Salmos 146 - Papang Yulni

Papang warkni balna yamna yakat ayangni nuhni yamnin

¹ ¡Dawan ayangni nuhni yamna karang! Yang Dawan ayangni nuhni yamki kulnik bitik.

² Dawan ayangni nuhni yamki, sangka yang mani balna yakat; yang sangka yang mani balna akat, Papang yakat ayangni nuhni yamki.

³ Muih ahal nunuhni balna yakat kulnam āwi duwinih, kidika laih dauh muih al manah ki, sip laihwi yakwas ki.

⁴ Kidika balna dadauwakat watwi sau yahamni kakalwi, dawak kidika mani mahka witingna warknina dai kidika danh kalwi.

⁵ Alasnaki angdika muihni ilp duwa kidika Jacob Papangni kaupak, angdika muihni Papangni Dawan yak kulnin āwi duwa kidika.

⁶ Witing yaklauwi, makau kisang, sau kuma kidika balna yamna, dawak kidika balna pasyakat di bangkidika bitik. Dawak witing yulni kat laihwi duwi.

⁷ Taihna muihni balna la kat yamwi dawak yuhdadauwa muihni balna yakat di dibayahwi. Dawan yaklauwi laihwi yakwi silak muihni balna yakat.

⁸ Dawan yaklauwi miniknapa dis balna yakat miniknapa diawi; Dawan yaklauwi dulauwi bukna balna yakat, dawak Dawan yaklauwi ahal kulninna yamni balna yakat dalani ditalwi;

⁹ dawak Dawan yaklauwi pa ūk muihni balna yakat nanitna dakwi dawak dilaihwi dulauwi warau balna dawak tingmak balna yakat bik, kaunah muih dudutni balna yakat laih diyamwak ta didiswi.

¹⁰ Sayan, Dawan king kawa kidika laih ban kaput karang; man Papangma kidika king kana karang kurih andat balna kaiwa bitik yak. ¡Dawan yakat ayangni nuhni yamna karang!