1 Peter 5 - ASII LAKDAP Bible (BSI)

Shiikeawe Sengi Rümkom Wan

¹ Ngi ka phungtu shunsheati maiqla weshi ngo maq, namshiq phungtu shunsheati maiqlare ma, ara bomtsi ara akhek tiitai rotiikang. Ngi raq i mak maq Khristo chamchao wantaq kra chhi kang she. Kiimaq Khristo ka ümtiikiiwa saüki nong jiiq, ngi riimin apaiq asii khushü, ngao, ningkun kra milap ha nguta kamto maq khelata sitiikang. Ara ningkhan, ngi raq ara namshiq ma tiitai tiipha ara.

² Shiikeawe raq apaiq skuse kong namshiq ma trüm tlaq kra, chochikhiq maq shiikum pan lanta rüm ronglaq. Adam ajo lam miika naq rüm rongkiq. Shiikeawe raq tsangshiq ka jamkhii tiichhan chhi wan ro wa, kiikha tiichhan chhi ronglaq. Sku rüm jaqsham ka laqkhaq lap ma süram lanta naq rüm rongkiq. Shatmaq lungwii tsantsii maq skuse kong ka rüm ronglaq.

³ Nam wokhong na siti phungtuti ka aming khuthaq miika naq shiipuq rongkiq. Shatmaq namshiq maiqmii rilung jaqsham wan tlan kiimaq tiichhi kuq lanta rüm rong laq.

⁴ Namshiq raq akha tsapkapkap maq sku sekong ka rüm han jiila, ümtiikiiwa sku Rümti Ajong Pinthum we ka saüho nongtlaq akhing na, apaiq raq namshiq ma poksi, pattup pat-sa thenki mak phan achhai anyii wa hea la khuphok she mikuq.

⁵ Kiikhiisii hali, namshiq jerobi riimin, maiqlare wokhong na si raa tlo. Kiimaq namshiq wiitarü raq, aranse ma ja lanta, weshi raq weshi shiikum pan raa tlo. Jamkhano ngukla asii bomtsi na akha chongtlo, “Shiikeawe raq angiim boqshatti ka athu riibaiqtlo. Shatmaq aranse ma jati ka lungwii tlo.”

⁶ Aranse ma jalaq, ningkun ajong Shiikeawe jaqkhong na. Kiikha si haüla, apaiq raq akhing hongto angu na, ümniika ra na mido.

⁷ Ümchapa hekiilai ümchuwa sitlaq kra apaiq ma phong kuqlaq. Jamkhano ngukla apaiq raq ümnaq shiikum pantlo.

⁸ Honkam shat rong laq! Khekham si ronglaq! Namjaqti, Thawe ka, namshiq tro na ashi ra kaqphaq hoha jaq nguta, hangsi kaü ikha, agam agu wa la, khum tlo.

⁹ Namshiq ka kamtsan tsii ka pharangrang maq si ronglaq. Apaiq ka long ronglaq. Jamkhano ngukla namshiq raq asap han, namkongtibi kamasham maiqsetiim mangjong tlotli na siti kiimin, kiikhiisii chamchao tlo.

¹⁰ Shatmaq namshiq ka alose chamchao lot jai, phanrap kaphaptiwe, jurwa namshiq ka apaiq pattup pat-sa chhainyii kra Khristo pum lümaq riishake miitu hea wantaq, apaiq raq namshiq ka minhap ma mitiija, kiimaq pharang rang, ningkun, kiimaq tiimeshi mak arang mitiiphakuq wan.

¹¹ Apaiq miili pattup pat-sa ningkun misilaq! Amen.

Bomshat Wan Salam

¹² Ngi raq ara atoqse maq namshiq ma waiq kang. Ara waiq na khrumketi ka Silas. Apaiq ka ngi ma kamasham na tsapkapkap Phungmaiqse phunowe. Ngi raq namshiq ma tsaiji doke wan rotiikang, kiimaq irilung hakhi ke rotiikang, arka riikhaqli Shiikeawe kaphap. Arjaq pharang rang chap ronglaq.

¹³ Namshiq ma nyino-nyung noqku Bebilon na siti, kriimin Shiikeawe raq atsea wan, kriiraq namshiq ma salam tiitai tlo, kiimaq ise Makaq riimin tiitai tlo.

¹⁴ Weshi raq weshi ma Phungmaiqse lungwii thea riishup lanta tao ronglaq. Khristo wokhong na siti namshiq tarü ma hansang mirlaq.