CHAPCHĀT 1 - Kathara Bible (BSI)

Jerusalemwui Kakhanang

¹ Kathāda ngachakyāng eina pamli! Mi chiyākha nganotkasā keinung chi! Kathāda ra̱meiva̱ kathā ngasāhao, yurbingwui ngachaili hakmahālak eina leikasāpāva̱ chi! Keinungbingwui alungli philava̱ sākasāva̱ chi shainao sāthuihaira.

² Ana ngayā pongda soso chapa, maisor chāra̱na pemda; awui leishikasābing ngachaiwui eina ali ninglum khavai khipākha maleimana; awui ngasotnao saikorana ali yomshināmhaira, athum awui yangkashe sāthuiserhaira.

³ Kachotkachāngwui vang eina Judahli raithāhaira, kala kakhananga raonao sāthuihaira; ara ana yurbingwui alungli pamzata, kha ngasām khavai masamphangmana; awui kakhanangwui alungli ali kakharomabingna ngaphankhuiserhaira.

⁴ Zionli vākhavai shongfa sifaya, kaja langchin sākahai phanitli khipākha marāmana; awui ngavei saikora ngachakyānghaira, awui pāngmonbingna sifaya; anao ngalāva̱bingli shimenthuihaira akhalattala khanang kachangkhathaira.

⁵ Awui yangkashebingna akhavā sāhaira, awui yanggshebingna mataisanga, khikhalajila Prohona ali khanang ngasaka, awui khayonkhamāng chungnā kahaiwui vang; anaongarā thuihaira, yangkashebingwui mangāli narkahaiabing sāthuihaira.

⁶ Zionwui naongalāva̱wui eina awui khayākakā thuiserhaira. Awui wungnaobing seizāt makhalei khangaichao thāhaira; sākharengnaowui eina pangshap maleila yāma.

⁷ Kakhanang ringkashi atamli achālakha awui aman kasak otyur chi Jerusalemna phaningunga. Awui mibingna yangkashebingwui pāngli tākazang tharan, kala ali ngachonmi khavai khipākha maleikasā tharan, yangkashebingna zeikharuida awui kongkhaluili mana̱rora.

⁸ Jerusalemna zakshilāk eina morei sai, chiwui vang a khamakhao ngasā kahaina; ali khayāshikasā saikorana ali ningkachaiya, kaja awui khamahong athumna theihaira; mha, akhalattana ngahuiya kala amai ngareithuihaowa.

⁹ Awui makathar chi awui kashanli kāsai, awui kathi ana maphaningmana; chiwui vang eina awui kongkhalui zakshilāka, ali ninglum khavai khipākha maleimana. O Proho, iwui kakhanang khayangmilu, kaja yangkashebingna yuihaira!

¹⁰ Awui aman kasaka otyur saikora, yangkashena ngapaithuihaira; Mha, yurbingna awui kathara shimli kaikazang ana theihaira, nana nawui kakazipli mazangpāimara kaji athum chi.

¹¹ Awui mibingna kashakazā ngahuilaga phāzata; athumwui yāng samphanglui khavai athumwui lan kashakazāwui vang yorzai. “Yanglu, O Proho, yangtāmilu, kaja ili ningkachaihaira.”

¹² “Rākhamakān nathum saikora, nathumwui vang chi khikha maningthula? Prohona malungvātlākhaithang, ana iwuitungli kakhanang khuirākhami thāda kakhanang katheihairala?

¹³ “Atungshongwui eina ira̱kuili mei chihotai; ipheiwui vang ana khalen sanga; kala ili konglui ngasaka; ana ili nganingung haimihaira, langpongda vānngasaka.

¹⁴ “Iwui khayonkhamāng hupta kaziplaga iwui kashaili khalapshānmi, apāng eina saikora chi khalapshānmi; chibing chi ikahungli parmihai; ana iwui yāng shimān ngasaka; ina mangasungkharar athumwui pāngli Prohona ili horsangmihaowa.”

¹⁵ “Iwui kapinga saikorali Prohona machāpmimana; iwui yaronnaobing sākazammi khavai ili makhamayāwui kazip akha hokhui; drakhāra̱ kasurli naikakazam thāda Judahwui kachinga naongalāva̱li Prohona naikazama.”

¹⁶ “Hibingwui vang ina chapta imikli chāra̱ longtai; kaja yangdhar chishotmi khavai, ninglumi khavai iwui eina katāva̱ thuihaowa, iwui naomayarabing ngachakyānghaira, kaja yangkashena yuihaowa.

¹⁷ “Zionna apāng katingshoka; kha ali ninglum khavai khipākha maleimana; Jacobli yangshi khavai Prohona khongnainaoli kasohaira; athumwui alungli Jerusalem khamakhao ngasāthuihaira.

¹⁸ “Prohova khamashung pamli lei, kaja ina awui tuili ngakaishihaowa, kha nathum saikora, nganālu, kala yanglu iwui kachotkachāng yanglu; iwui ngalānaobing eina iwui yaronnaobing tukthuiserhaira.

¹⁹ “Iwui leikashebingli ina ngakaowa, kha athumna ili minamhaowa, iwui pāngmonbing kala khararnaobingla pangshap samphang khavai kashakazā phāzatlakha, keinunglungli shimānhaowa.

²⁰ “Yanglu, O Proho, kaja I kachotlungli lei, imanglā kakhananglungli lei, iwuklungli ining shireikazamhaira, kaja ina ngakaishishunhaowa, chānreilungli raighai eina thingasaka, shimlungli kathi kathāna.

²¹ “Nganālu, ina kathāda ngahuili; ili ninglum khangasak khipākha maleimana. Iwui yangkashe saikorana iwui kakhanang shāhaira; hi nana kasāna da athumna ringphai. Nana chishāt kahai zimiksho chi khuirālu athumla iwui hitharanu.

²² “Iwui khayonkhamāngwui vang ili kasā thāda athumwui makaphā kasā theimida tandi milu, kaja iwui khangahui mahāngrarmana kala iwui ning vānhaira.”