Roman 8 - Papang Yulni

Sangnika kidika Papang Spiritni kaput atnin

¹ Kaput bahang, daunin yakat as bik wirlawaski Jisaskrais karak aslah balna kidika,

² kat lā spiritni kidika Krais Jisas yakat sangnika kalawi, dawak dutni lāni, daunin kidika balna kaupak malaihwi yakna.

³ Kat Papang yamna, Moses lāni balna pasyakat di balna sip yamwasdai kidika, kat sip-awas dai bahang yamnin muih balna uba yudutni kaldakakawa yulni: Papang witing walanibis palni sihna, muih al yudutni sip-awas, dutni manah yamwa kapat, dawak dutni kidika yulni sakripais yamnin, kaput laih dutni kidika daunin yakat wirlanin, sihm kidika yudutni munah.

⁴ Kaput yamna, mayang adika lā yulwa yakat yamna atnin yulni, kat mamuihki yudutni yakat mayalahdas bahang, kaunah mayalahdi Spirit karak.

⁵ Muihni yudutni karak yalalahwa balna kidika laih, usnit uinin kidika manah kukulwi witingna, kaunah spirit karak yalalahwa balna kidika laih, spirit dini kidika kulwi kalbabauwi.

⁶ Muihni nuhni dini yakat manah kulwi kalbabauwa muihni balna kidika laih daunin yakat diduwi kiwi; kaunah spirit dini yakat kulwi kalbabauwa kidika balna laih sangka ban atnin yakat duwi kiwi dawak kulnin aslah bik.

⁷ Muihni nuhni yudutni kidika yakat manah usnit uhuiwa muihni balna kidika laih Papang waihnila balna, kat sip-awas bahang witing lāni yakat kulnin dawak bik yamnin.

⁸ Kaput bahang, muihni nuhni yudutni yakat uiwa balna kidika laih, Papang dukih kalawa kidika yayamwas ki.

⁹ Kaunah manna laih kaput yalahtasmana, Spirit amput kidika kaput mana, kat Papang spiritni kidika laih manna karak ki. Krais spiritni dis muihni kidika laih krais dini awaski.

¹⁰ Kaunah Krais manna yakat yalahwakat, spirit kidika yalahwi man kat Papang yaklauwi lā kat muihni manayamna bahang, muihni nuhni kidika daunin yakat lakna karang bik, dutni kidika yulni.

¹¹ Dawak Jisas dauna kaupak dulauna spiritni kidika manna karak yalahwakat, sihm kidika spiritni manna muihmana nuhni daukalnin yamna kidika sangnika kalana karang, Papang Spiritni manna yakat yalahwa bahang.

¹² Kaput bahang, wirah balna, mayang di yamni as dudi, kaunah mamuihki nuhni yudutni dukih kalawa kaput laih yalahnin awaski.

¹³ Kat manna kidika kaput yalahtanama kat, dautanama, kaunah spirit munah kalatanang dauwarang kat manna muihmana yakat sakkidika, sangka awanama.

¹⁴ Kidika balna bitik Papang spiritni yaklauwi didukiwa balna kidika laih, Papang walanibis balna.

¹⁵ Kat manna dunamana kidika laih spirit as muih diniyamyang atnin spiritni awaski, watwi yamadunin yakat manaduwi kiunin, nawatkauh laih kidika spiritni yaklauwi manayamwi Papang walanibis atnin. Kat kidika spiritni munah Papang yakat mawi, dawak yuldi: “¡Abba! ¡Papang!”

¹⁶ Sihm kidika spiritni, mayang maspiritki karak libitwi witnis yulna atnin mayang laih uman Papang walanibis mayang.

¹⁷ Kat mayang laih witing walanibis mayang, bahang Papang di mayanin yamna sakkidika dudarangki, bahang kidika laih Krais karak dudarang ki, kat wauhdarang bahang witing karak, kaput laih witing karak alasnina yaksihni yakat mahawarang.

Alasnina yaksihni kaiwarang kidika

¹⁸ Kultayang, warmani wauhda balna adika di dauhki, adika usnit kat alasnina yaksihni taldarang kidika karak dawakat.

¹⁹ Di yamna balna adika bitik tahahawi talna atnin, kidika minitni yakat lāih kalahwarang kidika mayang Papang walanibis mayang kidika.

²⁰ Kat di yamna balna kidik ais kulnin kau yamna dai kidika laih disna, kauna alas kulnin lani laih awaski, kaunah Papang kaput yamna bahang; kaunah tahanin kidika laih ban watna dai

²¹ muih dini yamnin dawak daukalnin kaupak bik laihwi yakna kidika laih, Papang walanibis balna alasnina yaksihni kidika laihnin yulni.

²² Amangladi, warmani kat di yamna balna kidika kaidi, muih yal as muihbin dunin dalani wauhwa kapat.

²³ Witing kidika manah laih wauhwas ki, kaunah mayang bik, kat tanitkauh spiritni kidika mayana bahang mayang dudarang kidika. Kasak palni wauhdi, bahang tahadi Papang walanibis kapat maiduwarang mani kidik, kidika karak mamuihki adik laihwi yakna karang.

²⁴ Kidika tahanin karak mailaihwi yakna. Tahanin manah kat, mayang talda kidika laih tahanin as bik dis kapat ki, kat, ¿wais tahawi uman talwa balna kidika?

²⁵ Kaunah tahada kidika laih baisa taldas kat, baisa tahanin ki wauhda pasyakat.

²⁶ Sihm kaput bik, spirit kidika ilp mayawi, sip awas malahwa yakat. Kat mamikit bik yuldi amangladas bahang, kaunah sihm spiritni kidika mayang mayulki yulwi Papang yakat, yulni yulwa kidika laih sip yul kau yuldaski.

²⁷ Papang, witing muih kulninna talwa kidika, amanglawi spirit ais yulwa kidika, Papang kulnin dukih yakat, tawanni holi kidika munah.

Minit bayaknin kapat tanit

²⁸ Amangladi Papang yaklauwi di bitik diawi, witing yakat dalani tatalwa balna kidika yamni atnin yulni, kidika balna kuduh witing ais yulni yulwak uina balna kidika yayamwi.

²⁹ Baisa tanit kau Papang yaklauwi kidika balna yakat amangninalana dai kidika, tatuna kaupak witing walanibis balna kapat yakna, kaput laih witing walanibis kidika tatuna atnin wirah balna mahni pasyakat.

³⁰ Dawak tatuna kaupak Papang yakna dai kidika; kidika balna yakat bik diyulna uina atnin; dawak witing yakat uinin diyulna balna kidika laih lā muihni balna dikulna, kaput bahang alasnina yaksihni yakat bik diana.

³¹ ¿Baisa ais mayang yuldarang yah? ¡Papang laih mayang mailpki ki, muih as bik sip manikingkauh yaklauwas ki!

³² Papang witing walanibis palni pulihwasdai mayang yakat, nawatkauh laih mayang bitik mayulki daunin yakat āna dai, ¿amput mayawas karangyah, witing walanibis karak mailibitwi, di balna kidika bitik?

³³ ¿Papang walwi yakna muihni balna wais yulnina yakwarangyah? Papang witing yaklauwi lā kat dikulna ki.

³⁴ ¿Wais sipyah daunin yakat wirlanin? Krais Jisas kuduh dauna kidika; baisa minityakat, witing kuduh dauna kaupak yaklauna kidika, dawak Papang tingnipal yakat sakki, mayang mailpki yulwa.

³⁵ ¿Krais kulnin dalani kaupak wais maidakwi yakwarangyah? ¿Wauhnin kidika, trabil balna, dangnit yakat uiwi kiwa kidika, yuh, asna dis, yamadangni, kidika awaskat daunin?

³⁶ Ulna yakat yulwa kaput: “Man yulma, daunin yakat yangna; sīp as īnin pāni yakat duwi kiunin kapat yanayayamwi.”

³⁷ Kaunah kidika bitik yakat minit bayakyang balna tanit mayang, kidika witing dalani maitalwa munah.

³⁸ Yamni amanglatayang di as bik maidakyakwas karang ki Papang dalani kidika kaupak: daunin, sangka atnin, insal balna, parasni duyang balna, spirit balna parasnina, warmani balna, dawak matakitkau kaiwarang balna kidika bik,

³⁹ maluihni kau, tuhni kau, Papang yaklauwi di ūk ūk balna yamna kidika bik awas. ¡Papang kulnin dalani, Madakiwan Jisaskrais munah manikingkana kidika di as bik yaklauwi maidakyakwas karangki!