Salmos 2 - Papang Yulni

Man laih yang walakibisman

¹ ¿Papang karak kaltatalwas muihni balna kidika ais yamwi kiriyaklalauwih? ¿Amput dawak warknina balna kidika pini manah yayamwih?

² Sau kingni kabamintni balna kidika witingna aslah kalpakwi Dawan nining yakat yaklalauwi, witingna kingnina yakwi duduna yakat.

³ Dawak sarahwi yuyulwi: “¡Witing sinni balna kidika yakmukdarang! ¡Maisitna kidika kaupak dakdi malahwarang!”

⁴ Dawan, witing ma kau kisang yakat king kawa kidika yaklauwi niningnakari;

⁵ Usnitkat, kalpulihwak, bilninalauwi; kulnin daukalna parasni kau diyulwi:

⁶ “Yang kingki laih uman yaktik dunayang, yang asangki maisihnidis, Sayan yakat.”

⁷ Dawan witing di yamnin kulna balna kidika yulki ki: witing yayulna: “Man laih yang walakibisman, warmani yang mayakna yang.

⁸ Yayultang kat makuh nisan balna kidika man dima atnin, sau adika bitik bik man dima atnin, dawak yang lawik mana awaki.

⁹ Ayan kau king balna kidika īta dis yamma; ¡sihm sau suba bahwa kapat bikisni bahna karang!”

¹⁰ Sau kingni dawak kabamintni, manna amanglatanauh adika, ¡lankalnin dini adika yamni lan alahwanauh!

^11-12 Dawan ayangni nuhni yamtanauh alasna dawak rispik lani karak; manayukwih witing muhni yakat abuktanauh, witing kulnin daukalwarang kat manna ta yakat dautanama, kat witing kulnin daukalnin kidika īsi daukalwi. ¡Kulninnalak ki angdika muihni balna witing yakat ilp wawalwa kidika!