OBADIAH 1 - Kathara Bible (BSI)

¹ Obadiahli rāmahākhami. Edomwui pongli Proho VAREna hithāda hānga. Ithumna Prohowui eina pao shāhaira, kala yurbingwui ngachaili paome akha chihovāda hānghaira: “Ngakarthuilu, ithum Edomli vāda rai atausa!”

² Yanglu, yurbingwui ngachaili ina nali teongasakra, nali yangkateolakhaora.

³ Nawui ning lāngkasona na khalattali chipathaira, lungkai kajui ngachaili pamda, “Ili khipāna ngakhuntāshaprakhala?” da nakhalatta phaninga.

⁴ Nana khalāng thāda kajuiva̱li leilala, athip sirā ngachaili sāhailala, ina nali chiwui eina sheitāra, da Prohona hānga.

⁵ Ngayāshong nawuili khalebing raakha kathāda nawui ot ngaponkhala? Athumwui khuishapmāng makhuimarala? Drakhāthei rāleeakha athumna atham makataimila phāthuiserhaorala?

⁶ Esauli kathāda ngaponhao, awui lan kathāda phāshokhao!

⁷ Nawui sakkharumabingna nali chipathaira, athumna nali thari akatang vāshungda kashamvāhaira; nawui khamashitabingna nali yuihaira; nana shitkasangabingna nali khalen sanghaira— chi theikakhuila maleilakthura.

⁸ Chithang ina Edomwui thangkhamabing, Esau Kaphungwui theishingkhuikatheibing, mashimān ngasakmarala? da Prohona hānga.

⁹ Nawui kapingabing khananghaora, O Teman, chieina Esau Kaphungli kapambing kachiva̱ yaithattuphaora.

¹⁰ Nagato Jacobli shaokathatwui vang, na maishiphalungra kala katatchaohaora.

¹¹ Na khalāthak eina nganingda, makathei kha̱mina awui lan phungthuithang, yur kateina awui ngaveili rāzangda Jerusalem kalā yangvaithang, nala athumwui ngachaili kazang akha thāhaowa.

¹² Kha nachinā kalāshithang na maringphā ngayimana, Judah shimānthang mamathān ngayimana; khanangthang na malangso ngayimana.

¹³ Iwui miyur chotchangthang na awui ngavei makānzang ngayimana; awui kalāshāt zimiksholi na mamathān ngayimana; a sipsāthang na awui ot mazangngaponkhui ngayimana.

¹⁴ Shongpākli nganingda yāmkashokbingli masāthat ngayimana; khanangthang kharingabingli yangkashebingwui pāngli mahorsangmi ngayimana.

Yurbingli Varena Bichar Sāra

¹⁵ “Khikhalajila yur saikorali Prohowui atam rākida nganailakhaira. Nana sākahai tākam eina nalila sāmira, nawui otsak chi nali latungra.

¹⁶ Kaja nana iwui kathara kaphungli khamang thāda, kuimareida khalei yurbingnala mangra; athumna mangra, yuichāngchāng zatra kala shimānhaora.

Israelwui Khayui

¹⁷ Kha yāmkashokbing Zion kaphungli kazipra, kala hi kathara ngasāra; kala Jacobshi shimkhurna ashiwui shimlui khuipapamra.

¹⁸ Jacobshi shimkhur mei thāra, kala Josephshi shimkhurna meiwon thāra; Esaushi shimkhurna lanji thāda; athumli thottāra kala chuitup tāhaora, kala Esaushi shimkhur khipākha maringshokmara; kaja Prohona hāngkahaina.

¹⁹ “Negebnaona Esau kaphung khuira, kala Shephelah naona Philistine ngalei khuira, kala athumna Ephraim eina Samaria ngalei khuira, kala Benjaminshina Gilead khuira.

²⁰ Halahli raithā kahai Israelnaobingna, Phoenicia eina thuida Zarephath vāshungda khuira; Sepharadli raithā kahai Jerusalemnaobingna Nageb keinungbing khuira.

²¹ Kharingabingna Zion kaphung kāda Esau kaphungli mungra; kala wungram chi Prohowui ngasāhaora.”