Proverbios 20 - Papang Yulni

¹ Wain yaklauwi muih al tapdadas yamwi; dinin parasni kidika kalyamwak kiriyaklauwi; kidika kalyamwak sins duwa kapat di yamwas ki.

² King kulnin daukalna kidika laih layan ihwa kapat ki; wais uswa laih, sangnika yamadangni yakat āwi.

³ Rispik as ki muih al as kalbilnin walwas kidika, kaunah tapdadas laih sipki yamnin.

⁴ Sau tuknin mani kat, baskiwah laih tukwaski; kaunah minik yaknin mani yakat walwarang kaunah yakwas karang.

⁵ Malnikau yamnin kulwa kidika laih was tuhni kapat ki; kaunah sins sirihni duwa kidika laih lāih yakwi.

⁶ Muih manas laih barangni kapat kaldakakawi; kaunah muih as kau bik kulnin āwi duwas ki.

⁷ ¡Isninglak ki walanibis balna dawa kidika witing barangni yalahna muihni kidika!

⁸ King kidika muih lani yamnin ūni yakat kiwi yalahwak, minikpa talwi lawa kamanah sipki dutni balna uswi yaknin.

⁹ Muih as bik yulwaski: “Ising yamni ki, dutni as bik dis klin yang.”

¹⁰ Paun dutni āwi dawak kulwa kidika bik dutni di bu kidika Dawan dutni talwi.

¹¹ Di yamwa yakat lāih ki wahma as barangni kidika.

¹² Tapani kidika laih dakanin, dawak minikpa laih talnin kidika laih Dawan yamna.

¹³ Kaminih, mamakunni alahwama; sahmuhtah, kaput laih di kasnin manas duma.

¹⁴ “¡Dini adika laih dutni ki!”, bakanwi duwa kidika kaput yulwi, kaunah bakanwa usnit kat, witing alasna kalahwi.

¹⁵ Sins tuhni karak yulbauwa kidika tanit yamni ki, sau akat gol dini balna bitik karak.

¹⁶ Talwas muihni di yakwak ilpni kāwa kidika, asnina kidika dakyaktah trasni lauwi kat duwarang.

¹⁷ Muih al laih alas manah kaskihni kalawi, ban kiwakat tingpas yakat sau kapat kalwarang bahang.

¹⁸ Wark yamnin kulwa kidika yul yamni sumalwarang kat yamwarang; War kalbaunin kat yamni kulwi talwi dawi kalbauwi.

¹⁹ Yul trukyang kidika sip yul malwi duwaski, kaput bahang yul trukyang karak kalpakwinih.

²⁰ Papangni balna yakat dutni diyulwa kidika, tanit puksani pasyakat dauwarang.

²¹ Tatuna kau īsi duna kidika, witni yakat alasna awas ki.

²² Biriwi kalyamnin kidika yulwinih; Dawan yakat kultah, minitbayaknin mawarang.

²³ Dawan dutni talwi paun dutni kidika; paun dutni kidika laih yulni yakwi.

²⁴ Dawan laih muih angkut kiwa kidika talwi; muih as bik amanglawas ki tanit yakat amput karang kidika.

²⁵ Yamadangni ki muih al kidika Papang yakat pramis yamwarang kat usnit kat yulwarang pranimis kidika sip awaski.

²⁶ King sins duwa kidika muih dudutni balna diawak silp alahuiwi dawak minitna yakat di piramwi bayakwi sikitwi.

²⁷ Papang spiritni kidika muih al yakat kalana kidika kuduh yaringni as kulnin paskau dahlwa kidika.

²⁸ King laih trunni yakat yamni sakki dalani lani dawak di rahm manah yamwak.

²⁹ Wawahma witingna manah kapat kaldakakawa kidika laih parasnina; dawak muih bararak risninapik kidika laih basnina pihna kidika.

³⁰ Dutni kidika laih yamni kalwi bauwi dawak dakwa kidika karak; bauwa kidika laih kulnin dutni kalahkiwi.