq namshiq ma nashiq Tati Jesuq Khristo sichang pattup mungtan jam kiijaq siwan dam miitu kilü dije maq mikhe.

Tsin Wan Lan Ka Tsan Na Shaq Ronglaq

¹² Namshiq ma tengman tlaq bomtsi ka shrinkuq wanto she. Kiimaq namshiq rang ka kra tengman tlaq bomtsi niishe apha maq cham wan tlan. Li jiimin, ngi raq namshiq ma tengman tlaq bomtsi ka wranaiqshe bliiq kiki chongkuq nong tiipha ahata.

¹³ Ngi raq namshiq ma akha sungkhu tsiilam chongke wan arka, ngi ma homaho jaqsham ashi. Arkha maq, ngi ka atra sitiikang wiiwii, namshiq tsan tiichhii wan miitu tsii chongke ka nungpaq mang mirha nguta tiima tiikang.

¹⁴ Nashiq Tatiwe Jesuq Khristo raq, ngi ma atiichhike wishe, ngi ka ara mangjong hiq na alu ka nga mang she miraq.

¹⁵ Arkha maq, ngi raq kai shiichaq lata, ngi tsai jai min, namshiq raq arthun tengman tlaq bomtsi ara wranaiqshe tsan na tiitsang shat maq siwan miitu, namshiq ma tsii chongke chang ümchuwa sitlaq, kra michong kuq ha nguta shiikut chaq tiikang.

Kiimwebi Bomchong Ka Tengteng

¹⁶ Naishiq kiimwebi raq namshiq ma nashiq Tati Jesuq Khristo ka apaiq ningkun ajong achhai anyii liliim wahea la maq misaüho nong nguta namshiq ma atsi dada maq chongkuqkai. Kra chongkuq kai irka, naishiq raq chiiheawea wea wa maiq bom chong tiishowo manphan tai laita atlii chongkuq hai riimak. Naishiq raq maiqmii mak maq, apaiq khushü ngao jonglu ka ümtinkhan wa sitlaq kra chhi wan kai.

¹⁷ Apaiq ma Awejong, Shiikeawe raq Jesuq jonglu ka naishiq ma tiichhikuq wantaq akhing na, naishiq ka kiijaq Jesuq rai adam na asi riikai. Rakaü Hiq we Ajong Shiikeawe raq, Jesuq miitu naishiq ma akha chongkuqto, “Ahata I Se, sekhuq laqlaqse sitlaq kra. Ngi apaiq ma pinthum khoqriiq tiikang!”

¹⁸ Naishiq raq ara bomtsi arka, Shiikeawe raq ramungtan maq abom taikai. Kiitiikaq naishiq ka Jesuq apaiq rai asii hiqlam na adam asi riikai.

¹⁹ Ara ra wa bomtsi saütaq kriika, man na shammibi raq Messia ka misaüho lii nguta chiiriim raüta tra hokuq wantaq kriika, tengto dea nguta bomchong raükha tiipha wan she riito. Arkha maq, nashiq raq shammibi bomchong ka tsan na atsi maq thü laita kam hai jiika nashiq ma ahea miraq. Krai mren, namshiq tarü raq, shammibi raq achongthü tsütsa kiima kam lanta sironglaq. Tsangshiq raq achongkuq tsütsa ka ranyaq mong na piijongteng tlü tlaq ikha maiqse ma wenyi walüli. Ranap rawü rashe midong hoshaq wiiwii ka, piijongteng wanii ka akhek raa tlo. Namshiq mongjii na Jesuq Khristo, ranap Saiqwüpo kra misaüho shaq wiiwii, shammibi bomchong piijongteng kra samhea tiinyai lanta thü ronglaq.

²⁰ Tarü thaq na, ara akhek sap ronglaq. Tsan na tiitsang ronglaq, Asii lakdap wa riisham bomchong thun ka jurmin maiqmii phaqchi maq tru chongkuq lot mak.

²¹ Jamkhano ngukla, riisham bomchong ka, maiqse tsan mong maq adong riimak. Shatmaq Asii Wenyi raq shammibi ka rom raüta, tsangshiq raq Shiikeawe nübok wa tsütsa taitlaq kra chongkuqto.