Proverbios 8 - Papang Yulni

Sins tuhni tanka yulwa kidika

¹ Sins tuhni kidika parasni sarahwi yulwi; dawak sins sirihni kidika laih dinitsuru yulwak dakawi.

² Asang ububulni tuna yakat yaklauwi, ta bayakwa balna yakat yaklauwi,

³ dūrkung balna yakat yuwak dakawi, tawan nuhni kiwi kāwa balna yakat bik:

⁴ “Ahal mana kidika yakat kiwi yulki balna adika.

⁵ Wawahma di amanglatas, tapadadas balna, ¡lan alahwanauh ismangnapuk atnin dawak bik amanglatanauh!

⁶ Dakanauh, manayulki kidika di tanit yamni, dawak bik mailaihwatwas kidika.

⁷ Yulbauki kidika laih rahm ki; dukih yāwaski alas yulnin kidika.

⁸ Yulki balna bitik laih lā kat ki; kidika yakat dauh as bik diski.

⁹ Sinsni sirihni dawak di amanglawa muihni kidika yakat, yang yulki balna laih lāih ki dawak sip kallaihwatwas ki.

¹⁰ Lalah dawak gol tanit yamni kidika karak bik, tanit dukih diawi disumalnin dawak di amanglanin balna kidika.”

¹¹ Sins tuhni kidika kauh minit nuhni kulna ki, kipala dahlwa karak dawakat ¡di tanit dukih diawa kidika karak bik sip libitwas ki!

¹² “Sins tuhniyang, sins sirihni kidika karak aslah yalahtayangna, amanglatayang yaknik yul tanit yamni sumalwa kidika.

¹³ Dawan risnipik kalanin kidika laih, dutni yakat maisihni talnin. Yang waihla talayang witing manah kapat kaldakanin kidika, ta dutni dawak alas yulnin kidika bik.

¹⁴ Yang yakat ki, warkni balna dawak yamnin kidika bik, yang kuduh la kat yang kidika dawak parasni kidika.

¹⁵ Tingkih kidika yangkaupak ki, king balna king kakawa kidika dawak kabamint balna kidika muih rahmni kidik ahawi.

¹⁶ Yang munah tingkih, kabamint balna kidika laihwi duduwi dawak la muihni balna kidika muih lanina yayamwi.

¹⁷ Yang dalani ditalayang, dalani yatatalwa balna yakat, yawawalwa kidika yāyayakwi.

¹⁸ Ritsni kidika yang lawik yutayang dawak risnipik bik, risnipik nuhni dawak baraknin bik.

¹⁹ Yang yutayang kidika laih tanit yamni ki, gol karak dawakat; kaput bik lalah karak bik awaski, tanit yamni ki.

²⁰ Yang laih ta barangni munah yawayang, la kat tani munah.

²¹ Dalani yatatalwa kidika, witingna duninna kidika diatayang: ūnina kidika di minit nuhni manah buhngdaki.

²² “Dawan yaklauwi yayamna, tatuna wark yamna kaupak, baisa di balna bitik yamwas tanitkauh.

²³ Mani balna tatuna kaupak yayamna, sau yamwas tanitkauh.

²⁴ Kuma wasni nunuhni balna kidika dis tanitkauh yayakna, was tuna balna kidika buhrwi kalalahwas tanitkauh.

²⁵ Asang balna dawak asangpas balna kidika yamwas tanitkauh Dawan uman yayakna dai;

²⁶ witing sau adika baisa yamwas dai, sau yahamni kau sau yamna kidika bik disdai.

²⁷ Makau kisang kidika yamna kidika kuma wasni minit kau, yang yakat sakyang dai.

²⁸ Makau kisang yakat mukus balna āna kidika dawak kuma tuhni kau buhrwi kalahwa balna yamna,

²⁹ kuma yakat aput atnin pakna kiwi watwa kidika kaupak bayaknin awaski, sau rahni balna āna kidika,

³⁰ yakat sakyang dai, yaihnit yakat. Minit balna bayakwa bitik yakat alasninayang dai, dawak witing muhni yakat isdayang dai, awar balna bitik yakat;

³¹ sau yamna kidika yakat yakisdadai, ¡isinglak dakanayang muih kidika yulni!

³² “Dawak waradika laih walakibis balna dakanauh, yang amput yamnayang kaput yamtanauh, ismangnalak awanama.

³³ Sumalwa yakat dakanauh; sins tuhni kidika ruhmwi dadawinih.

³⁴ Isninglak ki, kidika muihni yadakawa kidika, ma bitik yakat tahahawi, yang ūki dūrni balna yakat.

³⁵ Kat yang adika yāyaknin laih, sangka atnin kidika yakna kapat ki dawak Dawan kulnin yamni kidika duna atnin;

³⁶ kaunah yang kaupak yaklawa kidika laih sangnika yamadangni yakat āwi; maisihni ya tatalwa balna kidika laih daunin yak dalani tatalwi.” karak biri biri niningkauh kidika