Proverbios 4 - Papang Yulni

Ta yamni yakat kiunin yulni kulnin dulauwa yulni balna

¹ Walakibis balna, papangma yul sumalwa kidika dakah; yamni dakah, kaput laih la kat atnin kidika duma.

² Yang lawik yamni sumalnayang, kaput bahang sumalnayang balna kidika pini dadawinih.

³ Kat yang bik walanibis yang dai: nanangki dalani yatalwadai

⁴ dawak papangki laih kaput yul yasumalwadai: “Yulki balna kidika kulnam yakat āta dutah; yamnin mapaktayang kidika yamtah, sangka awama.

⁵ Sins tuhni dawak la kat atnin kidika dutah; yulki balna kidika datang damatkahnin awaski.

⁶ Sins tuhni kidika dalani talah, ruhmwi dawinih kidika yaklauwi namatdakwarang.

⁷ Di balna bitik pasyakat tanit ki, sins tuhni dawak la kat atnin kidika dutah.

⁸ Dalani talah, madulauna karang; wakaihtah, risnipik mawarang;

⁹ ¡paknin tanit yamni kidika prisant mana karang dawak kidika kau kraun mapakna karang!”

¹⁰ Yulki balna dakah, walakibis, dima dutah, sangmaka naini mawarang.

¹¹ Yang madutik yawaki, sins tuhni tani munah: matingkat ta yamni munah lik-awama,

¹² tamapas yakat makapahwas karang, kalma bauta buktas awama, irama bik.

¹³ Sumalna yakat laihtah, pini dawinih; warkni yamtah, kidika laih man sangmaka.

¹⁴ Muih dudutni balna dangnitna yakat kiwinih, dudutni yayamwa kidika usnitna uiwinih.

¹⁵ Witingna tanina munah bayakwinih, witingna kaupak naikau lāwah, tamat yakat yawah,

¹⁶ dutni yayamwas kat isningna aslah awaski; miniknakauhwas ki, muih as kau dutni yayamwak bukwas kat.

¹⁷ ¡Kidika laih witingna kasninna dawak dininna kidika laih dutni dawak kalbaunin lani!

¹⁸ Lā kat balna tanina kidika laih, ma payahlawak yaringni kaiwa kapat ki: baisa kilwi kiwi yaringni kidika bitik duwa kapat.

¹⁹ Kaunah dutni balna tanina kidika laih puksani ki; ¡ais yakat kalnina babauwa pa amanglalawas ki!

²⁰ Yulki balna dakah, walakibis; yamni tapayuta dakah.

²¹ Mamakpa kaupak dawinih, ¡kulnam yakat āta dutah!

²² Kidika yaklauwi sangka dawak muihni yamni bik yayakwa muihni balna bitik kidika.

²³ Kulnam yamni maintalah, sau akat dini balna karak dawakat, kat kidika laih sangka atnin rikni bahang.

²⁴ Alas yulnin kidika datah; alas yulnin kidika kaupak naikau lawah.

²⁵ Tamat yakat manah talah, muhmat yakat manah talah.

²⁶ Angkat kalma ataktaman kidika yamni talah, kaput laih sau dadasni yamni yakat atakma.

²⁷ Tama kidika kaupak data kalahwinih; dutni yakat lapakta yawanam kidika datah.