Roman 5 - Papang Yulni

Papang maikulwa kidika

¹ Papang yaklauwi lā kat mayang maiyamna kasak kulnin kidika munah, kulnin aslah dudi Papang karak, Madakiwan Jisaskrais munah.

² Kat Krais munah sipdai Papang yaihnit yakat kiunin kasak kulnin munah, witing ilpni kidika dunin, dawak ban kaput parasni mayang, kaput laih Papang alasnina yaksihni yakat kanin kidika tahanin as dudi.

³ Dawak kidika manah awaski, kaunah wauhda kidika alasnina as dudi, kat wauhnin kidika yaklauwi maparaski mayawi,

⁴ dawak kidika parasni mayawa munah mailaihwi talwak yamni malahna ki, kaput yamni malahwak tahawi talnin kidika maibunghdana ki.

⁵ Kidika tahanin laih dauh kalwas ki, kat Papang kulnin dalani duwa kidika maibahngna bahang Spiritni Holi mayana kidika munah.

⁶ Mayang alas laihwi yaknin kidika dunin sip-awas mayang kat, Krais kidika mani kat kaina, dauna muih dudutni balna yulnina.

⁷ Isi awaski muih as dawak kal-ina atnin muih ūk yulni. Lā kat muihni yulni karang bik sip awaski, kaput bik sip karangpa, muih as di yamni kalyamna yulni witing yulni daunin.

⁸ Kaunah Papang laih manikingkawi dalani maitalwa kidika, dutni yamyang mayang dai kaunah Krais kidika mayang mayulki dauna.

⁹ Dawak waralaih, Papang yaklauwi lā kat mayang maiyamna Krais dauna kidika munah, kaput bahang sip palni mawarang mailaihwi yakna atnin, witing munah, mani witni yakat wah kaiwa kidika.

¹⁰ Kat Papang laih, witing waihnila mayang dai mani yakat, walanibis dauna kidika munah witing karak yamni malahna, kaput bahang tanit palni mailaihwi yakna karang witing sangnika munah, witing karak uman yamni malahna bahang.

¹¹ Dawak kidika manah awaski, kaunah Papang yakat alasna yaksihni dudi, Madakiwan Jisaskrais munah, kat Krais munah witing karak yamni malahna bahang.

Adán dawak Krais

¹² Kaput bahang, muih al aslah kaupak dutni kidika sau akat kaiwi kana, dawak dutni kidika kaupak daunin kidika kaina, kaput laih dutni kidika muih bitik yakat kawi yaklana kat bitik dutni yayamna bahang.

¹³ Lā disdai kidika tanit kauh, sau akat uman dutni kidika kaiwi kana dai; dawak lā dis kidika yulni dutni kidika laih sip amanglawas ki.

¹⁴ Kaput kaunah, Adán mani kaupak Moses mani kat, daunin kidika laih parasni duna dutni yayamna balna minitna yakat, witingna balna dutni yayamna kidika laih yul dakakawas dai laih awaski, Adán yamna kapat, kidika laih kaiwarang wayani dai kidika.

¹⁵ Kaunah Adán dutni yamna kidika laih sip libitdas ki Papang prisantni mayana kidika karak. Muih al aslah dutni yamna kaupak muih mahni dadauna; kaunah Papang prisantni mayana kidika muih al aslah kaupak, Jisaskrais, kidika laih tanit yamni ki, dawak bik kidika laih muih mahni yamni kidika duduwarang ki.

¹⁶ Muih al aslah dutni yamna kidika karak sip libitwas ki, Papang prisantni kidika karak, dutni aslah kaupak kaina dauna yakat wirlanin kidika, kaunah Papang prisantni laih, dutni mahni kidika kaupak, muih ahal yakat lā kat muihni balna diyamwi.

¹⁷ Kat daunin kidika parasni duna dai kat, muih al aslah dutni yamna yulni, kidika laih rahmki, Papang minikun talnin nuhni duwa kidika, dawak minit kalkulwas palni, lā kat yamyang muihni kalyamwa kidika, kaput laih sangnika ūk yakat sangka karang muih al aslah munah, kidika laih Jisaskrais.

¹⁸ Dawak Adán dutni yamna yulni muih ahal bitik daunin yakat wirlana kaput, Jisaskrais lā kat yamna kidika muih ahal bitik lā kat yamyang balna dikulna, kaput laih sangka ban atnin kidika dunin.

¹⁹ Yuldarang kat, muih al aslah yul dakawas dana kidika munah, muih manas dutni yamyang dikulna; kaunah sihm kaput bik laih muih al aslah yul dakawi yamna kidika yulni munah, muih manas lā kat yamyang dikulna karang ki.

²⁰ Lā kidika baisa minitkau lakna dutni kidika minitkau nuhni kalnin yulni; dutni kidika baisa nuhni kalawak, Papang bik baisa minikun talnin kidika nuhni duna.

²¹ Dawak kaput dutni kidika parasni kalwi daunin kidika duaina, kaput bik laih minikun talnin Papang duwa kidika parasni kalwi lā kat yamyang kapat mayamna, dawak sangka ban atnin kidika mayana Madakiwan Jisaskrais munah