Эвел 21 - Гирами Китаб

Исакь бабкан хьуб

¹ РАББИЙИ Чав, гаф тувганси, Сара кӀваин гъапӀнийи ва Чав туву гаф кӀулиз адабгънийи.

² Сара гъагъдиъ шулу ва, Заанури гаф тувну дебккнайи вахтназ, Сарайи кьаби Ибрагьимдиз бай хуру.

³ Сарайикан гъаши чан бализ Ибрагьимди Исакь кӀуру ччвур тувру.

⁴ БицӀирин миржид йигъ гъабхьиган, Заанури амур гъапӀганси, дугъан суннатра апӀуру.

⁵ Ибрагьимдин, чан бай Исакь бабкан шлуган, варж йис вуйи.

⁶ Сарайи кӀуру: – Заанури узухьди аьлхъюз гъитну: мидкан гъеебхьдар вари узухъди аьлхъиди,

⁷ ва, гьамци кӀури, давам апӀуру: – Ибрагьимдиз, чан Сарайи бицӀириз нана тувур кӀури, шилхьан пуз хьибдийи? Хъа магьа чан кьабишнаъди узу дугъаз байра гъахунза.

⁸ БицӀир аьхю шулу. Исакь нанайихъан хътатӀу йигъан Ибрагьимди зурба машквар гъапӀнийи.

Гьажарна Ибрагьимдин бай Исмаил утӀурккуб

⁹ Египетшив Гьажарикан духьнайи бали Исакьдихъди тамашйир апӀурайиб дябкъну

¹⁰ Сарайи Ибрагьимдиз кӀуру: – Гьадму лукӀ чан байра хъади утӀуркк! Йиз балихъди сабси дугъан бай яв ирсчи духьну ккундар!

¹¹ Ибрагьимдиз, чан балкан мициб гъеебхьган, иццру апӀуру.

¹² Амма Заанури дугъаз кӀуру: – Балинна лукӀ дишагьлийин дердер мапӀан. Сарайи увуз кӀурубси апӀин, гьаз гъапиш яв тухум Исакьдилантина давам хьибди.

¹³ Хъа лукӀ дишагьлийин баллантинара Узу саб халкь арайиз хибдиза, фицики думура яв велед вуяв.

¹⁴ Хъайигъан гвачӀнин ухди Ибрагьимди, Гьажарин гъюниин уьл айи турбана шид айи ирж иливну, бицӀирра хъади удучӀвну гъягъюз, рякъʼин апӀуру. Гьажар рякъюъ учӀвру ва Беэр-Шева къуру чюллериъ уьргъру.

¹⁵ Дугъан иржаъ айи шид ккудубкӀган, бицӀир рукчарикк гъитну,

¹⁶ учв, чан бай фици йикӀураш дярябкъри дупну, гъиву чӀимир тӀибхру манзилназ гьудучӀвну, гьарай ипну ишури деъру.

¹⁷ БицӀир фици ишураш Заануриз гъеебхьнийи ва завун аьршариан Заанурин малайикди Гьажариз дих гъапӀнийи ва гъапнийи: – Я Гьажар, фу гъабхьну? ГучӀ мапӀан! Уву дитнайи яв бицӀир фици ишураш Заануриз деебхьна.

¹⁸ Гъудужв, веледдихьна гъарах, дугъан хил бис. Узу дугъкан зурба халкь ктаидиза.

¹⁹ Заанури думу дишагьлийин улар арццру ва дугъаз шид айи гъуйи рябкъюру. Дишагьли гъуйихьна багахь шулу, ирж штухьди абцӀну, бицӀириз шид тувру.

²⁰ Гьаддихъанмина Заанур гьаммишан Исмаилихъди шулу. Исмаил аьхю шулу, дугъу чюлиъ бина ккебгъру ва дугъкан чӀимрариан йиврур ктучӀвуру.

²¹ Исмаил Паран кӀуру чюлиъ яшамиш шулу ва дадайи дугъаз хпирра Египет уьлкейиан хуру.

Ибрагьимдинна Авимелехдин йикьрар

²² Думу саб вахтна Авимелех чан кьушмарин аьхюр вуйи Пихулихъди Ибрагьимдихьна гъюру ва кӀуру: – Уву фу апӀурашра варибдиз увуз Заанури кюмек апӀура.

²³ Гьаму йиз улихь я узу, я йиз бицӀидар, я йиз худлар, уву алдатмиш апӀдарза дупну, Заануриинди ху апӀин. Узу увухъди фици ужуйи гъахьнуш, гьаци увура узухъди, уву кьабул гъапӀу гьюкуматдихъди ужуйи йихь!

²⁴ Ибрагьимди сифте ху апӀуру

²⁵ ва хъасин, Авимелехдин адмийири чахьан шид айи гъуйи тадабгъунзухьан кӀури, аьрзра апӀуру.

²⁶ – Думу дици шли гъапӀнуш узуз аьгъдарзуз, – жаваб тувру Авимелехди. – Уву узуз чӀалкьан гъапундарва. Узуз сабпи ражари дидкан ебхьуразуз.

²⁷ Ибрагьимди Авимелехдиз малар-марччар пешкеш тувру ва дугъахъди йикьрар йитӀуру.

²⁸ Ибрагьимди лижгъян ургуб агълиж жаради гъядяъну дерккру,

²⁹ му гъябкъю Авимелехди Ибрагьимдихьан гьерхру: – Хъа гьаму ургуб агълиж гьаз жаради гъядягъну дерккнава?

³⁰ – Мурар, йиз гъуйи узу гъийибккуб вуза кӀуру, лишан вуди гъядягънайидар вуйиз, – гъапи Ибрагьимди. – Мурар узхьан увуз кьабул апӀин.

³¹ Ибрагьимдина Авимелехди чиб-чпиз ху гъапӀу вахтнахъанмина думу йишваз Беэр-Шева («ху гъапӀу йишван гъуйи») кӀура.

³² Беэр-Шевайиъ Ибрагьимдихъди йикьрар йитӀну Авимелех чан къушмарин аьхюр вуйи Пихулра хъади филистим жилариинна хътакуру.

³³ Ибрагьимди Беэр-Шевайиъ хьаднура-кьюрднура чруди гъубзру тамариск кӀуру гьар кивру ва гьадушваъ РАББИЙИЗ, Гьаргандиз вуйи Заануриз, икрам апӀуру.

³⁴ Дидхъанмина Ибрагьим филистим жилариин кьаназ яшамиш шулн гъузру.