Proverbios 3 - Papang Yulni

Amput sins tuhni laihnin kidika

¹ Walakibis, yul masumaltayang kidika damatkahwinih; kulnam yakat āta dutah lāki balna kidika,

² kaput laih sangmaka naini duma dawak ismanglak kidika mabuhng karang.

³ Dalani lani dawak di rahm kidika ruhmwi dawinih; man karak yawah sihm alah kapat; kulnam yakat āta dutah,

⁴ duma ilp dawak yamni matalnin kidika Papang kaupak dawak muih kaupak bik.

⁵ Kulnam bitik āta dutah Dawan yakat kaunah man alas sinsma sirihni yakat laih awaski.

⁶ Di balna yamtaman bitik kidika, Dawan kidik dutah, witing ta barangni munah maduwi kiwarang.

⁷ Sins duyang kapat laih kaldakawinih; Dawan yakat rispik kalatah dawak dutni kaupak lawah:

⁸ ¡kidika laih sika tanit yamni ki muihma nuhni parasni atnam!

⁹ Dawan risnipik kalatah ritsma balna kau di minik tatuna yaktaman balna kidika kau;

¹⁰ kaput laih tutna karang bahngwi dima minik balna putaman dawak wain putaman kidika bik.

¹¹ Walakibis, ruhmwi dawinih, Dawan barangni yamwa kidika, mabilwak kulnam daukalwinih;

¹² kat Dawan yaklauwi barangni āwi wais yakat dalani talwa kidika, papang as yaklauwi walanibis dalani talwa yakat barangni āwa kapat.

¹³ Isninglak ki wais kat sins tuhni yakwa kidika, dawak sins sirihni duwada kidika;

¹⁴ kat tanit yamni bahang lalah karak dawakat kaput bik laih tanit ilp mayawi gol karak dawak.

¹⁵ Sins tuhni kidik laih tanit minit nuhni ki kipala minit nunuhni karak dawak; ¡di dukih mayawa balna kidika karak bik sip libitdaski!

¹⁶ Tingpal niningkauh kidika, sangnika naini kalawi, dawak wadahni kau laih ritsni dawak risnipik kalawi.

¹⁷ Uiwi kiunin kidika laih di yamni ki; kidika tani munah kiunin laih kulnin aslah lani.

¹⁸ Sins tuhni kidika laih sangka atnin, wais duwa kidika; ¡laihwatwi dunin sip balna kidika laih isningnalak ki!

¹⁹ Sins tuhni dawak sins sirihni karak, Dawan yaklauwi makau kisang dawak sau kidika yamna;

²⁰ sins tuhni karak yamna, kuma sahwi yakna kidika dawak mukus kaupak was buina atnin.

²¹ La kat atnin kidika ban dutah walakibis, di barangni manah yamni kidika mamakpa kaupak kalahnin awaski,

²² kidika laih man namangyakat sangka atnin karang alah yaksihn as kapat karang.

²³ Ismang yamni ta yakat lik-awama dawak watas bik kalma bauta buktas awama.

²⁴ Wingmata puhtaman yakat, yamadutas awama; alangwama kat, ismanglak amama.

²⁵ Sirihni yamadangni kalahwa kidika yamadutas awama muih dudutni balna minitna yakat dutni kaiwarang kidika bik,

²⁶ kat Dawan yaklauwi kulnam yakat āta dunam mawarang bahang madawak laihnin dini malni kau ahana yakat bukta awama.

²⁷ Damawan balna ilp yuyulwak diatas atnam awaski, man yamnin sipman kat.

²⁸ Dawinih yahan mani kau warmani ilp kalanam kidika.

²⁹ Wark dutni yamnin kidika ridi kalahwinih man yakat kulnin āwi duwa muihni niningyakat.

³⁰ Muih as karak bik kalbaunin walwinih, muih as bik dutni mayamwas kat.

³¹ Tumwinih muih dutni kidika witing yamwa kaput bik yamwinih;

³² kat Dawan laih muih dudutni balna kidika dutni talwa bahang, kaunah muih yayamni balna yakat laih isning āwi duwi.

³³ Dawan yaklau la tuhwi, muih dutni ūni yakat, kaunah muih la kat ūni yakat laih blisin kalawi.

³⁴ Sarahni yulyang balna yakat Dawan sarahni diyamwi, kaunah limahni balna kidika laih miniknakun ditalwi.

³⁵ Rispik kidika laih, sins duyang balna prisantnina, kaunah tapdadas balna kidika laih rispik dis kidika yayamwi.