Эвел 16 - Гирами Китаб

Гьажар ва Исмаил

¹ Ибрамдин хпир Сарайиз бицӀидар шуладайи. Сарайихъди Гьажар кӀуру Египетдиан вуйи гъараваш дишагьли хъайи.

² Сарайи Ибрамдиз гъапи: – РАББИЙИ узуз бицӀидар туврадар. Йиз гъараваш дишагьлийихъди йихь. Белки дугъаз бай шул ва, думу бай йизур ву кӀури, гьисаб апӀур. Ибрам Сарайи гъапибдихъ хъпехъуру

³ ва Сарайи чан гъараваш дишагьли, египетшив Гьажар, чан жилириз лукӀ-хпирди тувру. Му ляхин, Ибрам Ханаан жилариин алди йицӀуд йис гъабшиган, гъабхьиб вуйи.

⁴ Ибрам Гьажарихъди шулу. Гьажар гъагъдиъ шулу. Чак бицӀир кайиб аьгъю гъабшиган, Гьажариз чан аьхюр, Сарай, гьясбикк ккади гъузундар.

⁵ Думуган Сарайи Ибрамдиз кӀуру: – Узу аскканди дисурайивал яв тахсир ву. Узу йиз гъараваш увуз бицӀину хпирди тувунзавуз, хъа дугъу, чак бицӀир киршуб аьгъяди, узу гьясбикк апӀурадар. Гъит РАББИЙИ ухькан гьякь фуж вуш агри.

⁶ Ибрамди Сарайиз кӀуру: – Магьа яв гъараваш яв хилиъ аяв, дугъкан увуз фу ккундуш апӀин. Сарайи Гьажариз илзигуз хъюгъру, хъа Гьажар дугъхьан гьергру.

⁷ РАББИЙИН малайикдиз думу ичӀи чюлиъ, Сур шагьриз гъябгъюрайи рякъюхъ хъайи булагъдихъ дихъуру.

⁸ Малайикди дугъхьан: – Я Гьажар, Сарайин гъараваш! Наънан наана гъярайир вува? – пну гьерхру. – Узу Сарайихьан, йиз аьхюрихьан гьерграйир вуза, – жаваб тувру дугъу.

⁹ РАББИЙИН малайикди дугъаз: – Яв аьхюрихьна кьяляхъ хъадак. Дугъаз мютӀюгъ йихь, – кӀуру.

¹⁰ Хъа давам апӀуру, – гизафтӀан гизаф апӀидизаяв насил. Яв насил гьисаб апӀуз даршлубкьануб хьибдияв.

¹¹ Увук бицӀир кавук, бай шулвуз, – кӀуру РАББИЙИН малайикди, – дугъʼин Исмаил («Заануриз ебхьура») кӀуру ччвур илив, фицики яв дерд РАББИЙИЗ гъеебхьну.

¹² Яв бай чӀурдин даждиз ухшар хьиди: думу варидариз къаршуди, хъа вари дугъаз къаршуди удучӀвиди. Думу чан вари чвйирихъди душманди яшамиш хьиди.

¹³ Чахъди гъулху РАББИЙИЗ Гьажари «Эл-Руи» ччвур тувну («узу рякъюрайи Заанур»): Магьа гьамус узуз, узу Рякъюрайир, гъяркъюнзуз, – кӀуру.

¹⁴ Гьаддиз думу булагъдиз «Беэр-Лахай-Руи» (узу Рякъюрайи чӀиви РАББИЙИН булагъ) кӀури гъахьну. Думу булагъ Кадешна Беред йишварин арайиъ гьамусра а.

¹⁵ Гьажари Ибрамдиз бай хуру. Ибрамди Гьажарикан гъахьи чан бализ Исмаил кӀуру ччвур тувру.

¹⁶ Думу вахтна Ибрамдин миржцӀурна йирхьуд йис вуйи.