Proverbios 19 - Papang Yulni

¹ Tanit yamni ki minikunni dawak dutni yamwas atnin kidik, dawak tapdadas, muih alasni yulnin karak dawakat.

² Yamni awaski dukih palni kidika kulwi talwas atnin; di sirihni yamwa kidika dutni manas kalahwi.

³ Muih al tapdadas kidika yulni ta diswi, dawak usnit kat muih al kidika yaklau Dawan yakat pāt ilwi.

⁴ Ritsni kidika yaklauwi kaltalyang manas aiwi, kaunah minikunni kidika laih kaltalyang yamni bik diswi.

⁵ Witnis alas kidika wah duwas bayakwas ki; alas muihni kidika yamni kallaihwi yakwas karang ki.

⁶ Kulnin yamni dawak sat ūk kaldakawas kidika, muih bitik kalwawalwi kaltalyang yamni kalalahwi.

⁷ Minikunni kidika wirahni balna bik dauh kaltatalwi, kidika bahang kaltalyang yamni balna bik witing kaupak kalahwi uiwi.

⁸ Lan kalna kidika kaput warkni yamwa kidika, witing silp dalani kaltalwi dawak barakwi.

⁹ Witnis alas yulwa kidika wah duwas bayakwas karang; alas muihni laih daunin kidika tani tahawi.

¹⁰ Tapdadas dini palni awaski, di yaksasihn balna dauh kapat yamnin kidika, dawak bik kuihwas palni ki, muih dini yamyang kidika dawan nunuhni balna minitna yakat kabamint kanin.

¹¹ Isningpuk atnin kidika laih kulnin daukalwa kidika laihwatnin, dawak rispik kidika laih, uswak bik dakawas kapat kidika.

¹² King kulnin daukalna kidika laih layan ihwa kapat ki, kaunah kulnin yamni kidika laih diwas kapat ki dibasta minit yakat.

¹³ Walanbis tapdadas kidika yamwak Papangni wauhwi. Was tahwa laihwatwas kapat ki yal kalbauyang kidika.

¹⁴ Papangni balna kaupak ū dawak ritsni kidika duwi; dawak Dawan kaupak duwi witing yalni sinsni sirihni kidik.

¹⁵ Baski kalyamwak kasak kami, dawak baskiwah laih yul wauhwarang.

¹⁶ La yulwa kaput yamwa kidika sangnika nanitdakwi, Dawan sumalwak dauh kulwa kidika laih dauwi.

¹⁷ Minikunni yakat wayaki kalataman kidika laih Dawan yakat wayaki kalataman, bahang Dawan yaklauwi lauwarang trasni kidika.

¹⁸ Walamabis barangni atah, baisa barangni ānin sip yakat, kaunah iwinih, wah kalataman kidika yulni.

¹⁹ Uba kulnin daukalwa kidika, minit duwi; wah kaupak dakyaknin laih baisa daukalwi.

²⁰ Yulni sumalwa kidika dakah dawak dutah; kaput laih sins duyang kalma.

²¹ Muih al laih wark manas yamnin ridi kalahwi, kaunah dawan kulnin lani manah yamwi.

²² Muih al kaupak dukih kalawa kidika barangni atnin; minikunni atnin kauh yamni ki, dimalyang atnin karak dawak.

²³ Dawan yakat rispik kalanin kidika laih sangka atnin yakat dukiwi; isninglak yalahwi, dutni bik wauhwas.

²⁴ Baskiwah kidika di kasnin lakna yakat bakatwi; kaunah sip awaski tinpas yakat duwi kiunin kidika.

²⁵ Tapdadas yakat wah kalawa kidika isningpuk awas kidika di lan kalwi; sins duyang kidika wat as kalyulwa kamanah lan kalwi.

²⁶ Papangni balna kidika dutni diyamwi ūni kaupak kang'yaknin laih asalni ki, dawak kidika laih walanibis as dutni ki.

²⁷ Walakibis mabilwa kidika dakas awama kat yul yamni sumalwa kaupak naikau alahwama.

²⁸ Witnis alas muihni kidika sarahni yamwi la kat yamnin kidik; muih dutni kidika tinpas kaupak dutni yulwi.

²⁹ Pan kidika ridi ki tapdadas balna dinina dawak wah kidika laih tapdadas balna dangnina dini.