Эвел 17 - Гирами Китаб

Суннат апӀуб – йикьрарнан лишан

¹ Ибрам урчӀвцӀурна урчӀвуд йисаъ ади, дугъаз РАББИ ачмиш шулу ва кӀуру: – Узу Кьудратлу Заанур вуза. Йиз улихь, саб тахсир ктарди, лицури йихь.

² Узу явна Йиз арайиъ йикьрар йитӀидиза. Увуз кьадар адрубкьан насил тувдиза.

³ Ибрамди жилиинакьан икрам апӀуру, хъа Заанури дугъаз кӀуру:

⁴ – Йиз терефнаан, магьа увухъди вуйи Йиз йикьрар: увкан гизаф халкьарин адаш хьиди.

⁵ Сарун увуз Ибрам («гьюрматлу адаш») кӀури хьибдар, яв ччвур Ибрагьим («гизафдарин аба») хьибди, фицики Узу увкан гизаф халкьарин адаш апӀидиза.

⁶ Узу уву гизаф бегьерлу апӀидизаву. Узу увлантина халкьар арайиз хидиза; увкан хьиди паччгьар.

⁷ Узу, Йизна, явна, яв наслин арайиъ, насларилан наслариинна гьаммишандиз вуйи Йиз йикьрар, йитӀидиза. Яв Заанур ва увлантина вуйи яв насларин Заанур Узу хьидиза.

⁸ Узу, уву гьамусяаьт гъурабади яшамиш шулайи вари Ханаан жил, увуз ва яв наслариз гьаргандиз тувдиза ва дурарин Заанур Узу хьидиза.

⁹ Хъа Заанури Ибрагьимдиз гъапи: – Яв терефнаан увуна яв гъюз имбу вари наслари Йиз йикьрар тамам дапӀну ккунду.

¹⁰ Магьа, уву тамам дапӀну ккуни, увухъди, увхъантина вуйи яв насларихъди вуйи Йиз йикьрар: гъит гьарсар жили касдин суннат дапӀну ибшри.

¹¹ Ичв варидарин йиккнан кӀакӀар кадатӀай – гьаму хьибди Йизна ичв арайиъ йитӀнайи йикьрарнан лишан.

¹² Ичв арайиъ миржид йигъ гъабхьи гьарсар жили бицӀирин суннат дапӀну ккунду – гьаци гьаммишан наслариан-наслариз апӀинай. Яв хулаъ бабкан гъахьидаринра ва, яв насларикан дарди, жара йишвлан пулихъ гъадагънайидаринра суннат дапӀну ккунду.

¹³ Саб гаф адарди суннат дапӀну ккунду яв хулаъ бабкан гъахьиринси пулихъ гъадагъдаринра. Узухъди вуйи йикьрарнан му лишан ичв бедендиин гьаргандиз хьибди.

¹⁴ Суннат дапӀну адру жилижви, чан халкьдин арайиан идитну хьиди – дицири Узухъди вуйи йикьрар чӀюргъюра.

¹⁵ Хъа Заанури Ибрагьимдиз кӀуру: – Яв шив Сарайиз Сарай макӀан, хъа гъит дугъан ччвур Сара ибшри.

¹⁶ Думу ужувлакк ккаъдиза ва увуз дугъкан бай тувдиза. Узу думу гьаци ужувлакк ккаъдизаки, дугълантина гизаф халкьар ва халкьарин паччгьар арайиз гъиди.

¹⁷ Ибрагьимди жилиинакьан икрам гъапӀу. Дугъу дяаьлхъну чав-чакди гъапи: «Варж йисаъ айирикан бай хьуб мумкин ву кӀурайчва? Сарара урчӀвцӀур йисаъ айир – мугъак бицӀир киршуб мумкин вуйинхъа?»

¹⁸ Хъа Ибрагьимди Заануриз гъапи: – Исмаилин уьмуркьан Яв ужувлакк гъабхьнийиш, ужуйи шулийи!

¹⁹ Ибрагьимдиз Заанури гъапи: – Увуз бай апӀрур яв хпир Сара хьиди. Дугъʼин Исакь («думу аьлхъюра») кӀуру ччвур иливидива. Йиз йикьрар Узу гьадгъвахъди ва гьадгъвалантина вуйи насларихъди гьаммишандиз вуйи йикьрар вуди йитӀидиза.

²⁰ Эгер Исмаиликан кӀури гъашиш, Узуз дугъкан вуйи яв тӀалаб гъеебхьунзуз: Узу думу, саб гаф адарди, ужувлакк ккаъдиза. Узу думу бегьерлу апӀидиза ва дугъан тухум артухъ апӀидиза. Дугъкан йицӀикьюр регьбрин адаш хьиди. Узу дугъкан зурба халкь ктаидиза.

²¹ Аммаки Узу Йиз йикьрар, Сарайи увуз хъа йисан гьаму вахтназ гъапӀу Исакьдихъди йитӀидиза.

²² Заанури Ибрагьимдихъди вуйи Чан улхуб ккудубкӀу ва Думу Ибрагьим гъитну завариз за гъаши.

²³ Гьадму йигъан Ибрагьимди чан бай Исмаилин суннат апӀуру – хъасин чан хулаъ бабкан гъахьидарин, пулихъ гъадагънайидарин, яни хулаъ айи вари жили жвуварин, Заанури гъаписи, йиккун кӀакӀар кадатӀуру.

²⁴ Чан, Ибрагьимдин, суннат апӀурайиган, урчӀвцӀурна урчӀвуд йис вуйи.

²⁵ Исмаилин суннат апӀурайи вахтна йицӀишубуд йис вуйи.

²⁶ Ибрагьимдинна дугъан балин суннат гъадму йигъан гъапӀнийи.

²⁷ Дурарихъди Ибрагьимдин хулан вари жилижвуварин, гьадму хулаъ бабкан гъахьидарин ва жарадарихьан гъадагънайидарин суннатар гъапӀнийи.