1 Peter 1 - ASII LAKDAP Bible (BSI)

¹ Ngi, Petar, Jesuq Khristo kiimwe raq-- Shiikeawe raq raq atsea wan maiqsetiim, munglu wanshanok ma ja raüta, Pontas wang, Galatia wang, Kapadosia wang, Asia wang, kiimaq Bithinia wang na riinyin riishin sitibi ma tiiho wan tiikang.

² Namshiq ka Shiikea Awe raq seng raüta thapthi wantaq kra phan tseatsiiq wanto. Raüta Asii Wenyi raq asii maiqsetiim miishe tiija wanto. Arka Jesuq Khristo aming wokhong na siwan miitu kiimaq apaiq tiijai maq tiisii hebaiq wan miitu tsea wanto. Kaphap kiimaq hansang ka namshiq ma asho awo misilaq.

Nashiq Ka Atra Rilung Miitu Ran Tiikai

³ Nashiq raq Shiikeawe, nashiq Tati Jesuq Khristo ma Awejong ma kechutum rong i! Apaiq raq nashiq ka, apaiq mongpo pankuq li khan lungwii tlo. Kriikha maq, apaiq raq Jesuq Khristo ka amaa wa tiidong wan raüta, nashiq ma rilung anye kuqto she. Ara kam tiikai arka moki mak phan.

⁴ Arkha miitiina, nashiq raq mongngam maq, Shiikeawe raq asengi ma kewan miitu achu shiiman alüm alei, jonghea tiije thü tlaq kra, milap rong i she dongdii nguta khekham maq sitiikai. Shiikeawe raq kra achu shiiman tum thun kra, namshiq miitu ramungtan na thü tiije tlo. Kra achu shiiman thun kriika, ariim kai chang phan ka riimak. Kriika ümtiikiimin riimki mak phan. Kiimaq athen min thenki mak phan. Kiimaq amiinu ka ajomkai chang phan min riimak.

⁵ Shiikeawe raq namshiq ka, apaiq ningkun jonghea rüm tlaq kriimaq, namshiq ka tiiwong shat maq rüm tlo. Arka namshiq raq Khristo ma kamtsantsii rüm tlan kriikha maq, Shiikeawe raq namshiq ka tiikhup wongkuq shat maq rüm tlo. Krai mren namshiq ka tsailam jilam miishe Shiikeawe raq mitiichhii kuq dongdii nguta kamto maq sirong laq. Riita, ara chongtiikai tiichhii wan rilung ka, namshiq ma Phangthum ranaiq niishetiq kunkun mitiihong kuq wan.

⁶ Ümchaü jaqlo miitu namshiq ka phanrap phanrii, chamchao litkot walü mong maq lea wan chang li siraü min, namshiq wiitarü chojong chise miili sironglaq.

⁷ Ara chamchao litkot riihum tlan arka, namshiq kamasham ka awongsii dea nguta chen tlo. Chaq ka athen kai chang hupsam. Shatmaq wa maq tiijo chaq raütiitiq chen tlo. Krai mren, sii hali, namshiq kamasham ka ara chongtiikai chaq piikii thaq niimin ara phan. Kriikha maq, chamchao wa maq tiikhiim chaq raüta chen tlo. Kra riihan jiitiq, Jesuq Khristo saükai akhing na, Shiikeawe raq namshiq kamasham ka mishom ra. Kiimaq namshiq khushü ka mijong. Kiimaq ashreng miraq.

⁸ Namshiq raq apaiq ka nammak maq chhi man li jiimin lungwii tlan. Kiimaq namshiq raq apaiq sham ka ümchaü chhiman li jiimin, apaiq ma kam tlan. Riita ara ningkhan, ümchaü namshiq ka kai khoqriiq tlan. Kiimaq achhai anyii chochi, nü maq chonglot mai chang phan chochi hum tlan.

⁹ Namshiq raq ara chochi rilung lam phan tlan arka, namshiq tsaiji ka Shiikeawe raq tiichhii wan tlaq kha maq chochi tlan. Arka apaiq ma namshiq kamtsantsii thü tlan kriithaq na seng raüta tiichhii kuq tlo.

¹⁰ Riita ara chong tiikai tiichhii wan rilung ara miitu tiina, man na pat wa shammibi thun raq kai rashi hiqwia maq ritkot wantaq. Raüta tsangshiq raq ümchaü namshiq raq Shiikeawe kongphiq pattup pat-sa rilung lap wan lan ara tiithai chong kuq thiito.

¹¹ Tsangshiq riika ara kupi wan akhing ranaiq ka ümtincho wa miraq, kiimaq arka jamkhiiwa miku pi wan, kriithun ka wiita sap lot haijaq nguta shiichaq sidi wanto. Khristo Wenyi tsangshiq shammibi khum na tiipum raüta phanchan kuq wantaq ka, ara chongtiikai ümchaü kupi wantaq akhing ranaiq arshe riito. Kra tiithai kuqtaq bomtsi ka, Khristo ka pinthum chamchao riihum wan chang miraq nguta chongto. Kra chamchao walü lea wan lot raütiitiq, apaiq achai anyii khushü ka jonghea mijong wan nguta chongthüto.

¹² Shiikeawe raq ara man na sithü taq shammibi ma tiichhi kuq wanto. Tsangshiq raq shammi jaqsham wan tlaq ka, tsangshiq miitu ka riimak. Shatmaq, ümchaü pat na, namshiq sitlan ara miitu miraq nguta chongkuqto. Kra shammibi raq, man na pat na jamlai wa phanchan kuq taq, kriishe ümchaü pat na namshiq ma Tsütsa Ahea chongphan ketibi riishe tiitai kuq tlo. Tsangshiq raq namshiq ma ara, Tsütsa Ahea tra hokuq tlaq thaq na, Shiikeawe raq ramungtan wa atiiki Asii Wenyi raq tsangshiq tsütsa chongke ka, tsangshiq khum na arom riiraüta chongkuq tlo. Ara chongtiikai Shiikeawe jaqsham ahata ra na siti rasetiim raq dongdii min sap n dam haijaq nguta ümtinkhan wa tsinngin tlo.

Phungmaiqse Ka Asii Maq Sichang

¹³ Riita ara chong tiikai arai mren, namtsan tsii ka tiije shat maq sironglaq. Honkam shat maq sironglaq. Kiimaq namtsan tsii ka Jesuq Khristo ümtiikaq ranaiq wa saüki tlaq, kra akhing na namshiq raq lap wan chang achu shiiman jonghea sitlaq, kra thaq na tiitsi lanta singa ronglaq.

¹⁴ Shiikeawe bomchong ka phaqchii nichii maq tai ronglaq. Ümchaü sanha, namrilung ka man na, jam min sap man lea wan lan akhing wa tiima tsantsii maq naq tiijam sha rongkiq she.

¹⁵ Kra rii na ümchaü sanha, namrilung ka siirairai she thü rong laq. Namshiq raq phanrap jaqsham tlan na, asii arai maq sham lanta sirong laq. Namshiq hea wanti we Shiikeawe ka jamkho asii sitlaq, kiikhiisii namshiq min asii si rong laq.

¹⁶ Asii bomtsi na Shiikeawe raq, “Ngi jamkho asii sitiikang, akhiisii namshiq min asii siraa tlo,” nguta chongtlo.

¹⁷ Namshiq raq achu jaü tlan na Shiikeawe nangnga, “I We lei,” nguta riibom tlan. Apaiq raq maiqse angu wiitarü ma, mren mra maq shin kuq tlo. Maiqse pum loweatek raq, maiqmii raq jaq maq jamkho Shiikeawe lamphan ka shiithuk rai tlaq, kra tiiphanphan phokuq tlo. Arkha maq, namshiq ka mangjong hiq na ümchu ranaiq wa sithü tlan, kra liipan na Shiikeawe ma haisong tsantsii rümshat maq shonga lanta sironglaq.

¹⁸ Jamkhano ngukla, namshiq raq asap han, namrilung ka namtitiim raq akuq thü thiihü rilung kra daa wan miitu athii kuq wantaq kra asap han. Kriika atiithen baiq chang phan kampho riimakla chaq ikha hupsam ka riimak.

¹⁹ Kra ri chang ka athii tsinhea, Jesuq Khristo ka skuse ashi, akhum na jamlai phan kojo min ahü, siirairai rilung khum ka honglu na takuqtaq kra lümaq ari wan.

²⁰ Jesuq Khristo ka Shiikeawe raq man na, ara rapha hiqwa min mishaq niiphü dongdii, namshiq chhiike wan miitu atsea arwan. Kra tsea wantaq kriishe ümchaü pat na, ara phangthum wan pat niishe namshiq ka tiichhii kuq wan tlo. Riita ara pat arka ümchaü athum wan nini she.

²¹ Riita, apaiq pum lümiishe namshiq raq Shiikeawe ma kamwan lan. Apaiq ka Shiikeawe raq amaa wa tiidong wanto she. Raüta apaiq ma Shiikeawe raq achhai anyii khushü jonghea kuqto she. Krai mren, namshiq raq kamtsantsii thü tlan kriika, Shiikeawe raq mikuq dongdii. Kriika poiki mak she.

Riilung Riiwii Rilung

²² Riita ümchaü sanha, namshiq raq Khristo aming thun ka lang lantiishe sitlan. Krai mren, namshiq ngarai ka diikuqto she. Kiimaq namshiq ka ümchaü sanha wenyi na asii maiqsetiim ngutiishe sitlan. Ümchaü sanha asii maiqsetiim ngo kha maq, namshiq kamasham maiqsetiim liipan na riilung riiwii maq sitlan. Krai mren, ümchaü sanha namshiq raq, kongti ka tsan nai mongjii wiita kuq lanta lungwii rong laq. Kiimaq namshiq lungwii tsantsii rüm tlan kriika siirairai riichang.

²³ Namshiq ma Awe ka Shiikeawe. Apaiq raq namshiq ma rilung anye she kuqto. Apaiq ka atsaiti riimak, shatmaq tsai mak phan. Kiimaq apaiq raq namshiq ma, apaiq bomtsi Tsütsa Ahea lümaq namshiq rilung anye kuqto. Asii bomtsi ka pattup atra siruq phan. Arka thenki mak phan.

²⁴ Asii bomtsi na akha chongtlo, “Maiqse angu ka sangphii cham tlaq ikhli, kiimaq tsangshiq jongla khushü kiimin rum wa pepü ikhli. Sangphii ka ashin riiki tlo, kiimaq pepü kiimin hiq na rokki tlo.

²⁵ Shatmaq Shiikeawe bomtsi ka athen kai nguta ahü, pattup pat-sa atra li sitlo.” Riita ara bomtsi ahata, Tsütsa Ahea, namshiq ma chongkuq wantaq kra.