Матта 24 - Гирами Китаб

Аллагьдин хал дабгъбакан

¹ Иса Аллагьдин хулʼан удучӀвиган, Дугъан ученикар, Дугъаз Аллагьдин хулан дараматар улупуз кӀури, багахьна гъафи.

² Исайи дурариз кӀуру: – Гьамрар вари рякъюранчвуз? Дугъридан кӀуразачвуз, мидин гъван гъвандиин гъубзидар, вари дабгъиди.

Исайин терефкрариин аьзабар улуркьуб

³ Иса Елион дагъдиин деънайиган, Дугъахьна ученикар гъюру ва жарадар алдру йишвʼин дурари Дугъхьан гьерхру: – Йип учуз, дици фила хьибди? Уву хъадакну гъюрувал ва гъиямат йигъ улубкьруб учуз фицдар лишнариинди аьгъю хьибди?

⁴ Исайи дурариз жаваб вуди кӀуру: – Лигайгьа, шликӀа учву алдатмиш дарапӀбан бадали, ихтият йихьай.

⁵ Фицики гизафдар: «Узу Месигь вуза» кӀури, Йиз ччвурнаккди гъиди ва гизаф халкьар алдатмиш апӀиди.

⁶ Гьацира учвуз багахь ва ярхла дявйирикан ебхьидичвуз. Лигайгьа, гучӀ мапӀанай, фицики мурар духьну ккуни ляхнар ву, амма му сабан аьхир дар.

⁷ Фицики халкь халкьдиин, паччагьлугъ паччагьлугъдиин алархьиди. Гашʼвалар ахьди, жюрбежюр йишвариъ жилар тӀурччвиди.

⁸ Мурар вари бедбахтваларин, бицӀир апӀру аьзабарси, сифте кӀулар ву.

⁹ Гьадмуган учвуз аьзабар тувди ва учву йивну йихиди; учву, Йиз ученикар хьпаз лигну, вари халкьариз даккун хьидичва.

¹⁰ Гьадмуган гизафдар хъугъвалихьан ярхла хьиди. Сари-сар масу тувуз хъюгъди, инсанарин арайиъ душманвал абхъди.

¹¹ Хъасин хайлин кучӀлин пайгъамбрар арайиз удучӀвиди ва дурари гизафдар алдатмиш апӀиди.

¹² Къайдасузвалар гизаф артухъ хьпаз лигну, гизафдарин сар-сарихьна ккунивал цӀиб хьибди.

¹³ Гьамрар вари шли аьхиризкьан аьх гъапӀиш, гьадму дюрхну хьиди.

¹⁴ Гьарсаб миллетдиз ебхьруганси, Аьршарин Паччагьлугъдикан Ужувлан хабар вари дюнʼяйиъ рабгъиди, гьадмуган гъиямат йигъ улубкьиди.

Улукьуз ккайи аьзабар

¹⁵ Гьамци Даниял пайгъамбри улихь ккимиди дупнайи Гирами йишваъ Аллагь гьясбикк ккадру алчагъвал учвуз гъябкъиган (урхурайир гъит гъавриъ ишри),

¹⁶ гьадмуган Ягьудия уьлкейиъ айидар дагълариз гьергри.

¹⁷ Фуж гьадму вахтна гъваин алди гъашиш, чан хулаъ айиб фукӀа гъадабгъуз душвлан улдудучӀври,

¹⁸ фуж хутӀлиъ ади гъашиш, думу чан палтар гъадагъуз хулаз дурушри.

¹⁹ Гъагъдиъ айидаринна нанайихъ бицӀидар хъайидарин гьадму йигъари гьял пис хьибди!

²⁰ Гьамрар вари улукьну, учву гьергуз мажбур гъабхьи вахт я кьюрд, ясана султ йигъ дарибшри пну, ккарагай,

²¹ фицики гьадмуган дюнʼя ккебгъхъанмина дарши ва сарун сабанра даршлусдар зурба бедбахтвалар хьиди.

²² Хъа гьадму йигъар Аллагьди кам гъапӀундайиш, сар каскьан ккададархьрийи, амма Чав кадагънайидар бадали Дугъу гьадму йигъар кам апӀиди.

²³ Эгер учвуз думуган «Лиг, Месигь гьамшвахь хьа» вая «Гьатушвахь хьа» гъапиш, мухъугъанай,

²⁴ фицики кучӀлин месигьар ва кучӀлин пайгъамбрар удучӀвну, зурба аьламатнан лишнар улупуз хъюгъди. Дурар, чпихьан шулуш, гьелле Аллагьди кадагънайи касарра алдатмиш апӀуз чалишмиш хьиди.

²⁵ Магьа, Узу улихьмиди гъапунзачвуз.

²⁶ Гьамци, нагагь учвуз «Магьа Думу ичӀи чюлиъ а» гъапишра, дина мягъянай; «Магьа Думу хулариъ гьитӀикӀна» гъапишра, мухъугъанай.

²⁷ Кьюркьлин цӀа завун му кӀулиан тму кӀулиз фици крибчуруш, Инсаниятдин Байра гьаци гъиди.

²⁸ Наан майит ади гъабшиш, гьадина люкьяр уч хьиди.

Инсаниятдин Бай аьршариан гъюбкан

²⁹ Хъа сабпну гьадму йигъарин кьяляхъ «Ригъ ктӀубшвиди, вазли акв тувидар, завариан хядар ахьди, завар ккадаршвиди».

³⁰ Гьадмуган завʼина Инсаниятдин Балин лишан гъибди. Жилиин али вари халкьар ишиди, дурариз, Чан кьувват ва зурба гьяйбат хъади, дифариин алди гъюрайи Инсаниятдин Бай рякъиди.

³¹ Дугъура зурба сес апӀру зурна хьади Чан малайикар гьаъди, дурари Дугъу ктагъу касар, жилин саб кӀулʼан тмуну кӀулиз гъяйизкьан, юкьбиб терефарихъанди уч апӀиди.

Инжирин гьарин мисал

³² Инжирин гьархъан мисал гъадабгъай: дидин кюлери кьюкьяр апӀруган ва кӀажар адашвруган, хьад багахь шулайивал аьгъю шулучвуз.

³³ Гьаци учвузра, гьамрар вари гъяркъган, гьадму вахт, ичв раккнихъ хъайиси, багахь дубхьнайивал аьгъю йибхьай.

³⁴ Гьякь кӀуразачвуз: му вари улубкьайиз, гьамусдин насил гъубзди.

³⁵ Заварна жилар ккадахьиди, хъа Йиз гафар дургидар.

Думу фила шулуш, саризра аьгъдар

³⁶ Я аьршарин малайикариз, я Бализ – саризра йигъ ва сяаьт аьгъдар, хъа сар Адашдиз аьгъя.

³⁷ Нюгьдин йигъари фици гъабхьнуш, Инсаниятдин Бай гъювалра гьаци хьибди:

³⁸ жилиин шид улубчӀвайиз улихьна Нюгь чан гимдиъ учӀву йигъʼина гъяйиз, вари фици ипӀури-убхъури, швушвар хури, швуваз гъягъюри гъахьнуш

³⁹ ва шид улубчӀвайиз фици фтинкӀа фикир ктарди гъахьнуш, Инсаниятдин Бай гъювалра гьаци хьибди.

⁴⁰ Думу вахтна хутӀлиъ кьюр нежбер лихури гъахьиш, дурарикан сарнур гъахиди, тмунур гъитди;

⁴¹ хилин рягъярихъ тахил рябгъюрайидар кьюр дишагьли гъахьиш, дурарикан сар гъадагъиди, тмунур гъитди.

⁴² Гьаци вуйиган, ул иливну мааханай, гьаз гъапиш ичв Агъа гъюру йигъ учвуз аьгъдарчвуз.

⁴³ Учвуз аьгъю йибхьайки, хулан эйсийиз угъри гъюру вахт аьгъяйиш, думу даърахрийи ва чан хулаъ учӀвуз гъидритрийи.

⁴⁴ Гьаддиз учвура гьязурди гъузай, фицики учву ккилигури адру сяаьтна Инсаниятдин Бай гъиди.

Гъуллугъчйир вафалудар духьну ккунду

⁴⁵ Агъайин вартӀан аькьюллу, вафалу гъараваш фунур ву? Дугъу имбу гъаравшариз ипӀруб туврурди дурарин зиин гъуллугъчиди дерккур.

⁴⁶ Хулаз гъафи агъайиз ляхин апӀури гъяркъю гъуллугъчи бахтавар ву.

⁴⁷ Гьякь кӀуразачвузки, агъайи думу чан вари хал-йишван аьхюрди дерккди.

⁴⁸ Хъа эгер думу гъуллугъчийи, чан кӀваан: «Йиз агъа багаригьди гъидар» пну,

⁴⁹ миди вуйи чавсдариз сабра дарди йивури гъахьиш, лутйирихъди ипӀуз-убхъуз хъюгъиш,

⁵⁰ агъа, думу ккилигури адру йигъан ва мялум дару сяаьтна хъуркьди

⁵¹ ва дугъу думу гъуллугъчи кьюб швур апӀиди: дугъкан, кьюб маш гъяйидарикан апӀруб апӀиди, душваъ суза-фигъан, зурба ишуб абхъди.