Proverbios 25 - Papang Yulni

Salomón watbu yulna sins lani balna

¹ Adika balna bik Salomón kulnin lani balna, Judá kingni dini yamyang balna yaklau uhulna:

² Di balna malni yakat dunin kidika laih Papang alasnina yaksihni ki, dawak kidika balna yakat kanin kidika laih king balna risninapik lani.

³ Makau kisang maluihni kidika, sau pasluihni tuhni kidika dawak king balna kulninna lani kidika laih, pasyakat kanin bik sip awaski.

⁴ Di maisihni dini balna kidika lalah yaihnit kaupak naikau yaktah, dawak lalah kidika laih sutak as yakwarang;

⁵ dutni muihni kidika king warkni kaupak naikau yaktah, dawak tronni kidika laih la kat kalwarang.

⁶ King muhni yakat nuhni kaldakawinih, dawak muih nunuhni dikulna balna panina kidika bik duwinih;

⁷ baisa yamni ki mayuyulwakat kidika yakat ilwana atnam, dawan nunuhni balna muhnina yakat sau yakat buknam kidika karak dawakat. Man silp mamakpa karak talma kidika

⁸ usnit kat la yayamwa pāni balna yakat duwi kiwinih, kat witnis muihni ūk kidika alas yulnin sipki dawak witni kat man ais yamnam pa amanglatas awama.

⁹ Angdika muihni yulma yakwarang kidika niningyakat tamatdaktah, kaunah muih ūk dini malni yakat sakkidika laih yakwinih;

¹⁰ bahang muih as madakawi asalma yaknin sipki, dawak man ayangma sau yakat bukwarang kidika laih sinika dis karang.

¹¹ Yul balna yulnin awarni yakat laih sihm gol mannisana balna lalah kau lakwi birna kapat ki.

¹² Sihm ting-ānin dawak alahnin dini gol yamni kau yamna kidika kapat ki, sins lani munah bilwakat dakawa muihni kidika.

¹³ Yul yulyang barangni kidika laih sihwa muihni kidika dini ma daihni yakat sihm mukus pihni sanni kapat ki, bahang daniwan yakat kulnin dulauna wisasamni kalawi.

¹⁴ Mukus dawak wing dawak was lauwas, kidika laih muih as di kalaki ti di as bik kalawas kidika ki.

¹⁵ Kulnin laihwatnin lani kidika laih kulnin daukalna yakat laihwatwi; yul balna tani kidika laih parasni dis yamwi.

¹⁶ Amak yakma kat, mahni minit bayakta diwinih, kat mahni dima kat tamangyakma.

¹⁷ Man kaltalyang yamni dutaman muihni yakat yawa kaltalaman kat, wat wat yamwinih, matalna manah kalsuhwakat dutni makulnik awas yulni.

¹⁸ Mazo, isparah, sibang sutni subabangni, ¡kidika kapat ki angdika muihni kaltalyang yamni duwa kidika niningyakat yul alas kalyulwa kidika!

¹⁹ Kaidinin mani yakat malni kau pāt yakat ayan muihni yakat yamni kaltalna atnin kidika laih mabarahkimak nakas bahbukna likmayang kapat ki kidik awaskat ma-anaki as kasna kat di kasda kapat ki.

²⁰ Isning kulwi kalbauwa yakat unbauna atnin kidika laih pilau yakat wain sapahni utuhnin kapat ki kidik awaskat sanwa mani yakat prak yaknin kapat ki.

²¹ Man namangkauh yaklauwa muihni kidika yuh dauwa kat, di kalatang kaswang; dawak was dikih kalawakat, kalatang diwang;

²² kaput kalyamtang yakasaldi muhni daihwarang, dawak Dawan yaklau minit lauwi mana karang.

²³ Tingpal niningkauh wing wauhwa kidika kaupak was lauwi kaiwi, dawak tuni dutni yulwa kidika kaupak muhni dutni kidika kaiwi.

²⁴ Ū tuna kung yakat yalahnin kidika kauh baisa yamni ki, ū nuhni ahni panuhni kat yal muih dutni as karak yalahnin karak dawakat.

²⁵ Sihm was sanni kat dinitsuru was dikih kalawa kidika kapat bubukwi yul yayamni kidika sau naikau balna kaupak.

²⁶ Wastuna pauni kalahwa kidika kapat ki di yamwas muihni kidika di dutni yamna niningyakat.

²⁷ Amak mahni dinin kidika yamni awas ki, kaunah di dadasni walwi talnin kidika laih rispik lani as ki.

²⁸ Sihm tawan nuhni kat daklawas yamadangni kidika, kapat ki angdika muihni witing kaliswa balna yakat amanglawas kidika.