Матта 27 - Гирами Китаб

Иса Пилатдихьна хуб

¹ ГвачӀин улубкьиган, вари аьхю маллйирина аьхюдари, уч духьну, Иса йикӀуз къарар адабгънийи.

² Дугъан хилар-ликар йитӀуз гъитну, Думу духну, Римди Ягьудияйиъ гьюкумдар вуди дерккнайи Понтий Пилатдин хилиз тувру.

³ Гьадмуган Иса масу туву Ягьудайи, Думу йикӀуз ккайиб аьгъю дубхьну, чав гъапӀубдиин швумал духьну, сумчӀур арсран манат аьхюну маллйирихьна ва аьхюдарихьна кьяляхъ тувнийи.

⁴ Дугъу дурариз гъапнийи: – Тахсирсуз кас масу тувну, гунагь шлу ляхин гъапӀунза. Дурарира гъапнийи: – Ич дидихъ фу хъа? Думу яв гъайгъу ву.

⁵ Ягьуда, арсар Аллагьдин хулаз гатӀахьну, душну, чав учв ккирхну йикӀуру.

⁶ Аьхюну маллйири, арсран пулар гъадагъну, гъапи: – Мурар Аллагьдин хулан хазнайиъ дивуз хай шулдар, фицики дурар ифдихъ туву кьимат ву.

⁷ Мясляаьт дапӀну, яд агьалйир кивбан бадали, арсран пуларихъ, сар гъабар апӀру устайин хутӀил гъадабгънийи.

⁸ Гьаддиз гьадму хутӀлиз гьамусра «Ифдин хутӀил» кӀури ими.

⁹ Гьамци Еремия пайгъамбрин мелзналан гъапи гьаму гафар кӀулиз удучӀвну: «Израилин халкьди Дугъан кьимат вуди дебкку сумчӀур арсран манат гъибиснийи

¹⁰ ва, узуз Агъайи апӀин гъапиганси, сар гъабар апӀру устайин хутӀлихъ тувнийи».

Иса Пилатдин улихь

¹¹ Иса гьюкумдрин улихь деркку, гьюкумдри Исайихьан гьерху: – Уву «жугьдарин Паччагь» вуна? Исайи гъапи: – Уву гьаци кӀурава.

¹² Маллйирина аьхюдари Исайик тахсрар кирчруган, Дугъу дурариз саб жавабра тувундайи.

¹³ Гьадмуган Пилатди Дугъаз кӀуру: – Увуз къаршу вуди фукьан шагьидвалар апӀураш, ебхьурадарнуз?

¹⁴ Исайи саб гафнииндикьан жавабра тувундайи, хъа гьюкумдар мидʼин гизаф мюгьтал гъахьнийи.

¹⁵ Пасхайин машкварган, гьюкумдри, халкьди тӀалаб гъапӀган, сар дидиснайир деетру аьдат ади гъабхьнийи.

Пилатдин Иса йикӀбан къарар

¹⁶ Гьадму вахтна дустагъдиъ Варава кӀуру вардин мелзниин али чӀуру кас айи.

¹⁷ Вари уч гъашиган, Пилатди дурарихьан гьерхру: – Узу фуж деетну ккундучвуз: Варава, дарш Месигь ву кӀурайи Иса?

¹⁸ Пилатдиз дурари Иса бахилвалиан масу тувнайиваликан аьгъяйи.

¹⁹ Пилат суд апӀру йишвʼин деънайи вахтна, дугъан хпири дугъаз гьамци пуз гъуллугъчи гьаънийи: – Гьадму марцци Касдин суд апӀбахьан ярхла йихь, гьаз гъапиш узуз сан Дугъкан гучӀ ккапӀру нивкӀ гъябкъюнзуз.

²⁰ Хъа маллйирина аьхюдари халкь, Варава ккадаъну, Иса пуч апӀуб ккун апӀинай, кӀури, алауру.

²¹ Гьадмуган Пилатди гьерхру: – Гьамрарикан узу фуж деетну ккундучвуз? Дурари: «Варава», – гъапнийи.

²² Пилатди дурарихьан гьерхру: – Хъа Месигь ву кӀурайи Исайикан гьапӀза? Варидари: «Думу дариз зиг», – кӀуру.

²³ – Фу чӀуруб гъапӀнухъа Мугъу? – кӀуру дурариз Пилатди. Амма дурари имбубсан артухъ чӀигъар апӀуйи: – Думу хачрак карс!

²⁴ ФтикӀа кюмек дарапӀрайиб ва халкьдик гъалабулугъ кабхърайиб дябкъну, Пилатди, шид хуз гъитну, чан хилар дижикӀну, кӀуру: – Узу Му марцци Касдин ифи удубзбан тахсиркар дарза, учвуз ккуниси апӀинай.

²⁵ Дугъаз жаваб вуди вари халкьди гъапи: – Дугъан ифи учʼин ва ич веледариин гъубзри.

²⁶ Гьадмуган Пилатди дурарихьна Варава деетуру. Иса кӀуруш, гъирмажарихьди дурччвну, хачрак карсуз эскрарин хилиз тувру.

Эскрарин аьрвалар

²⁷ Гьадмуган эскрари Иса гьюкумдрин гьяятдиз гъахуру, Дугълан вари эскрарин десте илтӀибшуру.

²⁸ Думу гъяцӀал дапӀну, Дугъʼин аку-элвен халат алабхьуру.

²⁹ Зазарикан тажсиб дапӀну, Дугъан кӀулʼин улубкӀуру ва Дугъан арччул хилиъ маргъ ивру, хъа Дугъан улихь кьамкьариина ис духьну, «Яшамиш ишри жугьдарин Паччагь» кӀури, бегьем кялхъюз хъюгъру.

³⁰ Хъасин, тутйир алатӀури, хилʼан маргъ уьчӀюбгъну, Дугъан кӀуллан йивуз хъюгънийи.

³¹ Исайиина бегьем аьрвалар хублан кьяляхъ, Дугъхъан халат хъидибтну, Дугъʼин Чан палтар алахьуру ва хачрак карсуз гъахуру.

³² Шагьриан удучӀвурайиган, дурариз Симон кӀуру сар Киринеяжви алахъуру. Думу Иса дариз зигру хачсиб дарагъаж гъабхуз мажбур апӀуру.

³³ «Келле» мяна айи Голгофа кӀуру йишвʼина гъафиган,

³⁴ Дугъаз убхъуз сиб кипнайи чяхир тувру. Дугъаз, думу дадмиш дапӀну, убхъуз ккун гъабхьундайи.

³⁵ Иса дариз гъизигхъан, эскрари, тупут ипри, Дугъан палтар чпин арайиъ пай гъапӀу.

³⁶ Дурар Иса гъаравлиъ уьрхюри деъну, гъузу.

³⁷ Исайин кӀулихъ, Дугъан тахсир улупнайи гьамциб кьул кебху: «Му Иса, жугьдарин паччагь ву».

³⁸ Исайихъди хъана кьюр гъачагъра – сар Дугъан арччул, тмунур гагул гъвалхъанди – дариз гъизигнийи.

^39-40 Душвхьантина гьудучӀвну гъягърудари Дугъаз люкьнар апӀуйи, намуссуз кӀуруганси кӀулар тӀурччвуйи ва кӀуйи: – Эй Аллагьдин хал дабгърур ва шубуд йигъан диврур! Уву Аллагьдин Бай вуш, Уву уьрх ва хачракан кудучӀв.

⁴¹ Гьаму саягъниинди аьхю маллйирира, къанунчйирихъдина аьхюдарихъди сатӀиди Исайик кялхъри, кӀуйи:

⁴² – Жарадар уьрхюйи, гьамус Чахьан Учв уьрхюз шуладар! Думу Израилин Паччагь дарин? Гъит гьамус хачракан кудучӀври, ва гьадмуган Дугъахъ хъугъархьа!

⁴³ Дугъу Аллагьдик миж кивнайи. «Узу Аллагьдин Бай вуза», – КӀурайир, Думу, Аллагьдиз Гирамир вуш, Аллагьди уьрхри.

⁴⁴ Гьацира Дугъахъди дариз дизигнайи гъачгъарра Дугъак кялхъюйи.

⁴⁵ Лисунган вари жилар мучӀушну ккаъру. Гьамци шубуб сяаьтнаъ гъубзнийи.

⁴⁶ Хъа сяаьт шубубдихьна Исайи зарбди чӀигъ апӀуру: – Эли! Эли! Лама савахфани? – яна: «Я Адаш! Я Адаш! Уву Узу гьаз гъитунва?»

⁴⁷ Душвахь хьайидарикан бязидариз му гафар ерхьуру ва кӀуру: – Дугъу Илʼяс пайгъамбриз дих апӀура.

⁴⁸ Гьадмусяаьт дурарикан сар, жаргъну дуфну, бамбагсибдиин учӀвру чяхир улубзну, думу маргълиинди, убхъуз кӀури, Дугъан ушвнихьна гьачӀабккуру.

⁴⁹ Тмундари гъапи: – Гъит Думу Чан гьялнаъ, гьеле Думу уьрхюз Илʼяс гъюруш, лигурхьа.

Исайин аьжал

⁵⁰ Исайи хъанара зарбди чӀигъ апӀуру, ва Дугъу Чан жан тувру.

⁵¹ Сабпну Аллагьдин хулаъ гьебхнайи перде, зиълан исина дячӀябгъну, кьюб швур шулу, жилар дутӀурччвну, гъарзар-гъванар тӀуркӀуру.

⁵² Накьвар ачмиш духьну, гизаф марцци касар чӀиви шулу.

⁵³ Иса чӀиви хьублан кьяляхъ, накьвариан удучӀву марцци касар Ерусалимдиз гъафнийи ва душваъ дурар гизафдариз гъяркънийи.

⁵⁴ Исайин гъаравлиъ айи юзбашийина дугъахъди хъайи эскрари, жилар тӀурччвувал ва мушвʼин гъаши жара гьядисйир гъяркъиган, бегьем гучӀ кабхъну, гъапи: – Му дугъриданра Аллагьдин Бай вуйиштӀан.

⁵⁵ Гьацира, Исайиз гъуллугъ апӀуз кӀури, Дугъахъди Галилейиан дуфнайи гизаф дишагьлийирра, ярхлаан лигури, дийигънайи.

⁵⁶ Дурарин арайиъ Магдалайиан вуйи Марʼям, Якьубдинна Юсуфдин дада вуйи Марʼям ва Зеведейин хпирра айи.

⁵⁷ Хябяхъ гъабшиган, Исайин ученик Аримафейиан вуйи Юсуф кӀуру сар девлетлу кас гъюру.

⁵⁸ Дугъу, Пилатдихьна дуфну, Исайин беден чахьна тувуб тӀалаб гъапӀу. Пилатдира Думу тувуз амур апӀуру.

⁵⁹ Юсуфди Исайин беден кадабгъну, думу марцци ирин кафнигъян гъидиржуру.

⁶⁰ Хъасин гъарзариъ утӀубкнайи чан хусуси таза накьвдиъ Дугъан беден ивнийи ва, душваз учӀврушвахь аьхю гъван гьипну, гъушнийи.

⁶¹ Магдалайиан вуйи Марʼямна тмуну Марʼям накьвдин гъаншариъ деъну гъузру.

⁶² Хъайигъан – му султ йигъ вуйи – аьхюну маллйирина фарисйири, Пилатдихьна дуфну,

⁶³ гьамци кӀуру: – Ич аьхюр, гьадму КучӀляхри, Чав чӀивиди имиди: «Узу гъачӀихъан шубуд йигълан чӀиви хьидиза», – гъапиб кӀваина гъафнийич.

⁶⁴ Гьаци вуйиган, шубуд йигъ улдубчӀвайиз, накьв ужуди уьбхюз амур апӀин, даршиш Дугъан ученикари беден жин дапӀну, хъасин халкьдиз: «Думу гъачӀихъан чӀиви гъахьну», – пиди, хъа му кучӀал сабпибтӀан писуб хьибди.

⁶⁵ Пилатди дурариз гъапи: – Магьа учвуз гъаравлар, учвуз аьгъюганси накьв уьбхяй.

⁶⁶ Дурарира, душну, гъаравлар дерккнийи. Дидихъ хъайи гъван мюгькам дапӀну, дидʼин пичат алабснийи.