Salmos 149 - Papang Yulni

Papang laih di yamyang dawak king

¹ ¡Dawan ayangni nuhni yamna! Dawan yakat unbaunin wisam as unbautanauh; unbautanauh barangni balna pasyakat.

² Israel balna alasna alahwanauh, Sayan tawanni, kat Papang laih di bitik yamyang dawak king.

³ Witing ayangni unbauta sutta isdanauh, paswi yakisdinin balna kau Papang ayangni nuhni yamtanauh.

⁴ Kat Dawan laih witing tawanni yakat kulnin alasna yamwa bahang; minit bayakna resnipik kidika muih limamahni balna yakat diawi.

⁵ Barangni mana kidika alasna awanauh minitbayakna kidika karak, dawak amanamana yakauna unbautanauh alasna duta.

⁶ Manna kungmanamak yakat Papang kau ayangni nuhni yamnin kidika sakkawang dawak tingmana yakat isparah anan baini nabupak duwa kidika dutanauh

⁷ Papang kau tatalwas balna yakat biriwi diyamna atnin, dawak nesan balna yakat wah diana atnin,

⁸ king balna yakat sin kau sitnin dawak muih pararasni balna yakat bik sin tikini kau sitnin,

⁹ bahang kaput laih witingna niningna yakat ulna kaput yamna karang. ¡Bahang adika laih barangni muihni balna yakat bitik laih resninapik diana karang!