Матта 28 - Гирами Китаб

Иса чӀиви хьуб

¹ Султ йигъ улдубчӀвну, гьяфтайин садпи, яна элгьет йигъан сигьрин ухди, Магдалайиан вуйи Марʼямна тмуну Марʼям Исайин накьвдиз лигуз гъюру.

² Сабпну зарбди жилар тӀурччвуру, фицики аьршариан Аллагьдин малайик гъюру ва, накьдихь гьипнайи гъван гьидипну, дидʼин деъру.

³ Дугъан рябкъюб кьюркьлин цӀасиб, палат лизи йифсиб вуйи.

⁴ Дугъхьан гучӀ гъабхьи гъаравларин жандиъ зиз абхънийи, дурар майтарси гъахьнийи.

⁵ Малайикди, чӀалниина дуфну, дишагьлийириз гъапи: – ГучӀ мапӀанай, учву дариз гъизигу Иса агури дуфнайиб аьгъязуз.

⁶ Амма Думу мушваъ имдар. Думу, Чав гъапиганси, чӀиви гъахьну. Багахь духьну, Думу дитну гъахьи йишваз лигай.

⁷ Тяди душну, Дугъан ученикариз йипай: «Иса гъачӀир чӀиви гъахьну. Думу учвутӀан ухди Галилейиъ хьиди, душваъ Думу рякъидичвуз. Магьа, узу учвуз йиз кӀуруб гъапунза».

⁸ Дурар дишлади накьвдихьан гьудучӀвну, гучӀ кабхъну ва кьадар адрукьан шадра духьну, ученикариз цӀийи чӀал апӀуз, жаргъури гъушу.

⁹ Сабпну Иса Учв дурарин улихьна гьудучӀвуру, салам тувру. Дурарра, Исайиз багахь духьну, Дугъан ликар хаблан дапӀну, Дугъаз икрамнаъ дахьу.

¹⁰ Гьадмуган Исайи дурариз кӀуру: – ГучӀ мапӀанай. Душну, Йиз гъардшариз, Галилейиз гъарахай, кӀуру хабар тувай, душваъ дурариз Узу рякъиди.

Гъаравлариз гъабхьиб

¹¹ Дишагьлийир рякъюъ имиди, гъаравларикан бязидари шагьриз дуфну, варибдикан аьхюну маллйириз ктибтнийи.

¹² Мурарира, аьхюдарихъди сатӀиди мясляаьт дапӀну, эскрариз бегьемди пул тувру ва кӀуру:

¹³ – Варидариз йипайки: «Йишвну, учу даахну имиди, Дугъан ученикар дуфну, Думу жин дапӀну гъурхну».

¹⁴ Нагагь му хабар гьюкумдрихьна хъубкьиш, учу учвуз гаф дяргъруганси апӀидича.

¹⁵ Дурари, пул гъадабгъну, чпиз гъапибси гъапӀнийи. Хъа гьаму аваза жугьдарин арайиъ гъира дарабгъну ими.

Ученикариз вуйи Исайин табшуругъ

¹⁶ Хъа йицӀисар ученик Галилейиз Исайи гъарахай гъапи дагъдиина гъафнийи.

¹⁷ Думу гъяркъиган, дурар икрамнаъ дахьнийи, амма сакьюдар шаклу гъахьнийи.

¹⁸ Багахьна дуфну, Исайи дурариз гъапи: – Узуз завариин ва жилариин вари гьюкум тувназуз.

¹⁹ Гьаци вуйиган, душну, Адашдин, Балин ва Гирами Рюгьнан ччвурнахъан штуан апӀури, вари миллетарикан Йиз ученикар апӀинай.

²⁰ Дурариз Узу учвуз табшурмиш гъапӀкьандар вари кӀули гъахуз улупай. Хъа Узу, гъиямат йигъ хьайизкьан, гьаммишан учвухъди хьидиза.