Proverbios 21 - Papang Yulni

¹ King kulnin kidika laih, Dawan tingni yakat, kiwi, was murwa kapatki Dawan dukih kalawa kidika.

² Muih al yamwa kidika bitik laih yamni kapat kulwi, kaunah Dawan kuduh lani yamwa kidika.

³ Barangni dawak la kat yamnin kidika yamtah, Papang laih sakripais kidika kaput dukih kalawi.

⁴ Witing manah kapat talwa kidika kulnin bik kaput ki; muih dudutni balna yaringnina kidika laih dutni.

⁵ Yamni kulwi talwi wark yamwa kidika, yamni kalahwi; sirihni yayamwa kidika laih dutni kalahwi.

⁶ Alas yulwi munah ritsni balna duduwa kidika dauh sirihni bayakkiwi, bahang daunin wawalwi.

⁷ Muih dudutni laih silp kaldaukakalwi kalbabauwa kidika munah, la kat yayamwas yulni.

⁸ Muih dutni yamwa balna kidika laih kawaini ki; di yamni manah yamwa muihni kidika laih klin ki.

⁹ Tanit yamni ki ū tuna yakat yalahnin, ū nuhni pasyakat yal kulnin dutni kat yalahnin karak dawakat.

¹⁰ Muih dutni laih dutni yamnin kamanah kulwi; minikun talwas ki muih ūk yakat.

¹¹ Tapdadas yakat wah kalawa kidika, isningpuk awas kidika di lan kalwi; sins duyang laih kalyulwa kamanah lan kalwi.

¹² Papang la kat yamwa kidika muih dutni ūni yakat talwi, dawak muih dudutni kidika bahwidis yamwi.

¹³ Muih minikunni kalnina dinit yakat bukwi yulwak dakakawas kidika witing bik ilp yuyulwak didakakawas karang.

¹⁴ Prisant as kalana kidika la kat munah kulnin daukalna parasni karang bik yamni kalwi.

¹⁵ La kat yamwakat, la kat muihni kidika alaswi, muih dutni yamyang balna laih bahwi dismukwi.

¹⁶ Yamwi kiwa balna yakat isningpuk awas kidika, dauna balna yakat kiwi bukwarang.

¹⁷ Muihni nuhni dukih kalawa yakat kiwa kidika wain dawak di walapni balna, minikunni yakat bukwarang.

¹⁸ Muih al dauh dutni kidika holi muihni pāni yakat wauhwarang.

¹⁹ Kauhmak wanilang yakat yalahnin kau yamni ki; muih yal kulnin dutni karak yalahnin kidika.

²⁰ Sins duwa ūni yakat ritsni dawak walapni bangki, kaunah tapdadas laih dini balna bitik dahn yamwi.

²¹ Barangni atnin walwa kidika, yakwi sangnika dawak rispik bik.

²² Sins duwa kidika laih tawan nuhni as yamni daklana kidika niningyakat kalbauwi, dawak minit bayakwi, parasni yakat kulnin āwi duwadai kidika.

²³ Amung talwi yulbauwa kidika, pāt kawas ki.

²⁴ Witingna manah kapat kaldakakawa dawak tapdadas balna kidika yakat diyuyulwi witingna laih uba di lan balna diyuyulwi.

²⁵ Dukih kalawak dauwi baskiwah kidika, kat tingni balna kidika wark alahwakih awas bahang;

²⁶ Ma bitik yak kaminin manah ki. Holi muihni laih nawatnikauh kulnin yakat dutni diski.

²⁷ Dawan dutni talwi minitdis dini duahaiwa kidika muih dudutni balna kat kulnin dutni karak duwi aiwa bahang.

²⁸ Witnis alas muihni kidika laih bahwi dispamwarang; kaunah dakawi lan kidika laih nangnitlawarang.

²⁹ Muih dutni kidika yamni kapat ki, dutni yamwas muihni kidika laih yamni manah ki.

³⁰ Dawan muhni yakat sins tuhni as bik diski sinsni sirihni dawak sinsni yamni bik. yak ki.

³¹ Muih laih aniras ridi yamwi, kalbauna kiunin, kaunah Dawan yaklauwi minit bayaknin kidika kalawi.