Галат 6 - Гирами Китаб

Чиб-чпиз кюмек апӀури йихьай

¹ Гъардшар, эгер шли гунагь гъапӀиш, учву, рюгьнахъ хъайидари, тахсир гъапӀур гъяниди дюз рякъюхъна духну ккунду. Лиггьа, жвувканра гьациб тахсир ктудубчӀвбан бадали, жвувʼин ул алди гъуз!

² Гьардиз чаин алиб апӀуз кюмек апӀури гъузай, гьаци учву Месигьдин закон кӀулиз адабгъидичва.

³ Шлиз, чав фукӀа дарапӀишра, учв заанди рякъюраш, дугъу учв алдатмиш апӀура.

⁴ Гъит, гьарсари аькьюллуди чпин ляхнарикан фикир апӀри, ва гьадмуган дугъхьан, чан хъуркьувалариз дилигну, фурс апӀуз хьибди, ва дугъу чан ляхнар жарадариндарихь тевдар,

⁵ фицики, гьарди чаин алиб апӀиди.

⁶ Шли Аллагьдин гафнан аьгъювалар гъадагъураш, гъит, гьадгъу, чаз айи вари хазнайикан, чаз улупурайиризра капӀри.

⁷ Жвуву жвув алдатмиш мапӀанай: Аллагь ахмакь апӀуз хьибдарчвухьан! Адмийи, фу гъубзиш, гьадму ккадабцӀиди!

⁸ Чан гунагькар беден бадали убзрури, ккадабцӀруб аьжал хьибди. Хъа Рюгь бадали убзрури, Рюгьнахьан гьаргандин уьмур ккадабцӀиди.

⁹ Гьаци вуйиган, ужʼвал апӀуру кӀури эргувалиъ кӀул ипдархьа, ва гьадмуган, эгер хътадахъиш, ухьуз улупнайи вахтна бегьер ккадабцӀидихьа.

¹⁰ Магьа гьаддиз, вахт имиди, варидариз ужʼвал апӀидихьа, иллагьки, хъугъувалиъ саб хизан гъашидариз.

Павели чан кагъаз ккудубкӀура

¹¹ Гьамус узу учвуз йиз хусуси хилʼинди бикӀураза – гьаму аьхю гьярфар рякъюрачвузки?

¹² Хъа учвухьди суннатнан аьдатар хъауз гъитрудари, чпи адмийириз ккун хьузди гьаци апӀура, фицики дурариз Месигьдин хачралантина чпихъ хъергри ккундар.

¹³ Дурари, аьдатниинди чпин суннат дапӀнашра, Къанундиъ улупнайи аьдатар хъаъри шулдар. Дурариз, аьдатназ дилигну, ичв суннат апӀуз ккунди а. Гьаци дурариз чпин тяриф за апӀуз ккунду.

¹⁴ Хъа узуз, ихь Агъа Месигь Исайин хачрииндитӀан гъайри, жарабдиинди фурс апӀуз ккундарзуз. Узуз – дюнʼя думу хачрак кабсна ва дюнʼяйиз – узу думу хачрак карсна.

¹⁵ Суннат дапӀну ашра – адаршра, мидлан фукӀара шулайиб адар. Мушваъ ккундайиб: жвув Аллагьдиз цӀийи кас хьувал ву.

¹⁶ Мясляаьт ва ужʼвал ибшри гьамци апӀрудариз ва Аллагьдин Израилиз!

¹⁷ Гъит, гьамусдихъантина узу гьич сарира пашман дарапӀри, фицики йиз бедендиин Исайин лишнар ал.

¹⁸ Ихь Агъа Иса Месигьдин ужʼвал ичв рюгьнахъди ибшри, гъардшар. Амин!