Roman 7 - Papang Yulni

Marid lani karak libitwi talwa kidika

¹ Wirah balna, manna lā amanglatamana, lā kidika parasni duwi muih minit yakat, kidika muihni sangka mani balna yakat.

² Taldarang kat, yal as marid kalahna kidika lā munah alni karak libitna ki witing sangka mani yakat; kaunah alni kidika dauwarang kat, yal kidika pri kalahwi lā kidika kaupak kidika al yakat kalsitna dai kidika.

³ Kaput laih yal kidika al ūk karak kalpakwarang kat alni sangka mani yakat, marid lani bahwi, kaunah alni kidika dauna karang kat, yal kidika la kaupak pri kalahwi, bahang kaput laih witing la bahwas al ūk karak kalpaknin sipki.

⁴ Kaput bik, wirah balna, manna Krais kalpaktanama kat witing karak daunamana lā niningyakat, kaput laih ūk kidika karak aslah atnin, yuldarangkat, kidika muihni dauna kaupak watwi yaklauna kidika. Kaput laih minik yamni yakdarang Papang yakat.

⁵ Kat mayang dutni balna karak yalahdadai kidika mani balna yakat, lā kidika yaklauwi ma muihki nuhni dukih kalawa kidika baisa uswi sahmuhna, bahang minik yaknamayang kidika laih daunin manah yaknamayang.

⁶ Kauna waralaih lā parasni dinit kau maiduwadai kidika kaupak daunamayang, bahang kaput laih pri mayang Papang dini yamnin sangnika wisam Spiritni yakat, baisa lā umani dinit yakat awas.

Dutni yang muihki nuhni yakat sat kidika

⁷ ¿Kaput bahang yuldarangyah lā kidika laih, dutni yamnin? ¡Kaput awaski! Kaput kauna, lā kidika awaskat laih, di dutni kidika amanglatas awaki. Tumnin kidika bik amanglatas awaki, lā yaklauwi yulwaskatlaih, “Man tumwinih.”

⁸ Kauna dutni kidika laih kidik munah laihna, sihm kidika lāni munah yang muihki yakat dutni balna dukih yawaki kidika yalaihna. Lā dis kat, dutni kidika bik dauna ki.

⁹ Ma as dai, lā disdai yakat, yang sangkika dutayang dai; kauna lā kidika kaina kat, dutni kidika watwi sangnika duna.

¹⁰ dawak yang daunayang. Kaput kalahna, kidika lā sangkika yanin dai kidika daunin kauh yana,

¹¹ kat dutni kidika lā munah kaiwi alas yayulna, dawak sihm kidika lāni kau yaīna.

¹² Parahni yulnin kat, lā palni kidika laih holi ki, yamni ki.

¹³ Kauna kaput kat ¿adika yamni dai kidika daunin yakat yaduwi kiunayah? ¡Sip awaski! Dutni kidika, rahm dutni kidik lāih yakna bahang yaīna di yamni kidika munah. Kaput bahang, lā munah lāih yakna ki dutni kidika di as yamadangni palni kidika.

¹⁴ Amangladi lā kidika spirit, kauna yang laih yudutniyang, dutni dini yamnin yakat yabakanpamna.

¹⁵ Amanglatasyang di balna yamnayang kidika, kat dukihyang kidika yamtasyang, kauna dutni talayang balna kidika yamtayang.

¹⁶ Kauna yamtayang kidika laih dukihyang kidika yamtasyang kat, amanglatayang kidika karak, lā laih yamni ki.

¹⁷ Kaput bahang yang awaski yamtayang kidika, kauna dutni yang muihki yakat sakkidika yaklauwi yamwi.

¹⁸ Amanglatayang, yang muih akat, yuldarang kat, muihki nuhni yudutni kidika, di yamni kidika watwaski; bahang di yamni balna kidika yamkihyang, kaunah sip-awasyang yamnik.

¹⁹ Di yamni yamkihyang kidika sip yamtasyang, kauna di dutni yamkih yāwas kidika yamtayang.

²⁰ Waralaih, yamdisah kidika yamtayang kat, yang awaski yamtayang kidika, kaunah dutni yang yakat sakkidika yamwi.

²¹ Amanglatayang, di yamni balna kidika yamkihyang kaunah, di dutni balna manah yang akat kaiwi yamnik.

²² Yang kulnik yakat Papang lāni kidika dukihyang,

²³ kauna di as tala yang akat, yul kulnik kidika sip-awas yang: kidika laih dutni lāni, kidika laih yang akat sakki, silak yakat yaduwi.

²⁴ ¡Yang mikunni palni! ¿Wais yaklauwi daunin parasni kaupak yalaihwi yakwarangyah yang muihki akat sakkidika?

²⁵ Papang manah sipki, yang tingki kalatayang Madakiwan Jisas Krais munah. Yulni balna witni akat: Yang amanglatayang Papang lāni yakat āwinik ki, kaunah yang muihki yudutni yakat laih dutni lāni yakat yang.