Roman 11 - Papang Yulni

Israel yakat walwi yakna kidika

¹ Waralaih yultik dakayang: ¿Papang witing tawanni kidika ruhmwi dana kat awih? ¡Kaput awaski! Yang bik Israel yang, Abraham sulani, dawak Benjamín sulani.

² Tatuna kaupak, Papang yaklauwi Israel kidika witing tawanni kulna, kidika bahang waralaih ruhmwi dawaski. ¿Manna Ulna yakat amanglatasmanah yulwa kidika yul umani balna yakat Elías Papang kau minit yulwi Israel yulni yakna dai kidika? Yulna:

³ “Dawan, pramapit balna ihina, dawak man kau sakripais busnin pāni balna bik daukakalna, yang manah sangka likyang, yang akat bik yaīnin yawawalwi.”

⁴ Kauna Papang nangnitlana: “Yang diki ahal tausin tiaskaubu yaktik lanayang, bahang witingna laih dawan dauh Baal yakat limbabahwas ki.”

⁵ Kaput bik laih, waradika buas wawatna bubin, Papang minikun talnin kidika munah walwi yakna kidika.

⁶ Papang, minikun talwa kidika kau kat, yamwa balna munah awaski; kat kaput katlaih, Papang minikun talnin lani duwa kidika laih minikun talnin lani awas karang.

⁷ ¿Bahang ais yah? Israel balna witingna wawalna kidika yayakwasdai, kauna Papang walwi yakna balna kidika laihtak yayakna. Ūk balna kidika laih kulninna dadasni yammukna,

⁸ Ulna yakat yulwa kaput: “Papang yaklauwi spiritnina kidika dadasni yammukna, bahang kaput ki warmani kat; miniknapa dis balna kidika diana, tapanina dakawas balna dai kidika bik diana dakanin.”

⁹ Devid bik yulwi: “Witingna kasnin alasna yayamwa kidika bik, isning aiwas kat laihnin dini kalwang, kaput laih kalnina bauwang dawak wah duduwang.

¹⁰ Miniknapa kidika puklakwak di talwas dadawang; dangnina kidika uruni kakalwang ban kaput atnin.”

Ju awas balna kidika laihwi yakna

¹¹ Waralaih yultik dakayang: ¿Ju balna kalnina babauna kidika, rahm palni bubuknapah? ¡Kaput awaski! Nawatkauh laih, Ju balna yul dakakawasdai kidika, ūk balna laih laihwi yaknin kidika lalaihna, kaput laih Israel balna kidika minit anna atnin yulni.

¹² Kaput bahang, Ju balna kalnina babauna, dutni bubukna kidika balna bitik laih sau adika di manas lan kalnin, dawak ju awas balna kidika bitik, ¡Uman sipki makulnik yakat kulwi talnin ampat karangyah laihwi yaknin mani palni kaiwarang yakat!

¹³ Kauna di as dutayang manayulnik, Ju awasmana yakat. Papang yasihna ju awas balna mana yakat, kidika bahang adika warkni adik dalani talayang.

¹⁴ Yang nikisan balna kidika bik manna yulmana apis minit ahanwak dakakih yawi, kaput laih laihwi yaknin yakat duwi kiuna atnin.

¹⁵ Ju balna ruhmwidana yulni, sau akat duaina kat Papang karak watwi yamni kalahnin kidika, ¿ais duaiwas karangyah uman witing yakat kalduduna balna kidika yakat? ¡Kidika laih sangka atnin kidika duaiwarang ki dauna balna kidika dinina!

¹⁶ Plawar tatuna busna kidika Papang dini yakwak, planiwar kidika bitik laih witing dini. Pan nuhni as rikni kidika papang dini yakna kat, tingni rahni balna bitik laih witing dini.

¹⁷ Olib kidika laih ju balna, tingni rahni buas dadakna, dawak kidika pāni yakat asangpas olibni kidika libitwi sitna, kidika kuduh man. Kaput laih man bik kidika rikni karak aslah alahwanaman, dawak kidika olib sangnika bik.

¹⁸ Kauna alasna yaksihni kidika duwinih, tingni rahni palni dai kidika dauh kalkulta. Kaput yamma kār amanglatah, man kuduh rikni balna laihta dutasman kidika, kaunah rikni kidika man yakat malaihwi duwi.

¹⁹ Sipkat yulma: “Agha, tingni rahni buas dakwi pāni yakat yahana Olib yakat.”

²⁰ Kauna, kasak kulnin dis dai kidika bahang dadakna, kaunah man laih yakat sakman kasak kultaman kidika yulni manah. Kidika bahang ayangma nuhni yamwinih, nawatkauh laih Papang yakat yamanidutah.

²¹ Kat Papang witing rahni balna palni yakat dutnina dawak diswaskat, man yakat bik dutma dawak diswas karang.

²² Talah, ampat Papang kidika yamniyah, dawak lani bik parasni ki. Bubukna balna kidika niningna yakat bik ban parasni dai, dawak man karak laih yamni ki. Kaunah ban yalahnamki witing minikun talnin lani duwa kidika kat; kaput awas karang kat, man bik madakpamwarang.

²³ Dawak, Ju balna kasak kukulwas kidika dadawarang kat, watwi duaiwi libitna karang, kat Papang laih parasni duwa bahang watwi libitnin.

²⁴ Man laih, nining kaput asangpas olibniman bahang, madakna dawak olib yamni yakat malibitna, ¡ampus yamwas karangyah ju balna yakat laih, olib yamni tingni balna kidika, watwi duaiwi libitna karang sihm olib yamni yakat!

Witni kat Israel balna laihwi yakna kidika

²⁵ Wirah balna, dukihyawi amanglanamna adika Papang warkni balna malni kau kidika, kidika yulni manna manah di amanglatamana kapat kaldakakawinih: Israel balna kidika kulninna dadasni kaldakakana pis as as yakat, kaunah kidika laih Israel balna awas kidika bitik kakawarang usnit kat.

²⁶ Adika kalahwakat, Israel balna bitik kidika laihwi yaknin kidika duduwarang, kat Ulna yakat yulwabahang: “Laihwi yakyang kidika Sayan kaupak kaiwarang dawak Jacob kaupak dutni balna kidika naikau yakwarang.

²⁷ Dawak adika karang aslah alahwanayang pranimis kidika witingna karak yang witingna dutnina yakpamki kat.”

²⁸ Yul wisam niningyakat, Ju balna niningna yakat laih Papang waihnila balna, manna yakat sansni manawa kidika; kaunah Papang laih baisa dalani ditalwi; kat witingna muihninabarak balna kau walwi yakwi duna dai bahang.

²⁹ Kat Papang yaklauwi kalawa kidika laih watwi dakyakwaski, dawak kiunin kalyulna kidika bik dawas ban ki.

³⁰ Ma bayakna balna yakat, manna Papang yulni dakasdanamana, kaunah waralaih ju balna kidika Papang yulni dakawas dadawa bahang, Papang manna yakat mamaknakun manatalwi.

³¹ Sihm kaput bik, witingna yul dakawas dadana, kaunah kidika laih Papang manna yakat mamaknakun manatalnin yulni, dawak kaput bik, waradika bik, witingna yakat miniknakun ditalnin.

³² Kat Papang laih dilaihna bitikkau sihm kapapat, yuldakawas balna kidika, witni kat bitik kapapat dalani ditalnin.

³³ ¡Papang ritsni balna kidika ampus tuhni duwih, sinsni tuhni kidika dawak di amanglawa balna kidika! Muih as bik sip-awaski witing di yamna balna kidika lāih yakwi yulnin, dawak tani kiwa balna kidika bik amanglanin.

³⁴ Bahang “¿wais Papang kulnin lani kidika talwih? ¿Wais sipyah yul sumalnin?

³⁵ ¿Wais witing yakat di as kalanayah, bahang kidika dini watwi nawatwi kalana atnin?”

³⁶ Kat di bitik laih Papang kaupak kaiwi, dawak witing munah ban kaput ki, dawak kidika laih witing dini balna. ¡Papang yakat ayangni nuhni yamna kidika ban kaput karang! Amén.