Salmos 147 - Papang Yulni

Nisan balna bitik kau kaput diyamwasdaih

¹ ¡Dawan ayangni nuhni yamna karang! ¡Ais yamniyah Papang yakat unbaunin kidika! ¡Witing yakat unbaunin dadamni kidika!

² Jerusalén kidika Dawan yaklauwi watwi laihwi yamwi dawak Israel muihni balna kalruhna kidika watwi uduhwi.

³ Witing yaklauwi diyamwi isningna bahna balna kidika, dawak di dakna balna kidika sitwi diawi.

⁴ Yala mahni ampus kidika witing yaklauwi kulwi talwi praisni kat dawi, dawak kidika balna bitik ayangnina āwi.

⁵ Mayang Mapapangki laih nuhni ki, dawak parasni bik nuhni; witing sinsni sirihni kidika laih sarandis ki.

⁶ Dawan yaklauwi laihwi dulauwi kulninna limahni balna kidika, kaunah muih dutni balna kidika laih sau yakat lakmukwi.

⁷ Tingkih lani karuk unbautanauh Dawan yakat; mayang Mapapangki yakat unbautanauh, paswi yakisdinin dini balna karak.

⁸ Witing yaklauwi kisan kidika mukus manah dawi, dawak was kidika redi yamwi sihwi sau yakat, dawak kalawakat dibasta balna kidika ukuswi asangpas yakat,

⁹ witing yaklauwi dibayahwi tinglau balna dawak asangpas dini balna kidika bik dawak kuparis walanibis balna kidika bik sihwak.

¹⁰ Aras parasni dawak muih al parasni bik awaski Dawan dukih kalawa kidika;

¹¹ Witing dukih kalawa kidika laih ayangni nuhni yayamwa kidika dukih kalawi, dawak bik witing dalani lani duwa yakat kukulwa kidika bik.

¹² Jerusalén, Dawan ayangni nuhni yamtah; Sayan, man Papangma yakat ayangni nuhni yamtah.

¹³ Kat witing yaklauwi dūrma ānin kidika parasni yamna dawak man walamabis balna yakat bik blismunna tawan nuhni pasyakat.

¹⁴ Witing yaklauwi kulnin aslah lani duwi kiwi man sauma yakat dawak plawar minik kidika karak ismanglak mawi.

¹⁵ Witing yaklauwi sihwi yulni balna kidika sau akat, dawak witing yulni kidika sirihni palni kiwi.

¹⁶ Witing yaklauwi mukus pihni kidika yamwi sihm sīp butuni kapat dawak was kidika kalawak buiwi sihm sau yahamni kapat.

¹⁷ Witing yaklauwi was dadasna sanni kidika sahwi, di minik binina kapat: sanni sihwa dikika karak was kidika dadasni kalwi.

¹⁸ Kaunah witing yulni kidika sihwak, was dadasna kidika arwi; dawak kalawak wing wauhwak, was kidika kiri.

¹⁹ Papang yaklauwi niningkana Jacob yakat dawak Israel yakat bik, witing yulni balna, lāni balna bik.

²⁰ Nesān uk balna yakat laih kaput yamwasdai, bahang kidika balna laih witing lāni balna kidika amanglalawasdai. ¡Dawan ayangni nuhni yamna kawang!