Proverbios 24 - Papang Yulni

- 19 -

¹ Tumwinih muih dudutni balna yakat dukih manin awaski di yayamwa pasyak atnin,

² kat kalbaunin yakat manah kukulwa bahang di dutni yamnin kidika manah yulbabauwi.

- 20 -

³ Sins tuhni karak ūnina yayamwi, sins sirihni karak rahni balna uhukwi;

⁴ di amanglanin karang payahnin pāni kidika buhngki di minit nunuhni yayamni balna kidika.

- 21 -

⁵ Ahal sins duyang balna kidika tanit yamni ki pararasni karak dawakat; amanglanin kidika tanit ki, parasni karak dawakat,

⁶ kat war kalbaunin kidika yamni ridi kalwi kalbauwi dawak minit bayaknin kidika laih la manas sumalwa kidika munah ki.

- 22 -

⁷ Tapdadas kidika amanglawaski la ūni yakat ais yulwarang kidika, kat sins tuhni kidika sip laihwas bahang.

- 23 -

⁸ Wais kat daukalnin manah kulwa laih, dutni yamnin manah kulwi kalatwi.

⁹ Tapdadas yamnin kulwa kidika laih, dutni; ¡muih as bik sip wauhwas ki tapdadas kidika!

- 24 -

¹⁰ Pāt malaihwak kulnam bukwak, parasma kidika nuhni dutasman.

- 25 -

¹¹ Daunin yakat wirlana balna kidika laihta yaktah; daunin manah bangkidika yamadangni kaupak laihta yaktah.

¹² Amanglatayang tima bik, la yamwa muihni kidika amanglawarang; yamni amanglawarang matalwasak muihni kidika, lauwi diawi ais yayamna kat minit praisni kat, bitik kau.

- 26 -

¹³ Walakibis, ditah, amak wasni damni kidika; dita dakah ampat auhni kidika.

¹⁴ Kidika damni kapat dakama sins tuhni dawak di amanglanin kidika bik; kalpakma kat, witni kat yamni awama dawak tahanin dutaman kidika bahwi uhwas karang.

- 27 -

¹⁵ Muih dudutni balna ridi kakalwinih muih al yamni manah yamwa niningyakat, witing ūni yakat daukakalwinih,

¹⁶ wat tiaskaubu bukwarang bik, sihm kaput yaklauwarang;

- 28 -

¹⁷ Alasna kalahwinih dawak alasna bik yamwinih waihmala bukna kidika yulni,

¹⁸ kat Dawan laih kidika talkih kalawas bahang, kulnin daukalna kidika yakpamwarang witing kaupak.

- 29 -

¹⁹ Kulnam daukalwinih muih dudutni balna yulnina dawak bik tumwinih.

²⁰ kat muih dutni laih witni yakat yamni awas karang bahang: ¡muih dutni kidika laih awas kapat piwarang!

- 30 -

²¹ Walakibis, rispik kalatah Papang yakat dawak king yakat; waihla balna karak kalpakwinih,

²² kat di daukalnin kidika minit as witingna yakat kiwarang bahang muih as bik amanglawaski wah diawarang kidika Papang dawak king bik yaklauwi kalawarang kidika.

Sins duyang balna yulnina ūk

²³ Adika balna bik sins duyang balna yulnina: Yamni awaski la ūni yakat muih as kau bik dauh kalkulnin awaski.

²⁴ Pāt dis muihni yakat pāt duyang kalkulwa kidika, tawan yaklauwi dutni diyuyulwi dawak nisan balna dauh dikukulwi;

²⁵ kaunah wais yakat wah kalawa kidika laih yamni kalahwi dawak muih balna bik yamni dikukulwi.

²⁶ Yamni nangnitlawa kidika laih kungnimak yakat umwa kapat ki.

²⁷ Tapas yakat yamnam balna kidika barangni alahwah dawak yamak yakat warkma kidika yamtah, dawak usnit kat sip awama ūma yamnam.

²⁸ Yaihmat kau muihni yulni pini yulwinih dawak bik alas yulwinih.

²⁹ Kulwinih biri kalyamnam, witing mayamna kapat biri kalyamnam.

³⁰ Baskiwah yanimak munah bayaknayang dawak tunanba dis wainni pasmunah bik bayaknayang:

³¹ dawak talnayang dai sau as ukung manah ukusna kat, kipala kau itikna kidika bik sau yakat bubukna.

³² Kidika talik, kulnik yakat atik dunayang; kidika talik lan alahwanayang:

³³ man laih amangkat, dawak yamni kalwakaihta amaman,

³⁴ minikunni atnin kidika kaiwi dahn mayamwarang bakus kalbaunin dini duwa kapat.