Эвел 22 - Гирами Китаб

Заанури Ибрагьим ахтармиш апӀуб

¹ Гьаму гьядисйирин кьяляхъ сацӀиб вахтналан Заанури Ибрагьим ахтармиш апӀуру. – Я Ибрагьим! – дих апӀуру дугъаз Заанури. – Гьай! – кӀуру Ибрагьимди.

² Заанури гьамци кӀуру: – Яв хъайина-хътру, Узу увуз гаф тувну гъахьи, яв ккуни вуйи сар бай Исакь хъади Мориа жилиина гъарах. Душваъ Узу увуз улупру дагъдиин думу, дубккну ургру гъурбан вуди, цӀигъ ург.

³ Гьиринган ухди Ибрагьим, ургуз гакӀвлар иливну дажира, чахъди кьюр гъаравашра, гъурбан апӀуз ккайи Исакьра гъадагъну, Заанури чаз гъапи йишвахьна рякъюъ учӀвру.

⁴ Рякъюъ ади шубудпи йигъан улар за гъапӀу дугъаз ярхлаъ гьадму йишв рябкъюру.

⁵ – Учву дажи уьбхюри гьамушвахь гъузай, – гъапи дугъу гъаравшариз. – Хъа узуна бай душну, икрам дапӀну, учвухьна кьяляхъ гъидича.

⁶ Ибрагьимди гъурбан убгуз вуйи гакӀвлар Исакьдин гъюниин иливуру ва цӀин аржларна ханжал хьади кьюридира чпин рякъ давам апӀуру.

⁷ Исакьди чан адаш Ибрагьимдихьан гьерхру: – Я адаш! – Гьай, йиз бай! – кӀуру адашди. Хъа бали давам апӀуру: – Ухьухь цӀара, гакӀвларра хьахьухь. Ухьу ччил дубккну ургру гъурбан апӀбанди вуйхьа. Хъа набши думу ччил?

⁸ – Йиз бай, – кӀуру дугъаз Ибрагьимди, – гъурбан апӀуз ччил Чав Заанури абгиди. Дурари кьюриди чпин рякъ давам апӀуру.

⁹ Заанури чаз гъапи йишвахьна хъуркьиган, Ибрагьимди гъурбан апӀрушв тикмиш апӀуру ва душвʼин гакӀвлар иливуру. Дугъу Исакь дидисну йитӀну гъурбан апӀрушван гакӀвларин зиин ярхишнахъди дивру

¹⁰ ва ханжал адабгъну балʼина хуру.

¹¹ Хъа гьадмуган аьршариан РАББИЙИН малайикди дугъаз дих апӀуру: – Ибрагьим! Я Ибрагьим! – Гьай! – кӀуру дугъу.

¹² – Дугъʼин хил мииливан, – кӀуру малайикди, – Исакьдиз фукӀара мапӀан! Гьамус Узуз аьгъязуз увуз Заанурихьан гучӀруб: уву Узуз, яв хъайина-хъадру сар бай тувуз гьяйиф гъапӀундарва!

¹³ Улар за гъапӀу Ибрагьимдиз кюлеригъ кӀарчар гъярснайи якъ рябкъюру. Думу душну, якъ дибисну, балин ерина гъурбан апӀрушвʼин гьадму дурккну ургру гъурбан апӀуру.

¹⁴ Гьаму ляхин гъабхьи йишваз Ибрагьимди Яхве-Ирэ («РАББИЙИЗ бихъиди») кӀуру. Гьаддиз гьамциб мисалра а: «РАББИЙИН дагъдиин бихъиди».

¹⁵ Аьршариан РАББИЙИН малайикди Ибрагьимдиз хъана дих апӀуру:

¹⁶ – Йиз Узʼинди ху апӀураза, кӀура РАББИЙИ, уву яв айина-адру сар бай гьяйиф дарапӀбаз дилигну

¹⁷ Узу уву ужувлакк ккаъдизаву! Узу увуз завуъ хядаркьан, гьюлихъ гъумкьан гизаф наслар багъиш апӀидиза. Ва яв веледарин хилиъ душмнарин шагьрар ахьри хьиди!

¹⁸ Яв наслариз тувру ужʼвалар жилиин али вари халкьариз хьиди, гьаз гъапиш уву Узухъ хъпехъунва.

¹⁹ Ибрагьимра, чан байра гъаравшар гъиту йишвахьна кьяляхъ гъюру ва дурарра хъади, вари сатӀиди, Беэр-Шевайиз гъягъюру. Му гьядисйирин кьяляхъ, Ибрагьим гьадушваъ яшамиш шули гъузнийи.

Нагьорин наслар

²⁰ Вахтар гъягъюру ва магьа Ибрагьимдиз хабар дебккру: – Яв чве Нагьорин хпир вуйи Милкайиз баяр гъахьну. Магьа дугъан баяр:

²¹ Уц (му сарпи бай ву), Буз, Кемуэл (хъасин Кемуэлиз Арам кӀуру бай шулу),

²² Кесед, Хаз, Пилдаш, Идлаф ва Бетуэл.

²³ Бетуэлиз Ребека кӀуру риш шулу. Зиихъ ктуху миржир бай Ибрагьимдин чве Нагьориз Милкайикан шулу.

²⁴ Мидланра гъайри, Нагьориз бицӀину хпир Реумайиканра Тевах, Гахам, Тахаш ва Маах баяр гъахьнийи.