Tito 2 - Papang Yulni

Sumalna yamni kidika

¹ Di balna yulma kidika sumalna yamni yulni kidika karak kapapat atnin ki.

² Muihbararak balna kidika laih karas atninna ki, rispik lani dawak la yamni bik duwa atninna ki; rahm kulnin lani, dalani lani kidika dawak parasni kidika bik yamni atnin ki wauhnin kidika sip wauhna atnin yulni.

³ Sihm kaput bik, yayal muihbararak balna kidika bik rispik lani duwa atninna ki, dawak muih yulni yulwi karas atninna, dawak bik wasak diwas atninna ki. Di balna yayamwa kidika muih balna muhnina yakat yamni atnin ki

⁴ dawak yayal sirarau balna yakat disumalna atnin ki maridnina balna dawak walaninabis balna yakat bik dalani ditalna atninna,

⁵ la yamni duduwa atninna ki, maisihni dis, ūnina kidika yamni maintalwa atninna ki, dalani lani duwa atninna ki dawak maridnina balna kidika karak bik yamni atninna ki, muih as bik Papang yulni kidika yakat dutni yulwas atnin yulni.

⁶ Ahal wawahma balna yakat bik kulninna dulautah la yamni duwa atninna yulni,

⁷ di balna bitik yakat, dawak man lawa niningnakana atnam amput di yamni yamninna kidika. Disumalna mani kat, maisihni dis karuk dawak barangni karuk bik yamma,

⁸ yul yamni diyultinah, muih as bik pāt yakat ānin awas. Kaput karak laih angdika muihni man namangkauh yaklauwarang kidika asalni dakawarang ki, bahang sip mayang yakat di dutni as bik maiyulwas karang ki.

⁹ Di yamyang balna bitik yakat yul diyultah daninawan balna yakat yulnina dakana atninna yulni; dalani lani duwa atninna dawak biriwi nangnitnalanin laih awas.

¹⁰ Di malninna laih awaski, kaunah rispik lani duwa atninna ki, kaput karak di balna bitik yakat niningkana atnin mayang Mapapangki mailaihwi yakyang yulni balna kidika laih ampus nuhni yaksihni kidika.

¹¹ Bahang Papang dalani lani duwa kidika laih manikingkana, muih balna bitik kau laihwi yaknin lani diana kidika yakat.

¹² Kidika Papang dalani lani kidika laih maisumalwi di dudutni balna kidika dawak bayakwi kiunin dini balna dukih mayawa kidika bik dana atnin yulni, dawak makat yulnin ūni wisam yakat la yamni, barangni dawak minikun talnin lani bik duwa atnin,

¹³ tahanin lani alasna duda kidika kaiwi kawarang kat: Mapapangki dawak mailaihwi yakyang Jisas Krais alasna yaksihni nawatwi kaiwarang kidika.

¹⁴ Witing laih daunin kidika tingni yakat kana mayang mayulki, di dudutni balna bitik kaupak mailaihwi yakna atnin dawak maisihni dis palni maiyamna atnin, witing dini balna atnin yulni, di yamni kidika yamkih yamna atnin yulni.

¹⁵ Adika kuduh man lawa sumalna atnam kidika, kulninna dulautinah dawak bik dibiltinah la parasni karak. Muih as bik dutni mayamnin awaski.