Эвел 7 - Гирами Китаб

Шту дюнья ккапӀуб

¹ РАББИЙИ Нюгьдиз кӀуру: – Уву ва яв вари хизан гимийиъ учӀвай. Му дюньяйиъ гьамусяаьтна яшамиш шулайидаригъ дугърир сар увутӀан гъяркъюндарзуз.

² Увухъди гьарсаб гьялал гьяйванатарикан хпибна жилиб ургуб жут гъадагъ, хъа гьярам гьяйванатарикан хпибна жилиб – саб жут.

³ Гьацира заварин ничхрарин вари жюрйирикан хпибна жилиб ургуб жут гъадагъ. Гъит дурарин тум жилиин гъубзри.

⁴ Узу ургуд йигълан ягъчӀвур йигъазна ягъчӀвур йишваз жилиинна мархь гьапӀдиза. Узу халкь гъапӀуб вари жилилан терг апӀидиза.

⁵ Нюгьди вари чаз РАББИЙИ амур гъапӀси апӀуру.

⁶ Жилиин шид улубчӀвруган, Нюгьдин йирхьудварж йис вуйи.

⁷ Дюнʼя ккаъру штарихьан чиб уьрхюз Нюгь, чан баяр, хпир ва баярин хпар хъади, гимийизди учӀвру.

⁸ Хъа вари жюрейин гьялал ва гьярам гьяйванатарикан, ничхрарикан ва гьарсаб гьяшаратнакан

⁹ хпибна жилиб – саб жут, Заанури Нюгьдиз амур гъапӀганси, гимийиз Нюгьдихьна гъюру.

¹⁰ Ургуд йигълан дюнʼя ккапӀру штар жилиина ургъуз хъюгъю.

¹¹ Нюгьдин уьмрин йирхьудваржпи йисан, кьюбпи вазлиъ, вазлин йицӀиургудпи йигъан, жилин бушлугъарин вари булагъар гьутӀурччвнийи, заварин улдар арццнийи.

¹² ЯгъчӀвур йигъанна ягъчӀвур йишван жилиина мархь убгъуру.

¹³ Гьадму йигъан Нюгь, Нюгьдин баяр – Сим, Хам, Яфет, Нюгьдин хпир ва баярин шубур хпир дугъахъди гимийиъ учӀвру.

¹⁴ Дурарихъди гимийиъ жилин вари чӀивишнарра учӀвнийи: гьар жюрейин гьяйванатар, мал-къара, жилиин али вари гьяшаратар, хлинццар кайи вари ничхрар.

¹⁵ Уьмрин ил али гьарсаб гьяйванат Нюгьдихьна гъафнийи,

¹⁶ ва хпибна жилиб жут-жутди, Заанури Нюгьдиз амур гъапӀси, гимийиъ учӀвнийи. Хъа гьадмуган РАББИЙИ Нюгьдин кьяляхъди гимийиъ учӀврушв хъябкьнийи.

¹⁷ Шту жил ягъчӀвур йигъан ккапӀри гъабхьи. Шид артухъ-артухъ шулайи. Гими уьлюбхюру.

¹⁸ Хъа шид жилиин гужал шулайи, гими дерин штариин гъубзу.

¹⁹ Заварин кӀанакк ккайи вари ягъли дагълар ккеркруси, шид дюнʼяйиин кьадарсуз за гъабши.

²⁰ Дагълар ккеркну, шид йицӀихьуб хъуршилсан за гъабхьи.

²¹ Жилилан гъябгъру вари чӀивиб: ничхрар, мал-къара, вягьши гьяйванатар, битӀар-чурчлар ва вари инсанар,

²² чипʼин уьмрин ил алидар вари гъийихнийи.

²³ Жилин зиин али гьарсаб чӀивиб тӀанкь гъабхьнийи. Инсаниятдилан ккебгъну мал-къарайиинакьан, нахшрарна, завун ничхрар – вари дюнʼяйилан марцц гъахьнийи. Нюгь ва дугъахъди гимийиъ айидартӀан гъузундайи.

²⁴ Шид дюнʼяйиин варжна хьцӀур йигъан улубчӀвну гъубзнийи.