Proverbios 9 - Papang Yulni

¹ Sins tuhni kidika laih ūni yamwi, rahni tiaskaubu yaksisihni karak yamna;

² tinglau balna ina alasnina yamnin, wain tanit yamni kidika yamna, dawak tibil yakat lakna

³ dawak muhna muihni yakat sihna sarahna atnin tawan nuhni kidika tuna kaupak:

⁴ “¡Akat aiwah, wawahma di amanglatasmana kidika!” Sihwak diyuyulna isningnapuk awas balna yakat:

⁵ “Aiwa kastanauh kasnik kidika kaupak dawak ditanauh wain ridi yamnayang kidika.

⁶ Ismangnapuk awasmana kidika datanauh, kaput laih sangka awanama; muih sinsnina siririhni kapat awanauh.”

⁷ Tapdadas dawak muih dutni kidika barangni atah, dutni mayulnin dawak mausnin kidika manah laih yakma.

⁸ Tapadadas yakat biltah, waihla kalaih yakma; sins duyang kidika barangni atah, yamnin matalnin kidika yakma.

⁹ Sins duyang yakat kalatah, dawak baisa sins duyang kalahwarang; muih al yamni yakat sumaltah, baisa di amanglawarang.

¹⁰ Sins tuhni kidika laih Dawan yakat risnipik kalanin; Holi muihni yakat amangnilanin laih sins sirihni dunin.

¹¹ Sins tuhni tingnikih kaupak, ma mahni sangka awama sangmaka kidika kurih mahni duma.

¹² Sins duyangman kat, di dunin kidika laih man dima karang; kaunah tapadadas man laih, man silp talma.

¹³ Tapdadas kidika laih yal as yul trukyang kapat ki, mutu di amanglawas kapat ki.

¹⁴ Witing dūrni yakat, sini as kau duwi yalahwi, tawan nuhni paskau tanit maluihni yakat,

¹⁵ dawak muih bayakwi uiwa balna yakat diyulwi ta yamni kau uiwa balna yakat:

¹⁶ “¡Akat aiwanauh, wawahma di amanglatasmana kidika!” Isningnapuk awas balna yakat diyulwi:

¹⁷ “Malna wasni kidika laih tanit auhni ki; yakmaldi plawar busna kasnin laih tanit yamni ki.”

¹⁸ Kaunah witingna amanglalawas ki yulwak uina muihni balna kidika daunin pāni yakat wayanina manah kidika.