Матта 26 - Гирами Китаб

Иса йикӀуз кьаст апӀуб

¹ Вари гьаму гафар дупну ккудукӀхъан, Исайи Чан ученикариз кӀуру:

² – Учвуз аьгъячвузки, кьюд йигълан Пасхайин машквар хьибди ва Инсаниятдин Бай хачриин дариз зигбан бадали душмнарин хилиз тувди.

³ Гьадму вахтна аьхю маллйирна аьхюдар Каяфа кӀуру аьхюну маллайин гьяятдиъ уч духьнайи.

⁴ Дурари, аьмалдарвалиинди дидисну, Иса йикӀуз йикьрар апӀуру.

⁵ Амма дурари гьамци гъапнийи: – Анжагъ машквар йигъан ваъ, фицики халкьдик гъалабулугъ кабхъди.

Вифанияйиъ

⁶ Иса Вифанияйиъ хамран аьзар кади гъаши Шимондин хулаъ айи вахтна,

⁷ Дугъан багахьна, лизи ругдин бетисибдиъди багьа ягъра хьади, сар дишагьли гъюру. Дугъу гутдиз гъюн йивну илдигънайи Исайин кӀулʼин ягъ улубзуру.

⁸ Му гъябкъю ученикарик, хъял кубчӀвру. Дурари: – Гьамкьан ицци ниъ хъайи ягъ мугъу гьаз чӀур гъапӀу?

⁹ Му аьхю кьиматнахъ масу тувну, пул касибариз пай апӀуз шулийда, – кӀуйи.

¹⁰ Дурарин гъавриъ ахъу Исайи кӀуру: – Дишагьлийиз нач шлуси гьаз кӀурачва? Узу бадали дугъу ужуб ляхин апӀура.

¹¹ Касибар гьарган учвухъди хьиди, хъа Узу учвухъди гьарган хьидарза.

¹² Гьаму ягъ Йиз кӀулкан ктатбиинди дугъу Йиз беден накьвдик кивбан бадали гьязур апӀура.

¹³ Гьякь кӀуразачвуз: дюнʼяйиъ му Ужувлан хабар наан рабгъури гъабшишра, думу кӀваин апӀиди ва дугъу гъапӀубдикан ктибтиди.

Искариот Ягьудайи Иса масу тувуб

¹⁴ Гьадмуган йицӀикьюрикан сари – Искариот Ягьуда кӀурури, аьхюну маллйирихьна душну, кӀуру:

¹⁵ – Иса дисуз учвуз кюмек гъапӀиш, узуз фу тувдичва? Дурари дугъаз, арсран сумчӀур манат тувурча, гъапи.

¹⁶ Гьаддихъанмина дугъу Иса масу тувуз гъулай вахт абгури шулу.

Пасхайин машквран суфрайихъ

¹⁷ ЛичӀван лавшарин машквран садпи йигъан Исайихьна дуфну, Дугъан ученикари гьерхнийи: – Увуз пасхайин хураг учу наан гьязур дапӀну ккундувуз?

¹⁸ Исайи дурариз кӀуру: – Шагьриз сар фланурихьна гъарахай ва дугъаз йипай: «Мялимди гьерхра: „Узу пасхайин машквар Йиз ученикарра хъади яв хулаъ апӀурза“».

¹⁹ Исайи гъаписи вари дапӀну, ученикари пасхайин хураг гьязур гъапӀнийи.

²⁰ Хябяхъ гъабхьибси, Иса Чан йицӀикьюр ученикдихъди гъюн йивну суфрайихъ деънийи.

²¹ Дурари ипӀуз хъюгъиган, Дугъу кӀуру: – Гьякь кӀуразачвуз: учвкан сари Узу масу тувди.

²² Бегьем дерд дубхьну, гьарури Дугъаз пуз хъюгъю: – Я Агъа, думу узу дарза аьхир?

²³ Дугъура жаваб вуди кӀуру: – Узухъди саб гъабрак уьл кубсрайири Узу масу тувди.

²⁴ Гьамци, Гирами китабариъ улупнайиганси, Инсаниятдин Бай масу тувди, амма шли Инсаниятдин Бай масу тувраш, дугъаз бала хьибди: думу касдиз, учв бабкан гъахьундайиш, ужу шуйи!

²⁵ Иса душмнариз масу тувуз рази гъахьи Ягьудайи кӀуру: – Думу узу дарза аьхир, Мялим? Исайи дугъаз кӀуру: – Гьаци уву кӀурава.

ЦӀийи йикьрарнан ифи

²⁶ Дурари хураг ипӀурайи вахтна, Исайи уьл гъадабгъуру, ужуб сяаьт ибшри дупну, думу гьудубтӀуру ва, ученикарихьна туври, кӀуру: – Ма гъадабгъай, ипӀинай: му Йиз беден вуйиз.

²⁷ Аллагьдиз чухсагъул дупну, зах гъадабгъуру ва, ученикарихьна тувну, кӀуру: – Мидʼан варидари убхъай.

²⁸ Му цӀийи йикьрар йитӀурайи ва гизафдарихъанди, гунгьарилан хил алдабгъбан бадали, удубзурайи Йиз ифи вуйиз.

²⁹ КӀуразачвузки, тӀумтӀарин му чяхир сарун, Йиз Адашдин Паччагьлугъдиъ учвухъди цӀийи чяхир убхъайизкьан, убхъидарза.

³⁰ Хъасин Аллагьдин тярифназ мяъли дапӀну, дурар Елион дагъдиз удучӀвуру.

Петрин инкар хьуваликан улихьмиди пуб

³¹ Дагъдиина удучӀвиган, Исайи ученикариз кӀуру: – Учву варидари ахъли Узу гъитдичва, фицики Гирами китабариъ дибикӀна: «Марччлихъан йикӀидиза, ва лижраъ айи марччар даргъиди!»

³² Хъа Узу чӀиви гъашиган, Узу Галилейиз гъягъидиза ва душваъ учвуз ккилигури хьидиза.

³³ Хъа Петри Исайиз жаваб вуди гъапи: – Варидари Уву гъитишра, узу гьич саб вахтнара дици дарапӀарза.

³⁴ Исайи дугъаз гъапи: – Гьякь кӀуразавуз, ахъли даттли уьъйир дапӀну ккудубкӀайиз, Узу шубубан «аьгъюр дарзуз» пидива.

³⁵ Петри Дугъаз кӀуру: – Узу Увухъди йикӀуб алабхъурушра, Уву «аьгъюр дарзуз» пидарза. Имбу ученикарира гьамцдар гафар гъапнийи.

Исайин ккарагуб

³⁶ Хъасин Иса дурарихъди Гефсимания кӀуру йишваз гъягъюру ва Дугъу чан ученикариз кӀуру: – Учву гьамшвахь деай, хъа Узу душну гьатушвахь ккарагидиза.

³⁷ Чахъди Петрна Зеведейин кьюрид баярра гъадагъу. ЮкӀв лап пашман дубхьну, Дугъак сикинсузвал кабхъру.

³⁸ Гьадмуган Исайи дурариз гъапи: – Йиз юкӀв яман хажалатнаъ абхънайиз, гьамшвахь Узухъди гъузай, гъафил махьанай!

³⁹ ЦӀиб тинаси душну, машнахъди жилʼина ис духьну, Думу гьамци кӀури, ккарагуз хъюгъру: – Я Аьршарин Адаш, эгер шулуш, му аьзаб Узʼина дяргъруси апӀина, вушра, Узуз ккуниси ваъ, хъа Увуз ккуниси ибшри.

⁴⁰ Хъасин ученикарихьна гъафиган, лигуруш, дурар нивкӀуз душнади рякъюру. Думуган Дугъу Петриз кӀуру: – Саб сяаьтнаъкьан Узухъди даърахди гъузуз шуладарин учвхьан?

⁴¹ Гъафил махьанай. Тямягьвалариъ адрахъбан бадали, ккарагай. Рюгь кӀубан ву, хъа беден – зяиф.

⁴² Хъана, гьудучӀвну, Думу кьюбпи ражарира ккарагуру: – Я Адаш, эгер Узу му аьзабнаккан ккадауб мумкин дарш, Яв гаф тамам ибшри.

⁴³ Кьяляхъ гъафириз, дурар хъана даахну рякъюру. Дурарин улар гъагъи духьнайи.

⁴⁴ Дурар гъитну, хъана тинаси гьудучӀвну, Исайи шубубпи ражари гьадму гафар кӀури, Чан ккарагуб текрар гъапӀнийи.

⁴⁵ Хъасин ученикарихьна дуфну, дурариз кӀуру: – Гьамусра даахну имичва, рягьятвал гъадабгъуранчва? Инсаниятдин Бай гунагькрарин хилиз тувру вахт магьа сарун хъубкьна.

⁴⁶ Гъудужвай, гъягъюрхьа; лигайки, Узу масу туврайир багахь шула.

Иса дисуб

⁴⁷ Дугъу гьеле гьамци кӀури имиди магьа йицӀикьюрикан сар Ягьуда дуфну хъуркьу. Дугъахъди, ханжларна маргъар хьади, аьхюну маллйирина аьхюдари гьаънайи адмийирин аьхю гъварчра хъайи.

⁴⁸ Иса масу тувуз дуфнайи Ягьудайи дурариз гьамци дупнайи: салам тувруган, узу шлиз мак гъапӀиш гьадму Иса ву, ари Гьадму дисай.

⁴⁹ Дугъу, дишлади Исайихьна дуфну, гъапи: «Салам Увуз, Мялим!» – ва Дугъаз мак гъапӀу.

⁵⁰ Исайи дугъаз кӀуру: – Яв апӀуз ккайи ляхин апӀин, дусткас. Дишла, алархьну, эскрари Иса дисуру.

⁵¹ Гьадму арайиъ Исайин ученикарикан сари, сабпну чан ханжал уьчӀюбгъну, йивну, аьхю маллайин гъаравшин иб ктабтӀуру.

⁵² Гьадмуган Исайи дугъаз кӀуру: – Яв ханжал чан гъашариъ ив, фицики ханжал уьчӀюбгъю гьарсар ханжалихьан йикӀиди.

⁵³ Ваяки Узу Йиз Адашдикан тӀалаб гъапӀиш, Дугъу Узуз гьамусяаьт малайикарин йицӀикьюб кьушумтӀан артухъ тутрувур, кӀурана?

⁵⁴ Даршиш, гьаму вари гьамци дубхьну ккунду, кӀури, Гирами китабариъ дидикӀнайидар фици кӀулиз удучӀвиди?

⁵⁵ Хъасин Исайи халкьдиз кӀуру: – Узу дисуз, гъачагъ дисурайиганси, ханжларна маргъар хьади дуфначва. Узу гьар йигъан Аллагьдин хулаъ аьгъювалар улупури деъну шуйза, хъа думуган Узу гъидисундайчва.

⁵⁶ Вари гьаму ляхнар пайгъамбрарин Китабариъ дибикӀнайиб кӀули удубчӀвуз шулайидар ву. Гьадмуган вари Дугъан ученикар, Иса гъитну, гьергнийи.

Иса Заан диванханайин улихь

⁵⁷ Иса гъидисдари Думу аьхюну малла Каяфайихьна гъухнийи, душваъра къанунчйирна аьхюдар уч духьнайи.

⁵⁸ Петр ярхлаанси Исайихъди Каяфайин гьяятдихьнакьан гъафнийи ва, айитӀинди учӀвну, аьхир фициб шулуш лигуз кӀури, Аллагьдин хулан эскрарихъди деънийи.

⁵⁹ Аьхюну маллйири, аьхюдари ва вари Диванханайин миди вуйидари, Иса йикӀбан къарар адабгъбан бадали, Дугъаз къаршуди кучӀлин шагьидвалар агурайи.

⁶⁰ КучӀлин шагьидвал апӀури, гизафдар уч гъахьнушра, дурариз лазим вуйи шагьидвалар гъидихъундайи. Аьхирки кьюр кас багахьнаси гъафи

⁶¹ ва дурари гъапи: – Мугъу кӀурайи: Узхьан Аллагьдин хал рабгъуз ва шубуд йигъан думу цӀийи кӀултӀан тикмиш апӀуз шулзухьан.

⁶² Маллйирин аьхюри, гъудужвну, Исайиз гъапи: – Уву гьаз чӀалкьан кӀурадарва? Мурари апӀурайи шагьидвал дюзиб вуйин?

⁶³ Исайи чӀалкьан гъапундайи. Маллйирин аьхюри гъудужвну Исайиз кӀуру: – Узу Аллагьдин улихь Увкан дишди пуб тӀалаб апӀураза: Аллагьдин Бай Месигь Уву вуна?

⁶⁴ Исайи дугъаз кӀуру: – Уву гьаци кӀурава. Дидланна гъайри, Узу кӀуразачвуз: гьамусдихъантина Инсаниятдин Бай вари Удукьрурин арччулну гъвалахъ деъну ва дифариинди гъюри рякъидичвуз.

⁶⁵ Гьадмуган маллйирин аьхюри, хъял улупури, чаин али палтар дячӀяргъну, кӀуру: – Мугъу Аллагь гьясбикк ккадру гафар кӀура! Ухьуз сарун шагьидар гьаз ву? Магьа гьамусяаьт учвуз варидариз Мугъан Аллагь гьясбикк ккадру гафар гъеерхьунчвуз!

⁶⁶ Учву фици фикир апӀурачва? Дурарира жаваб вуди гъапи: – Думу тахсиркар ву ва аьжализ лайикь ву.

⁶⁷ Гьадмуган садари Дугъан машнаъ тутйир атӀу, гъурдар гъиву. Тмундари гарцӀлариккан бачӀар ккадату

⁶⁸ ва «Увуз шли гъивнуш, йип ари, Уву Месигь вуш?» – кӀури, кялхъри гъаши.

⁶⁹ Хъа Петр чӀат гьяятдиъ деънайи. Дугъахьна дуфну, сар гъараваш дишагьлийи кӀуру: – Увура Галилейжви Исайихъ хъади гъахьунва.

⁷⁰ Амма думу варидарин улихь инкар гъахьи: – Уву фу кӀурашра, аьгъдарзуз.

⁷¹ Петр урнариан удучӀвурайиган, думу сар жара гъараваш дишагьлийиз рякъюру, ва душваъ айидариз кӀуру: – Гьаму кас Назаретдиан вуйи Исайихъ хъади гъахьну.

⁷² Ва дугъу хъанара: «Узуз думу Кас аьгъюркьан дарзуз», – пну, ху апӀуру.

⁷³ Саб арайилан гьамшварихь дийигънайидари, багахьнаси дуфну, Петриз кӀуру: – Дугъриданна увура гьадрарикан сар вува, фицики яв улхбан нугъатнура гьаци вуйиб улупура.

⁷⁴ Думуган Петр: – Узуз думу Кас гьич аьгъюркьан дарзуз, – кӀури, хуйир апӀуз хъюгънийи.

⁷⁵ Гьаму арайиъ даттли уь-уь гъапӀу. Петрин, Исайи гъапи: «Даттли уьъйир дапӀну ккудубкӀайиз, Узу шубубан „аьгъдарзуз“ пидива», – кӀуру гафар кӀваина гъюру. Ва гьадлин удучӀву Петр, дерд дубхьну, зарбди гъишнийи.