Proverbios 16 - Papang Yulni

¹ Wark yamnin kulnin yakat duwa kidika laih muih al dini; kaunah witni yulni kidika Dawan duwi.

² Muih al yamwa kidika laih bitik yamni kapat talwi, kaunah Dawan kuduh kidika lani balna yamwa kidika.

³ Warkma balna kidika Dawan tingni yakat atah, dawak warkma balna kidika yamni kalahna karang.

⁴ Dawan witing di as kulwi di balna kidika yamna: muih dutni kidika bik, wah kalawarang mani yakat.

⁵ Dawan dukih kalawaski witingna manah kapat kaldakakawa balna kidika; waradika kidika awas naikau karang bik wah duwarang.

⁶ Dalani talnin dawak rahm kidika karak dutni dawak diswi; Dawan risnipik kalanin kidika laih dutni kaupak naikau kalahwi.

⁷ Muih al as di yamwa balna kidika Dawan dukih kalawak kidika alni waihnila balna bitik kulnin aslah kalawi.

⁸ Bubin duna karang bik dutni lani munah awas kat kidika laih tanit yamni ki; la awas munah di mani duna karak dawakat.

⁹ Muih al kidika wark balna yamnin ridi kalahwi, kaunah Dawan yakluwi tunan kawi.

¹⁰ King laih yulbauwi Papang munah muih lanina yamwas ki, la awas kidika karak.

¹¹ Paun āwa balna kidika Dawan lani yakat kiwi; paun balna bitik witing yamna.

¹² King balna yaklauwi wark dutni balna laihwawatwi, kat trunni kidika laih la kat munah bahang.

¹³ King balna dalani tatalwi dawak yamni tatalwi yulni balna alas dis yamni yulwa kidika.

¹⁴ King kulnin daukalna kidika laih daunin yulnin, sins duyang laih sanni yamnin kidika walwi.

¹⁵ King alasna kidika laih sangka atnin pranimis, dawak kulnin yamni kidika laih mukus was duaiwa kapat ki.

¹⁶ Sins tuhni dunin kauh tanit yamni ki gol dunin karak dawakat; di amanglanin kauh tanit yamni ki, lalah karak dawak.

¹⁷ La kat balna lanina kidika laih dutni kaupak yaklanin; ais yamwa balna kidika maintalnin kat kidika laih witing alas mainkaltalwi.

¹⁸ Witing manah kapat kaldakanin dangnit yakat kaiwa kidika laih bukkiunin.

¹⁹ Tanit yamni ki miniknakunni balna karak buknin dawak witingna manah kapat kaldakakawa balna karak duyang kalnin.

²⁰ Di balna yamni maintalwi muhwa kidika, witing yamni; ¡alasna yamni ki wais Dawan yakat kulnin āwi duwa kidika!

²¹ Sins karak kulwi talwa kidika laih kalyuyulwi witing laih sinsni sirihni ki; dalani talwa yulni balna yulwa kidika laih kulnin laihwi.

²² La kat dunin kidika laih sangka atnin kidika duwi; tapdadas balna sumalnin bik tapdadas as ki.

²³ Sins karak kulwi talwa kidika sins lani yulbauwi, dawak yulni balna kidika yamni kulnin laihwi.

²⁴ Yul damni balna kidika laih amak kapat ki, kulnin damni āwak baisa parasni wisam kalawi.

²⁵ Ta as yamni kapat ki, kaunah witni kat daunin sakki.

²⁶ Di kaskih kalawak wark yamwa kidika laih baisa kalyamwak wark yamwi; yuh kalawa yulni baisa wark yamwi.

²⁷ Muih dutni kidika laih plawar busnin pāni kapat ki, ¡yulwa balna kidika laih kuh daihni kapat ki!

²⁸ Muih dutni kidika kalbaunin yamwi; yul muryang kidika laih waihla kalahnin yamwi.

²⁹ Al daihni kidika laih wanaihni yak alas yulwi dawak ta dutni yakat duwi kiwi.

³⁰ Minikpa suyungwi dutni yamnin kulwa kidika; kungnimak parasni uman dutni yamna kidika.

³¹ Basni pihna kidika laih kraun yamni as ki, yamni yamwa munah duna.

³² Tanit yamni ki kulnin laihwatnin dawak kulnin dadasni dunin karak dawak; silp mamuihki yakat minit bayaknin kidika tanit yamni ki tawan nuhni kalbauwi dakyaknin karak dawakat.

³³ Muih al laih suerte kidika lakwi, kaunah Dawan yaklauwi di bitik kidika yamwi.