Salmos 5 - Papang Yulni

Ma payahlawa kaupak Papang karak

Coro sumalniyang kaupak, bara. Devid salnimo.

^1-2 Dawan, yang kingki, dawak yang Papangki, yang yulki balna adika dakah, dawak aidik yultayang adika bik yadakah, kalmadinit yakat buktik yultayang kidika bik dakah, kat man yakat mikit yultayang.

³ Mapiris yakat yang dikit kidika dakah; mapiris palni yang yulki balna kidika mayultayang, dawak tahatayang man nangkitlatang dakana atnik.

⁴ Man laih Papang as dutni kidika dukih mawas ki; muih dudutni balna kidika sip man yaihmat yakat yalalahwas ki,

⁵ dawak bik, man muhma yakat pa as bik diski witingna manah kapat kaldakakawa muihni balna kidika. Dutni yamyang balna yakat dutni ditalaman,

⁶ alas muihni balna kidika itaman, dawak malnikau inin yayamwa balna dawak muih iyang balna kidika dutasman.

⁷ Nawatwak yang laih, man dalani lani nuhni dutaman kidika kau sipyang man ūma yakat āwinik; ¡kaput bik ayangma nuhni yamna atnik rispik lani bitik karak man ūma maisihni dis yakat talik!

⁸ Dawan, yang kau dutni yakukulwa balna yulni, la kat yamtaman yakat yaduta yawah, dawak bik ta yamni yakat yaduta yawah.

⁹ Witingna yul rahm barangni kidika yuyulwas ki; ¡pastawa niningkauh kidika laih dutni manah ki! Dawak dinitna suru kidika laih sau-ū kuhryakwi apahna kapat ki; ¡dawak tunina kidika laih alasmanah ki!

¹⁰ ¡Wah diata, Papangki! ¡Malnikau di yayamwa balna kidika kalatang kat daukalwang! Dutni mahni yayamwa kidika yulni duwinih, kat man namangkauh yaklalauna bahang.

¹¹ Alasna awanauh, witing yakat namatna daknin waltamana kidika; alasna ban kaput unbautanauh, kat man lawa nanitna daktaman bahang. Man yakat dalani matatalwa kidika, man yulma alasna duduwi,

¹² kat, Dawan man lawa blisin diataman bahang, man yakat barangni balna yakat; minikun talna lani dutaman kidika, witingna niningna yakat nanitnadaknin as bahang.