2 John 1 - ASII LAKDAP Bible (BSI)

¹ Ngi, Phukhu we raq-- Lungwii nyino nyung nai asetiim ma, apaiq ka ngi raq pinthum lungwiitiikang. Kiimaq ngi lam lam li ka riimak, shatmaq tengtlaq bomtsi lungwiiti wiita raq ümniika lungwiitlo.

² Jamkhano ngukla tengteng bomtsi ka nashiq khum na sitlo. Kiimaq nashiq raili pattup pat-sa siruq misi.

³ Shiikea Awe kiimaq Jesuq Khristo, Awe ma Ase raq, nashiq ma kaphap, tiihang, kiimaq hansang mikuq laq; arthun arka nashiq ma tengteng kiimaq lungwiitsii na asi.

Tengteng Bomtsi Nai Lungwii Tsantsii

⁴ Na Wejong Shiikeawe raq nashiq ma aming kuqtaq kra phanphan, ümsetiim phong wa maiq wiijamti ka tengteng bomtsi kra lang raüta shongnga tlaq kra chhi lata, ngi ka kai chochi kang.

⁵ Kiimaq ara chongtiikai arai mren, lungwii nyino nyung lei, nashiq hupli raq riilung riiwii maq singa rong i. Ara ngi raq waiq tiikang arka, bomtsi anye ka riimak. Arka nashiq raq man na aphaji miiphü asap i. Shiikeawe aming irli chongtiikang.

⁶ Ara ngi raq chong tiikang lungwii bomtsi arka, nashiq ka Shiikeawe raq riilung riiwii maq sironglaq nguta aming kuqtaq kra lang laitli sichang. Namshiq raq man na aphaji miiphü tai wan lan ihata, nashiq thaq na Shiikeawe aming sitlaq kriika, nashiq phungmaiqse ka riimang riichan maq sichang nguta chongtlo.

⁷ Maiq lao liiti maiq pahea ka ara mangjong hiq hamli niishe kihoto. Tsangshiq raq Jesuq Khristo ka maiqse han-ngam na poki mak dea nguta arot tra hokuq tlo. Akha bom chongketi ka laopha maiqse. Kiimaq Khristo ma Wesang We.

⁸ Arkha maq, namshiq ka honkam shat maq sirong laq. Naishiq raq ümchuwa hun nü wan kai kra atu na moki mak chang miitu, shatmaq nashiq raq poksi kra kunkun lap wan li chang, honkam shat maq sirong laq.

⁹ Juwa Khristo raq achongkuq bomtsi aming wokhong na simak, aming jin raüta lamjiq nü na kiho tlaq, kriiti ka Shiikeawe rai adam na simak she. Shatmaq juwa Khristo rilung manphan bomtsi chong tlaq kra lang raüta sitlaq, kriiti ka Awejong Shiikeawe kiimaq Ase tsangnai wenai wiita wokhong na sitlo ngushat.

¹⁰ Riita chongtiikang arai mren, jurwa ara tengteng bomtsi ara namshiq ma chongkuq mak, arot chongkuq tlaq, akhiiti shrabi ka namshiq jam na naq tiidii rongkiq. Kiikhiiti miika “Hansang maq silaq,” nguta ramram bomtsi bomke min maimak.

¹¹ Ara jamkhano chongtiikang ngukla, jurwa ajiq shra we ma ramram kuq tlaq, kriiti riimin ajiq we ngarai jaqsham kra pong dam ma mija.

Bomshat Wan

¹² Ngi raq namshiq ma pahea dea chongphan kechang asi. Shatmaq chelap na laktai miika jaram wa mitiinyaq siq; kra rii na, ngi ka pumsii maq namshiq phana walata, namshiq rai mantut na riibom nyiim wa riiwe ka rotiikang. Akha riihai jiika, nashiq kai chochi laita misi rong i.

¹³ Ümniiraq tlungwii tlaü, ümnyino nyung setiim raq ümniima tsangshiq salam bom tiitai tlo.