Salmos 3 - Papang Yulni

Papang yakat minit yulwi ilp yulna

Devid salnimo, witing walanibis Absalón yakat yamaniduwi kirana kidika.

¹ Dawan, dutni yakukulwa balna kidika mahni palni ki, mahniki yang nikingkauh yaklalauna kidika,

² ¡Muih manas laih yulki yuyulwi: “Papang yaklauwi laihwi yakwas karang atwi”!

³ Kaunah, Dawan man laih, takit dakyang man, alaskina man, dawak man kuduh watta kulnik dulautaman kidika.

⁴ Sarahtik Dawan yakat ilp yultayang, dawakat witing asangni maisihnidis kidika kaupak nangkitlawi.

⁵ Alangwik amayang, dawak wattik sahmutayang, kat Dawan yaklauwi ilp yawa bahang.

⁶ Kalbauyang muihni balna mahni kidika bilkilalauwas ki ya-awaihdak sakkidika nikingkauh yakalbaunin manah.

⁷ ¡Lawah, Dawan! ¡Yalaihta yakta, Papangki! Man lawa dutni yakukulwa balna muhnina yakat tisma; ¡muih dudutni balna ananina kidika bahma!

⁸ Man kuduh Dawan, laihta yakyang man kidika; ¡man, tawanma yakat blisin kalatah!