Proverbios 5 - Papang Yulni

Yal īsi kidika laih muih al disnin

¹ Sinski tuhni kidika dakah, walakibis; sinski sirihni kidika yamni dakah

² Kaput laih di bitik barangni manah yamma sip awama yulbaunam sins lani karak.

³ Muih yalni kidika yulni damni ki dinitsuru yulwa kidika yudutni ki sihm disala kapat;

⁴ Kaunah tapahlni kalahwi witni kat dibasta tapalhni kapat dawak tanit baini ki, isparah anan nabupak duwa karak dawakat.

⁵ Kidika yal karak atnin laih daunin yakat dukiwi; lapakwi kiwa kidika laih sau-ū yakat barangni kiwi.

⁶ Kidika yal laih isning kulwaski sangka tani kidika witing talwaski kiwa tani kidika dutni bik.

⁷ Kaput bahang, walakibis, yadakah, sumaltayang kidika kaupak dawi yaklawinih.

⁸ Muih yalni kidika kaupak naikau alahwah; witing ūni dūrni yaihnit yakat bik kiwinih,

⁹ kaput laih kurih mahni ritsni balna kidika disnam awas muih dudutni, talasman balna tingnina yakat;

¹⁰ kaput laih muih talasman kidika kalbuhng danin awaski man wark alahwanaman balna minik kidika kaupak.

¹¹ Kaput awas karang kat, aidama man muihma nuhni kidika tani tani witwi kiwakat.

¹² Dawak yulma: “¡Amput dawak dauh kulnayang daih barangni yahawak! ¡Ampadawak yabilwa kidika dutni dakanayang daih!

¹³ ¡Dakakih yāwasdai maestro yakat, yasumamalwa yakat dakasyang dai,

¹⁴ baisa binilah dai dutni yakat yawinik tawan bitik muhni yakat!”

¹⁵ Was damat buhwa kidika ditah man silp pama kuhrnaman kidika kaupak.

¹⁶ Wasma buhrwi kalahwa kidika kaupak utuhwinih; pini dauh utuhwinih tapas yakat.

¹⁷ Pakudungni dawak was kidika laih man dima, muih ūk dini awaski; ¡muih pini talasman balna kidika yakat diawinih!

¹⁸ ¡Blisyamna kawang wasmatuna kidika! ¡Wahma man yalma kidika karak alasna dutah

¹⁹ yudutni dawak dalani talwa sananibin kapat! ¡Laihta umtaman ban kidika! ¡Witing dalani talwa kidika kau mawadatwa kidika!

²⁰ ¿Ais yamta dutni alahwamayah, walakibis, muih yalni karak? ¿Ais yamta yal as talasman kidika tingni yakat bukmayah?

²¹ Dawan laih talwasakki, muih al di yamwa balna kidika karak; angkat lapakwi kiwa balna kidika bitik talwi.

²² Muih dutni kidika sihm dutni yamwa kidika kallaihwi; witing dutni yamwa kidika yaklauwi kalsitwi wah kapat.

²³ Yamni yamwas kidika yaklauwi daunin yakat kalduwi kiwi; tapani dadasni kidika yaklauwi disnin yakat duwi kiwi.